DWIZ 882

Nakatakdang lumutang bukas, araw ng Lunes, si Peter Joemel Advincula alyas ‘Bikoy’.

Ito’y para maghain ng piyansa sa kasong sedisyon na isinampa laban sa kaniya dahil sa paglalabas ng ‘Ang Totoong Narcolist’ video.

Ayon sa abogado ni alyas Bikoy na si Atty. Larry Gadon, nakatanggap siya ng abiso mula kay Bikoy na haharap ito sa Quezon City Metropolitan Trial Court Branch 138 na naglabas ng warrant of arrest.

Gayunman, tumanggi si Gadon na isapubliko ang kinaroroonan ni Bikoy dahil na rin sa usaping pangseguridad.

Magugunitang ipinaaaresto ng Korte si alyas Bikoy kasama si dating Senador Antonio Trillanes IV na kasalukuyang nasa Amerika at walong iba pa.

Umalma ang Trade Union Congress of the Philippines (TUCP) sa naging pasya ng pamahalaan na alisin na ang ipinatupad na deployment ban sa mga household service workers sa Kuwait.

Ito’y sa harap na rin anila ng hindi pa natatapos na gusot sa pagitan ng Pilipinas at Kuwait dahil sa mga serye ng pang-aabuso sa mga Overseas Filipino Workers (OFW) tulad ng sa nasawing si Jeanalyn Villavende.

Ayon sa TUCP, ang naturang pasya ni Labor Sec. Silvestre Bello III at ng Philippine Overseas Employment Administration (POEA) ay patunay ng kawalang malasakit sa 200 OFW’s na nasawi dahil sa iba’t-iba at kuwesyunableng dahilan.

Nanghihinayang din ang TUCP na tinanggal na agad ang deployment ban gayung hindi pa naman ganap na napaplantsa ang mga mahahalagang usapin na tumatalakay sa kapakanan ng mga OFW sa Kuwait.

Tiniyak ng pamahalaan ang pagpapauwi sa mga Filipinong sakay ng cruise ship na Diamond Princess na kasalukuyang naka-quarantine sa Japan dahil sa coronavirus disease (COVID-19).

Ayon kay Labor Secretary Silvestre Bello III, meron nang inihandang repatriation process para sa mahigit 500 mga Filipino na tripulante ng nabanggit na cruise ship.

Gayunman, hindi pa masabi ni Bello ang eksaktong araw kung kailan ito isasagawa.

Sinabi ni Bello, nakikipag-ugnayan na rin siya sa recruitment agency ng mga tripulanteng Pinoy alinsunod na rin sa kahilingan ni Health Secretary Francisco Duque III.

Ito aniya ay hinggil sa pagsasailalim sa quarantine ng mga nabanggit na Filipino oras na makabalik ng pilipinas

Dagdag ni Bello, tuloy-tuloy naman aniyang nakatatanggap ng sahod ang mga Filipino crew ng Diamond Princess kahit pa naka-quarantine ang mga ito kasabay ng pagtiyak na tutulungan sila ng pamahalaan.

Sa pinakahuling ulat, nasa 11 tripulanteng Filipino ng Diamond Princess ang kumpirmadong nahawaan ng COVID-19.

Nakatakdang magpulong muli sa Martes, Pebrero 18 ang inter-agency task force for the management of emerging infectious diseases (IATF).

Ito ay upang pag-usapan ang posibilidad ng pagpapatupad ng panibagong travel ban gayundin ang pag-alis naman ng ilang kasalukuyang umiiral na travel ban dahil sa banta ng coronavirus disease (COVID-19).

Ayon kay Health Secretary Francisco Duque III, tatalakayin sa pulong ang mga lugar o bansang nakapagtala na ng local transmission ng nabanggit na sakit.

Dito aniya ibabatay ang kanilang gagawing hakbang na may kaugnayan sa pagpapatupad o pag-tanggal sa travel ban.

Magkakaroon ng risk assesment kinakailangan natin merong evidence base merong malinaw na batayan kung bakit natin ipapasok o tatanggalin sa listahan. Noong una inilagay na muna natin lahat yan, hindi pa naman tayo nakakasiguro pa sa mga hakbang na ginagawa sa ibang bansa patungkol sa kanilang pag-gwardya sa paglabas at pagpasok sa COVID-19. So, dahil hindi tayo nakakasiguro ipasa na muna natin madali naman magpulong ulit at kung may ebidensya,” ani Duque.

Sinabi ni Duque, sa ngayon tanging ang napagkasunduan pa lamang ng inter-agency task force ay ang pag-lift ng travel ban sa Taiwan.

Ito naman aniya ay matapos mapatunayang maayos na napapangasiwaan at makontrol ng Taiwan ang pagkalat ng covid 19 sa kanilang lugar.

Tulad ng Taiwan wala namang local transmission, ang baba ng bilang nakukuha nila at hinigpitan nila ang kanilang surveillance, ipinatawag nga nila yung mamamayan ng mainland China na makapasok na,” ani Duque. — panayam mula sa Todong Nationwide Talakayan.

Nakapagtala na ng kabuuang 487 persons under investigation (PUI) dahil sa posibilidad ng coronavirus disease (COVID-19) infection ang Department of Health (DOH).

Ayon kay Health Secretary Francisco Duque III, 154 na lamang sa nabanggit na bilang ang kasalukuyang naka-confine at kanilang mahigpit na binabantayan.

Nasa 330 na aniya ang nakalabas na ng ospital, habang nananatili pa rin aniya sa tatlo ang kumpirmadong kaso ng COVID-19 sa bansa.

Ang total admitted patients under investigation or observation 164 na lang, ang na-discharge na natin ay 330, ang negative sa testing sa RITM 327, ang confirmed cases natin 3, yung dalawa naka-recover, yung isa naman namatay nga yung Chinese, lahat ito imported cases wala pa tayong local transmission,” ani Duque.

Dagdag ni Duque, nananatili ding negatibo at hindi nakikitaan ng anumang sintomas ng COVID-19 ang mga OFW’s na inilikas at umuwi ng bansa mula Wuhan City sa China.

Tuloy-tuloy din aniya ang pagsasailalim sa mga ito sa quarantine sa athlete’s village sa new clark city capas tarlac.

Wala pa, wala pa ni isa at sana manatili silang negative hangga’t sa matapos ang kanilang quarantine period,” ani Duque. — sa panayam ng Todong Nationwide Talakayan.