DWIZ 882

Sinampahan na ng kasong administratibo ng Department of Interior and Local Government (DILG) ang 10 local chief executives na mabigong malinis mula sa mga obstruction ang mga lansangan sa kanilang nasasakupan.

Ito ang inihayag ni DILG secretary Eduardo Año kung saan pinadalhan na rin ng show cause orders ang nasa 97 mga Local Government Units (LGUs) para pagpaliwanagin.

Ayon kay Año, umaabot sa mahigit 6,600 mga primary at secondary roads sa buong bansa ang nalinis mula sa lahat ng klase ng illegal obstruction.

Magugunitang ipinalabas ni Año ang memorandum circular number 121-2019 na nag-aatas sa mga LGUs na magpatupad ng clearing operations sa lahat ng primary at secondary roads sa buong bansa sa loob ng 60-araw.

Binigyan ng 75 araw ng Department of Interior and Local Government (DILG) ang mga barangay officials na linisin mula sa mga obstruction o harang ang lahat ng mga kalsada na kanilang mga nasasakupan.

Ito ay bilang bahagi ng ikalawang bugso ng direktiba ng pangulo na linisin ang lahat ng mga ilegal na obstruction sa mga kalsada o tinawag nilang “Road Clearing 2.0”.

Ayon kay DILG secretary Eduardo Año, nagpalabas na siya ng memorandum na nag-aatas sa mga Local Government Units (LGUs) lalo na sa mga opisyal ng barangay na magpatupad ng clearing operations sa mga tertiary roads.

Layun aniya nitong mapanatiling malinis ang mga kalsada at daan sa buong bansa na tulad ng naging resulta ng mga isinagawang operasyon noong nakaraang taon.

Sinabi ni Año, magsisimula ngayong araw, ika-17 ng Pebrero, ang 75 araw na palugit sa mga barangay officials.

Nakabalik na sa gobyerno ang dating acting president ng PhilHealth na pinagbitiw noong 2019 ni Pangulong Rodrigo Duterte.

Itinalaga ng pangulo si dating PhilHealth acting president Roy Ferrer bilang assistant secretary.

Matatandaan na pinagbitiw noon ng pangulo si Ferrer at iba pang opisyal ng PhilHealth matapos mabunyag na nagbabayad ng insurance claims ang PhilHealth sa mga bonus na kidney treatments.

Gayunman, pinagbitiw noon si Ferrer dahil sa command responsibility at nanatili ang tiwala sa kanya ng pangulo.

Samantala, pormal nang itinalaga ng pangulo si Health undersecretary Eric Domingo bilang director general ng Food and Drug Administration (FDA).

Tinanggap ni Philippine National Police (PNP) chief Gen. Archie Gamboa ang nasa 22 bagong mga sasakyan mula sa Police Service Savings and Loan Association Inc. (PSSLAI).

Isinagawa ang turnover kasabay ng lingguhang flag raising ceremony sa Kampo Crame na dinaluhan din ni PSSLAI chairman at CEO retired Major Gen. Lucas Managuelod.

22 sasakyan mula sa Police Service Savings and Loan Association Incorporated, tinanggap ni PNP Chief P/Gen. Archie Gamboa | via @jaymarkdagala https://t.co/QqKhWJResd

— DWIZ Newscenter (@dwiz882) February 17, 2020

Maliban dito, iginawad din ng PSSLAI ang Balangay Awards sa mga natatanging police unit dahil sa matagumpay na pagsusulong ng kampanya kontra krimen sa pamamagitan ng community engagement.

Kabilang sa mga kinilala bilang finalist si ‘Brig. Gen. Rafael B. Crame Balangay Awards’ ay ang Special Action Force (SAF), Provincial Police Office ng Iloilo, Quezon at La Union, City Police Offices ng Bogo, Lucena at Urdaneta gayundin ang Municipal Police office ng Daraga, Lagangilang at Tiwi.

