DWIZ 882

Nanindigan ang mga transport groups na tuloy ang kanilang hirit na taas-pasahe kahit pa may malakihang rollback sa presyo ng mga produktong petrolyo.

Paliwanag ni Ka Obet Martin, presidente ng Pasang Masda, mas nag-aalala sila kapag may malakihang tapyas sa presyo ng produktong petrolyo dahil posibleng malaki rin ang bawi ng mga kumpanya ng langis sa oras na magpatupad na sila ng taas-presyo.

Dagdag pa ng grupo, pinangangambahan din nila ang pagpapatupad ng mas mataas na excise tax sa petrolyo kung saan tiyak na maaapektuhan sila.

Inihihirit ng mga transport group na itaas sa P12 ang minimum na pasahe sa jeep mula sa P9.

Isinusulong ng Department of Education (DepEd) na magkaroon ng temporary evacuation center para sa mga biktima ng Bulkang Taal.

Ayon kay Education Secretary Leonor Briones, sa halip na temporary learning space ang gawin ay dapat mga temporary evacuation center para mapaglipatan ng mga evacuees.

Aniya, ito ay para muli nang makabalik sa pag-aaral ang may 10,000 mga apektadong estudyante sa rehiyon 4A o CALABARZON Region palamang.

Para hindi na palipat-lipat na naman yung mga bata kasi kapag mag-settle down ng mga bagay-bagay, kumalma na si Taal sa kanyang alburuto, malaking migration na naman, parang exodus,” ani Briones.

Katwiran ni briones, sinasabi sa batas na hindi maaring gamiting evacuation centers ang mga pampublikong eskwelahan o kung sakali man na magamit ay mayroon lamang 15 araw para hindi maapektuhan ang mga mag aaral.

Gagamitin lamang kung wala na talaga, only as the last resort kung wala na talaga mapuntahan pero merong limit dito,” ani Briones. — panayam mula sa Teka Teka (alas 4:30 na!)

Asahan na ang malakihang balasahan sa Philippine National Police (PNP) kasunod ng pagkakatalaga kay PNP Chief Archie Francisco Gamboa.

Nakatakdang pumalit kay Gamboa bilang deputy chief for administration ang kaniyang mistah na si Police Lt. Gen. Camilo Cascolan habang aakyat naman si Police Lt. Gen. Guillermo Eleazar bilang Deputy Chief for operations mula sa pagiging Chief of the directorial staff.

Magkakaroon din ng paggalaw sa iba pang posisyon sa PNP dahil sa maraming nabakanteng pwesto dahil sa mga nasibak at magreretirong pulis na kailangang punuan.

Nangako ang bagong talagang si PNP Chief Police General Archie Francisco Gamboa na tututukan ang internal cleansing ng Philippine National Police (PNP).

Nangako si Gamboa, bilang siyang unang naglatag ng internal cleansing program, na malilinis niya ang hanay ng PNP bago ang kaniyang pagreretiro sa buwan ng Setyembre.

Binigyang diin pa ni Gamboa na hindi nagtatapos sa pagkuha ng tiwala ng Pangulo ang kaniyang misyon at malayo pa ang kaniyang tatahakin upang matamo ang mga planong pagbabago sa kanilang hanay.

Bukod sa internal cleansing, kabilang din sa tututukan ni Gamboa ang pagpapaigting ng kampanya kontra krimen at illegal na droga.

Pinamamadali ni Pangulong Rodrigo Duterte sa kongreso ang pagpasa ng P30-B supplemental budget para sa mga biktima ng Bulkang Taal.

Sa pagbisita ng Pangulo sa Sto. Tomas, Batangas sinabi pa ng Pangulo na nais niyang humirit sa kongreso na gawing P50-B ang aaprubahang pondo para sa pagtatayo ng mga permanenteng evacuation centers hindi lamang sa Batangas kundi sa iba pang lugar.

I am urging congress na sa lahat ng prone areas ng disaster magkaroon ng evacuation centers na malalaki lalong lalo na yung probinsya na nakaharap sa Pacific Ocean and that would be Samar,  Isabela, Cagayan pati dito kaya kayo hindi naman natin masiguro ‘yang Taal kung kailan talaga puputok o hindi, in the meantime that we are excepting another eruption mas mabuti na lang masimulan na yung evacuations center,” ani Duterte.

Dito ay paulit-ulit na siniguro ng Pangulo na hindi magkukulang at sapat ang pondo ng gobyerno para mabilis na tulong ng gobyerno.

But you can be sure that the government will respond, kasi ngayon ang pera ng tao nandyan talaga makikita at may pera tayo ‘wag kayong mag-alala. Ang pera natin na nasa gobyerno kaya natin ibigay sa mga kapatid natin, dadating ang tulong hintay lang kayo, we will act fast and sa tamang panahon dadating ang tulong ng gobyerno,” ani Duterte.