DWIZ 882

Nilagdaan na ni Pangulong Rodrigo Duterte ang executive order (EO) na nagtatakda ng maximum retail price sa ilang mga piling gamot.

Ito ang kinumpirma ni senate health committee chairman Christopher “Bong” Go.

Una nang isinumite ng Department of Health (DOH) ang draft ng EO sa tanggapan ng pangulo noong Disyembre kung saan ipinanukala ng ahensiya ang pagregulate sa presyo ng mahigit 120 mga gamot.

Kabilang dito ang mga gamot para sa mga sakit at kondisyon sa kalusugan tulad ng hypertension, diabetes, sakit sa puso, chronic lung disease, sakit ng mga bagong panganak na sanggol at kanser.

Inaasahan naman ng DOH na bababa ng hanggang 56% ang presyo sa merkado ng ilang mga gamot dahil sa EO.

Suportado ni Department of Foreign Affairs (DFA) secretary Teddy Locsin Jr. ang panukalang payagan nang makabalik ng Hong Kong ang mga Overseas Filipino Workers (OFWs) na naapektuhan ipinatupad na travel ban bunsod ng 2019 coronavirus disease (COVID-19).

Sa kanyang Twitter post, nangako si Locsin na kanilang irerekonsidera ang pagpapabalik sa Hong Kong ng mga na-stranded na OFWs sa bansa sa susunod na dalawang linggo.

Sinabi ni Locsin, panahon na para payagang makabalik sa kanilang mga employers sa Hong Kong ang mga OFWs na matagal nang naghihintay na maalis ang travel ban doon.

Iginiit pa ng kalihim na mas magaganda at may higit na kakayanan ang mga pasilidad sa Hong Kong para makontrol ang pagkalat ng COVID-19.

Una nang sinabi ni Labor secretary Silvestre Bello III na pinagbigyan ang mga nagbakasyong OFW na mag-extend ng kanilang leave bunsod ng ipinatupad na travel ban sa Hong Kong.

Nasa 450 mga pasahero ng Metro Rail Transit-Line 3 (MRT-3) ang pinababa sa southbound ng Cubao Station –mag-aalas-6 kaninang umaga.

FLASH: MRT3, nagka-aberya | via @jaymarkdagala pic.twitter.com/9NG2kBligO

— DWIZ Newscenter (@dwiz882) February 16, 2020

Batay sa ulat ng pamunuan ng MRT-3, nakaranas ng electrical failure ang motor sa isa sa mga bagon ng tren bunsod naman ng nasirang electrical subcomponents.

Paliwanag ng pamunuan ng MRT-3, luma na ang mga wirings sa apektadong bagon kaya nasunog ang linya ng kuryente nito.

Agad namang naisakay sa kasunod na tren ang mga pinababang pasahero matapos ang 15-minuto.

Kasunod nito, humingi ng paumanhin at pang-unawa ang MRT-3 sa kanilang mga mananakay matapos magresulta ang insidente sa paghaba ng pila sa bahagi ng North Avenue, Quezon Avenue at Cubao Station. —ulat mula kay Jaymark Dagala (Patrol 9)

Umapela sa pamahalaan ang mahigit sa 100 Pilipino na na-stranded sa airport ng Macau na magpadala ng special flight para makauwi sila sa Pilipinas.

Inabutan ang mga Pilipinong nagbabakasyon lamang sa Macau ng travel ban dahil sa 2019 coronavirus disease (COVID-19).

Sa nilagdaan nilang petisyon na ipinadala sa Philippine Consulate sa Macau, nagpahayag ng kahandaan ang mga Pinoy na akuin ang bayad sa chartered flight na maaaring makapag-uwi sa kanila sa Pilipinas.

Una nang sinabi ng Department of Health (doh) na pinag-uusapan na nila kung dapat nang tanggalin ang travel ban sa Macau at maging sa Hong Kong.

Nilinaw ng Dangerous Drugs Board (DDB) na hindi nila inaprubahan ang paggamit ng medical marijuana para sa epilepsy.

Ayon kay DDB chairman Catalino Ccuy, ni-reclassify lamang nila ang mga gamot na mayroong component ng Cannabidiol na matatagpuan sa marijuana.

Sinabi ni Cuy na kailangan pa rin ng permiso mula sa DDB o sa Philippine Drug Enforcement Agency (PDEA) kung mangangailangan ng Cannabidiol ang isang pasyente.

Kabilang anya sa tungkulin ng DDB ang mag reclassify ng mga gamot na pwedeng tanggalin o idagdag sa listahan ng dangerous drugs.

Posibleng pagpapabilis ng paglusot ng Medical Marijuana Bill sa kongreso, kinontra ng DDB

Kinontra ng Dangerous Drugs Board (DDB) ang mga nagsasabi na posibleng mapabilis na ang pagpasa ng Medical Marijuana bill sa Kongreso matapos nilang aprubahan ang paggamit ng Cannabidiol (CBD) sa mga may epilepsy.

Ayon kay DDB chairman Catalino Cuy, lalabas na hindi na kailangang gawing legal ang paggamit ng medical marijuana dahil aprubado na ng DDB ang Cannabidiol.

Batay sa pag-aaral, may dalawang component ang marijuana –ang CBD at THC (Delta-9-Tetrahydrocannabinol).

Ang CBD umano ang mayroong therapeutic component o nakagagamot, samantalang ang THC ang nagbibigay ng high.

Kumikilos na ang Department of Health (DOH) para sa repatriation ng mahigit sa 500 Pilipino na sakay ng Diamond Princess cruise ship na naka-quarantine ngayon sa Japan.

Ayon kay Health secretary Francisco Duque III, naghahanap pa sila ng pasilidad kung saan pwedeng i-quarantine ang mga irerepatriate na sakay ng cruise ship.

Nakikipag-ugnayan rin anya sila sa maritime agency na nagpadala ng mga Pilipino sa cruise ship.

531 sa mga crew members ng Diamond Princess ang mga Pilipino samantalang pito (7) ang pasahero.

Sa naturang bilang, 27 na ang positibo sa 2019 coronavirus disease (COVID-19).

Ibiniyahe na ngayong araw patungong South Korea ang ikatlong batch ng mga basura nitong itinapon dito sa Pilipinas.

Aabot sa 50 container vans, karga ang tone-toneladang basurang galing South Korea ang isa-isa nang isinampa sa barge sa Mindanao International Container Terminal (MICT) sa Tagoloan, Misamis Oriental.

Ayon kay MICT port collector John Simon, kahit naibalik na sa South Korea ang kabuuang 6,500 toneladang basura, kailangan pa ring magbayad ng SoKor ng danyos dahil sa paglabag nito sa Basel Convention.

Makikipag-ugnayan din sila sa Department of Environment and Natural Resources upang alamin ang kabuuang pinsalang idinulot ng mga naturang basura sa Verde Soko site kung saan nanatili ang mga ito ng humigit kumulang sa dalawang taon.