Itinanghal namang mga nagwagi sa nasabing parangal ay ang PNP Finance Service, Provincial Police Offices ng Abra, Leyte at Cagayan, City Police Offices ng Mandaluyong, Legaspi at Dapitan gayundin ang municipal police offices ng Balaoan, Malasiqui at Jose Panganiban.

Ayon kay Managuelod, aabot sa P54-milyon ang kabuuang halaga ng mga bagong sasakyan at cash awards para sa naturang parangal. —ulat ni Jaymark Dagala (Patrol 9)

Pumalag si Philippine National Police (PNP) chief Gen. Archie Francisco Gamboa sa naging pahayag ni Vice President Leni Robredo na posibleng mauwi sa cover-up ang ginagawang adjudication process nito sa mga pulis na dawit sa drugs watch list.

Sa pulong balitaan ng PNP sa Kampo Crame, tahasang sinabi ni Gamboa na mali ang pahayag at walang batayan ang mga sinabi ng pangalawang pangulo.

Giit ng PNP chief, mawawalan ng saysay ang ginagawa nilang pagsasala sa listahan ng mga pulis na idinadawit sa ilegal na droga kung ang layunin pala nila ay pagtakpan at protektahan ang mga ito mula sa pag-uusig.

Magugunitang binatikos ni Robredo nitong weekend ang ginagawang adjudication process gayundin na rin ang pananahimik ng PNP sa pagkakabilang ni P/Lt. Col. Jovie Espenido sa nasabing listahan.

Wrong statement because there’s no basis. (…) Remember that these cops have also served the country. We’re trying to cleanse the PNP. Kapag sinabi kong mag-optional retirement, it does not mean guilty ka,” ani Gamboa. —ulat ni Jaymark Dagala (Patrol 9)

Walang nakikitang problema ang Department of Health (DOH) sa pagpapahintulot para sa compassionate use o paggamit bilang gamot ng Cannabidiol –ang compound mula sa marijuana.

Ito ay matapos namang i-reclassify ng Dangerous Drugs Board (DDB) ang mga gamot na mayroong Cannabidiol para sa epilepsy.

Ayon kay DOH secretary Francisco Duque III, nakasaad na aniya sa probisyon ng Dangerous Drugs Act ang pag-aaral hinggil sa paggamit ng component mula sa marijuana bilang gamot.

Gayunman, binigyang diin ni Duque na kinakailangang matiyak ang tamang proseso hinggil dito kung saan dapat ay nasa itsura na ito ng gamot tulad ng kapsula.

Paliwanag ni Duque, karaniwang hindi na nagtataglay ng nakaka-high na component na Tetrahydrocannabinolic ang mga nakakapsulang Cannabidiol.

Samantala, hindi pa matiyak ni Duque kung hindi na nakakabuo ng addictive behavior ang paggamit ng medical marijuana na kinakailangan pa aniya ng mga karagdagang pag-aaral.

Dumepensa si Department of the Interior and Local Government (DILG) secretary Eduardo Año sa pagkumpirma nya na kasama si Lt. Col. Jovie Espenido sa ‘narco list’.

Ayon kay Año, kilala sa buong bansa si Espenido kaya’t dapat itong mabigyan ng pagkakataon na linisin ang kanyang pangalan.

Aminado si Año na nagtataka rin sya kung bakit hindi pa natatanggal sa listahan si Espenido gayung 2016 pa ang naturang ‘narco list’.

Pinuna rin ni Año ang anya’y mabagal na validation na ginagawa ng Philippine Drug Enforcement Agency (PDEA).

Samantala, naniniwala si Año na malaking factor ang ipinahayag na tiwala ng pangulo para mawala si Espenido sa ‘narco list’.

Kaya ‘yung pinamalas niyang paglaban sa droga sa Ozamiz, napakalaking factor ‘yun to serve in his favor. Siguro ‘yun ang nakita ni Pangulo, noong nagbigay ng statement ang Pangulo na siya ay naniniwala na malinis si Espenido. I’m not part of the validation team but nakikita ko lang, makakatulong sa kaniya yun. I don’t know bakit naging mabagal ang paglabas ng ICAD ng validation,” ani Año.