DWIZ 882

Ipinag-utos na ni Foreign Affairs Secretary Teodoro Locsin Jr. sa Philippine Embassy sa Tokyo na simulan na ang mabilis na repatriation sa mga Filipinong sakay ng Diamond Princess cruise ship.

Ayon kay Locsin, obligasyon ng pamahalaan na kalingain ang mga Overseas Filipino Workers (OFW) nasaan man sila sa mundo kaya marapat lamang na mapauwi agad sila sa bansa.

Ayon sa DOH ang mga uuwing Pilipino ay muling sasailalim sa 14-day quarantine pagdating dito sa Pilipinas.

41 mula sa 500 mga Filipino sa naturang cruise ship ang nag positibo sa COVID-19.

Habang sa kabuuan, mahigit sa 500 mga pasahero at mga tripulante ng naturang cruise ship ang tinamaan ng nasabing sakit.

Hindi umano maaaring maging batayan ang lifestyle check para husgahan ang isang kawani o opisyal ng pamahalaan.

Ito ang tugon ni Department of Justice (DOJ) secretary Menardo Guevarra sa pahayag ni Senadora Risa Hontiveros na isalang sa lifestyle check ang mga tauhan ng Bureau of Immigration (BI) na isinasangkot sa “pastillas scheme”.

Ayon kay Guevarra, posibleng ang matuklasan lamang sa lifestyle check ay indikasyon na may unethical na gawain ang isang public servant ngunit hindi aniya ito maaaring maging sapat na ebidensya.

Gayunman, nilinaw ng kalihim na suportado niya ang rekomendasyon ni Hontiveros laban sa mga tiwaling kawani ng Immigration.

Magugunitang naging maugong ang tungkol sa “pastillas scheme” kung saan naniningil ng P10,000 bilang service escort ang ilang tauahan ng Bureau of Immigration sa mga dumarating na Chinese sa airport.

Tiniyak ng Philippine Amusement and Gaming Corporation (PAGCOR) na ipasasara ang mga Philippine Offshore Gaming Operators (POGO) na hindi nagbabayad ng tamang buwis sa pamahalaan.

Sa pagdinig ng house committee on games and amusement, sinabi ni Atty. Jose Tria Jr., acting assistant vice president ng Offshore Gaming and Licensing Department ng PAGCOR, kumikilos na ang PAGCOR kaugnay sa pagpapasara ng mga POGO na hindi nagbabayad ng tamang buwis sa pamahalaan.

Kanila na rin aniyang hiningi sa Bureau of Internal Revenue (BIR) ang listahan ng mga POGO na hindi pa nakakapagbayad ng kanilang buwis.

Noong nakaraang linggo ay tumaas ang koleksyon ng PAGCOR sa POGO industry, subalit pumalo naman sa P50-billion ang buwis na hindi nababayaran ng mga ito.

Aabot sa 455 bayan sa Pilipinas ang wala pa ring suplay ng malinis na tubig.

Ito ang inihayag ni Senador Francis Tolentino sa pagdinig ng committee on local government matapos makita ang datos ng ipinatutupad na “Salintubig Program” ng Department of Interior and Local Government (DILG).

Ngunit kinontra ito ni Relly Leysa, project manager ng nabanggit na programa ng DILG, at sinabing ang bilang lamang ng bayan na wala pang malinis na tubig ay nasa 60.

Gayunman, iginiit ni Tolentino na nasa higit 9-milyong pamilya ang hirap pa rin sa pagkakaroon ng malinis na tubig.

Dahil dito, nagpatutsada ang senador sa mga kinauukulang opisyal na gawin ang kanilang trabaho at hindi hanggang “drawing” lang ang mga plano.

Isang magandang simula umano para sa Universal Health Care Program ang ginawang paggamit ni Pangulong Rodrigo Duterte sa kaniyang regulatory powers para magpatupad ng maximum retail price sa mga gamot sa hypertension, diabetes at cardiovascular disease.

Ayon kay Senadora Risa Hontiveros, natutuwa siyang pinaboran ng pangulo ang kaniyang panawagan para pakinabangan ang kapangyarihan nitong mapababa ang presyo ng mga gamot.

Ani Hontiveros, halos isang dekada nang hindi nagagamit ng isang pangulo ang regulatory powers kung saan maaaring magpatupad ng maximum retail price sa mga gamot batay sa rekomendasyon ng Department of Health (DOH).

Dagdag pa ng senadora, malaking porsyento ng pondo para sa kalusugan ang napupunta lamang sa mga gamot.

Malaking tulong sa libu-libong Overseas Filipino Worker (OFWs) at kanilang pamilya ang pagbawi ng travel ban sa Hong Kong at Macau.

Ayon kay Senate President Pro Tempore Ralph Recto, hindi na mangangamba ang mga OFW na sila ay maiipit sa sitwasyon lalo na at apektado ang kanilang hanap-buhay.

Natatakot na umano kasi ang ilang mga OFW na naapektuhan ng travel ban na baka wala na silang babalikang trabaho sa Hong Kong at Macau.

Sinabi rin ni Recto na tiwala siyang mas may kapasidad ang mga ospital sa Hong Kong para magamot ang mga tatamaan ng 2019 coronavirus disease (COVID-19).

Tiniyak din umano ng gobyerno ng Hong Kong na hindi nila pababayaam ang mga Pinoy na nasa kanilang bansa.

Tiwala ang Malacañang na mabibigo ang mga nagtatangkang patalsikin sa pwesto si Pangulong Rodrigo Duterte kasabay ng paggunita sa anibersaryo ng EDSA People Power Revolution sa ika-25 ng Pebrero.

Ayon kay Presidential Spokesman Salvador Panelo, “wishful thinking” lamang ang ipinapanawagang kilos protesta sa social media.

May mga nais kasi aniyang magkasa ng protesta sa nabanggit na araw para umano ipakita ang pagtutol ng publiko sa pagpapabasura ng pangulo sa visiting forces agreement (VFA).

Ani Panelo, malabong magbunga ang pinaplano ng mga kritiko ng administrasyon dahil mas marami umanong Pilipino ang sumuporta kay Pangulong Duterte.

Maging ang militar umano ay 100% ang suporta sa punong ehekutibo.

Patay ang isang dating mataas na opisyal ng Bureau of Correction (BuCor) matapos tambangan sa Muntinlupa City ngayong Miyerkules ng hapon, ika-19 ng Pebrero.

BREAKING: Dating Bureau of Corrections legal affairs chief Atty. Frederick Anthony Santos, patay sa pananambang sa Muntinlupa City https://t.co/HHOy7zaafm pic.twitter.com/iKzIolncwm

— DWIZ Newscenter (@dwiz882) February 19, 2020

Sakay ng kanyang kotse ang dating legal officer ng BuCor na si Atty. Frederick Anthony Santos nang pagbabarilin sa harap ng isang eskwelahan sa Barangay Poblacion sa naturang lalawigan —tinatayang 100 metro lamang ang layo mula sa main gate ng New Bilibid Prison.

Magugunitang isa si Atty. Santos sa mga tumestigo sa kasagsagan ng pagdinig sa kontrobersiyal na isyu ng Good Conduct Time Allowance (GCTA) Law.