Nakatakdang magsagawa ng sesyon ang mababang kapulungan ng kongreso sa Batangas sa gitna ng patuloy na pag-aalburoto ng Bulkang Taal.
Kasunod ito ng pag-sangayon ng mga Kongresista sa mosyon ni House Majority Leader Martin Romualdez.
Gagawin ang sesyon sa Batangas City Convention Center sa January 22, Miyerkules bandang ala una ng hapon.
Nanatili pa rin sa alert level 4 ang Bulkang Taal kahit pa nabawasan na ang paglalabas nito ng usok at abo.
Nagbigay ng karagdagang ayuda si Pangulong Rodrigo Duterte sa probinsiya ng Batangas kasunod ng pagputok ng Bulkang Taal.
Ayon Senador Christopher Lawrence Bong Go, P10-M ang ipagkakaloob ng Pangulo para sa provincial government.
Habang tig – P5-M naman sa Lipa City, Agoncillo, Tanauan, Mabini, Batangas City, San Luis, Sto. Tomas at San Jose.
500 mga sanggol ang inaasahang makikinabang sa mga donasyong breastmilk mula sa Quezon City General Hospital.
Ayon kay Dr. Shahani Duque, head ng hospital’s milk bank, dumaan sa screening at pasteurization ang nakolektang breastmilk para masiguro itong ligtas at tatagal ng mas mahabang panahon.
Aniya, ang mga gatas kasi na hindi dumaan sa proseso ay tatagal lamang ng tatlong buwan habang isang taon naman ang mga gatas ng ina na dumaan sa proseso.
Kaugnay nito, nanawagan pa ang ospital sa mga ina na nagnanais na mag-donate ng kanilang gatas na makipagtulungan sa kanila.
Batay sa umiiral na batas, mahigpit na ipinagbabawal ang donasyong formula milk sa panahon ng kalamidad dahil maari itong magdulot ng mas malaking tiyansa ng pagkakasakit at kamatayan sa mga sanggol dahil sa limitadong suplay ng malinis na tubig at iba pa.
Nagbabala sa publiko ang Food and Drug Administration (FDA) laban sa pagbili at paggamit ng mga El Shaddai healing ointments.
Ayon sa FDA, ang mga produktong El Shaddai Menthol Healing Oil at El Shaddai Sampaguita Oil ay walang kaukulang certificate of product registration.
Dahil dito, sinabi ng FDA na hindi magagarantiya ng ahensiya ang kalidad at kaligtasan ng naturang mga produkto.
Batay sa FDA act of 2009, ang pagma-manufacture, pagbebenta, importasyon , exportation at paggamit ng mga health products na hindi dumaan sa kaukulang otorisasyon sa FDA ay mahigpit na ipinagbabawal.
Umaapela ang Department of Social Welfare and Development (DSWD) ng mas maayos na koordinasyon para mas mabilis ang pagbibigay ng donasyonn sa mga biktima ng pagsabog ng Bulkang Taal.
Kasunod ito ng pagdagsa ang mga pribadong grupo na direktang nagtutungo sa mga evacuation areas para magpamudmod ng relief goods.
Ayon kay DSWD Spokesperson Irene Dumlao, layon nitong maging sistematiko at maayos ang pamimigay ng tulong.
Ito ay para masigurong mabibigyan ang lahat at hindi mabibigyan lamang ang iilang mga evacuation centers.
Matatandaang nitong makalipas na weekend ay nagkaroon ng matinding trapiko dahil sa dagsa ng mga naglalayong makapaghatid ng tulong sa mga biktima ng bulkan.
Patay ang dalawang bata matapos na makulong sa nasusunog na bahay sa Tagbilaran City.
Kinilala ang mga magkakapatid na biktima na sina Mary Jade Arayan, walong taong gulang at Mary Joy Arayan limang taong gulang habang nakaligtas naman sa sunog ang panganay na si Mary Jane, siyam na taong gulang.
Iniiwan umano ng kanilang ina ang magkakapatid habang ito ay nasa trabaho.
Nagmula umano ang sunog sa isang kandila na nahulog sa foam na hinihigaan ng mga biktima.
Mabilis na kumalat ang apoy at nadamay rin ang mga kalapit nitong bahay.
Dalawang mobile hospital ang binuksan ng Department of Health (DOH) para maserbisyuhan ang mga apektadong residente kasunod ng pagputok ng Bulkang Taal sa Batangas.
Ayon kay Batangas Governor Dodo Mandanas, inilagay ang dalawang hospital sa Polytechnic University of the Philippines sa Sto. Tomas at Barangay Caloocan sa Balayan.
Kabilang sa mga maaring isagawa sa naturang mga mobile hospitals ay minor surgeries tulad ng appendectomy, normal birth delivery at caesarian section.
Bukod dito ay 17 mga medical teams ang ipinakalat sa mga munisipalidad para matutukan ang pangangailangang pang kalusugan ng mga evacuees.
Sa ngayon, pawang mga iritasyon sa mata, upper respiratory infections at diarrhea ang madalas na idinudulog ng mga evacuees.
Patay ang lima katao matapos na bumaha ang mainit na tubig sa basement ng isang hotel sa Russia.
Ayon sa Regional Investigative Committee na humahawak sa kaso, bukod sa nasawi ay tatlong iba pa ang sugatan dahil sa matinding pagkasunog ng kanilang katawan.
Sa imbestigasyon, sumabog ang tubo ng mainit na tubig sa isang hotel room sa basement hanggang sa kumalat ang tubig sa mga kalapit na kwarto.
Sinampahan na ng kasong krimen ang management ng hotel dahil sa kwestyonableng safety standards nito.
Buena manong nakapagtala ng panalo sina tennis superstars Serena Williams at Naomi Osaka sa pagbubukas ng Australian Open.
Ito ay sa kabila ng patuloy na paglala ng kalagayan ng hangin sa Melbourne dahil sa bushfire.
Napataob ni Williams ang mas batang si Russian tennis champion Anastasia Potapova sa iskor na 6-0, 6-3.
Habang nag advance din sa second round si Osaka matapos na matalo nito si Marie Bouzova.
Kahit masyado pang maaga, sinabi ng mga tennis expert na posibleng magkaharap sa quarter finals sina Williams at Osaka na tila re-match ng kanilang paghaharap noong 2018 US Open Final.
Business as usual pa rin sa Tagaytay City sa kabila ng closure order na ipinalabas ng Department of Interior and Local Government (DILG) dahil sa posibleng hazardous eruption mula sa Bulkang Taal.
Ayon kay Cavite Rep. Abraham Tolentino, itinuturing lamang na rekomendasyon ang naging closure order ng DILG dahil nanatili aniyang ang lokal na pamahalaaan pa rin ang siyang may otoridad dito.
Iginiit ni Tolentino na ang Alkalde pa rin ang siyang dapat na magdesisyon sa naturang usapin.
Nakatakdang magkaroon ng grand reopening ang Tagaytay City sa January 24 o bisperas ng Chinese New Year.
Nanindigan naman ang DILG na ang kaligtasan ng mga negosyante at publiko ang kanilang prioridad sa gitna ng panganib na dulot ng taal.