DWIZ 882

Kinilala na ang mga opisyal at tauhan ng Bureau of Immigration na nagpapatakbo sa ‘pastillas’ bribery scheme sa Ninoy Aquino International Airport (NAIA).

Nakasaad ito sa affidavit ni Immigration Officer 1 Allison Chiong, ang pinagmulan ng video kung saan makikita ang VIP treatment sa mga Chinese POGO workers na pumapasok sa bansa na binasa sa hearing ng Senate Commmittee on Women, Children, Family Relations and Gender Equality.

Ang ‘pastillas’ scheme anya ay kontrolado nina Bien Guevarra, Glenn Comia at Den Binsol ng Traffic Control Enforcement Unit na nuoy mga tauhan ni Ports Operation Division Chief Red Mariñas.

Ang iba pa anyang sangkot ay sina Totoy Magbuhos, Deon Albao alias Nancy, Paul Borja alias Lisa, Anthony Lopez alias Al at Dennis Robles Dr.

Ayon kay Chiong, sa ngayon ay nasa 10% lamang ng Immigration officers ang hindi sangkot sa ‘pastillas’ scheme —ulat mula kay Cely Bueno (Patrol 19).

Nag-abiso ang Philippine Postal Corporation (PhilPost) sa publiko sa pagkakaroon ng delay sa lahat ng mga inbound at outbound mails o mga sulat na mula sa ilang bansa na may mga kaso ng 2019 coronavirus disease (COVID-19).

Ayon sa PhilPost, asahan lalo ang pagkaantala ng mga liham mula at patungong Mainland China, Hong Kong at Macau.

Ito anila ay para maiwasan ang pagkalat pa ng COVID-19.

Paliwanag pa ng PhilPost, nakadagdag din umano ng delays sa lahat ng inbound at outbound mails ang mga nasuspindeng serbisyo ng gobyerno sa mga apektadong lugar.

Minaliit lang ng Malacañang ang banta ni dating senador Antonio Trillanes IV kaugnay sa kaniyang pagganti sa pagtatapos ng Administrasyong Duterte sa 2022.

Para kay Presidential Spokesman Salvador Panelo, non-sense lang ang mga naging pahayag ni Trillanes.

Ani Panelo, walang oras ang Malacañang para sa dating senador na puro aniya kabalbalan lang ang pinaggagagawa.

Una rito, sinabi ni Trillanes na bahagi ng pagpapatahimik sa kaniya ng administrasyon ang sedition case na kaniyang kinakaharap.

Unti-unti nang nababawi ng PhilHealth ang halagang di umano’y nanakaw sa mga Overseas Filipino Workers (OFWs) na nagbayad ng kanilang insurance premiums sa ahensya.

Ayon kay PhilHealth president at chief executive officer Ricardo Morales, P1.2-milyon lamang at hindi P16-milyon ang sangkot na halaga sa scam.

Sa naturang halaga, nabawi na anya nila ang mahigit sa P400,000 mula sa mga manning agencies na responsable sa pag-iisyu ng pekeng resibo sa mga biktimang OFWs at nasa proseso na ng pagbawi ang natitira pang halaga.

Tiniyak ni Morales na tuloy-tuloy ang pag-a-upgrade nila sa kanilang sistema upang hindi na maulit ang scam.

Matatandaan na kinasuhan ng dating PhilHealth employee na si Ken Sarmiento ang ilang dati at kasalukuyang opisyal ng PhilHealth dahil sa di umano’y kapabayaan at kabiguang aksyunan ang scam.

Ilang OFWs di umano ang naisyuhan ng pekeng resibo nang magbayad sila ng kanilang insurance premiums sa PhilHealth.

Hawak ng pulisya ang dashcam mula sa sasakyan ng tinambangang si dating Bureau of Corrections (BuCor) legal affairs chief Atty. Frederick Anthony Santos.

Ayon kay Muntinlupa City Police chief, Colonel Hermogenes, pinag-aaralan na nila ngayon ang footage sa nasabing dashcam.

Ngunit ani Hermogenes, nahihirapan silang suriin ang footage dahil sa may kalabuan aniya ito.

Gayunman, hinahanapan na nila aniya ng paraan kung papaanong mapapalinaw ang mga kuha sa dashcam.

Sira naman umano ang mga CCTV sa paligid ng lugar kung saan nangyari ang pananambang kay Santos.

Pasok na ang National Bureau of Investigation (NBI) sa imbestigasyon kaugnay sa kaso ng pagpatay kay dating Bureau of Corrections (BuCor) legal affairs chief Atty. Frederick Anthony Santos.

Ayon kay Department of Justice (DOJ) secretary Menardo Guevarra, agad niyang inatasan ang NBI para siyasatin ang pagpatay kay Santos na sangkot sa kontrobersiyal na Good Conduct Time Allowance (GCTA) ng mga bilanggo.

Magugunitang humarap noon sa pagdinig sa senado si Santos kung saan kaniyang ibinunyag ang mga nangyayaring anomalya at katiwalian sa loob ng Bilibid.

Si Santos ay nasawi matapos tambangan noong Miyerkules ng hapon, ika-19 ng Pebrero, sa Muntinlupa City.

Ipinagbabawal na ng gobyerno ang mga tricycle sa mga pangunahing lansangan.

Ito ay batay sa inilabas na memorandum circular 2020-036 ng Department of Interior and Local Government (DILG).

Nakasaad din sa kalatas na inaatasan ang mga local government unit (LGU) na bumuo ng tricycle route plan sa loob ng 30 araw.

Ayon kay DILG secretary Eduardo Año, matagal namang ipinagbabawal ang mga tricycle at pedicabs sa national highway ngunit marami lang aniya talaga ang pasaway.

Bukod umano sa nakasasagabal ang mga ito sa daan posible pang maging sanhi ito ng aksidente sa kalye.

Hindi nagustuhan ng Philippine National Police (PNP) ang ginawang pagharap sa media ni Lt. Col. Jovie Espenido.

Ayon kay PNP chief General Archie Gamboa, mayroong gag order na ibinaba kay Espenido matapos itong mapasama sa listahan ng mga sangkot sa illegal drug trade.

Ngunit aniya hindi ito sinunod ni Espenido sa pagharap pa rin niya sa media.

Dahil ditto, posibleng maimbestigahan umano si Espenido.

Itinanggi ni Vice President Leni Robredo na siya ay bahagi ng ikinakasang malawakang kilos protesta para ipanawagan ang pagbaba sa pwesto ni Pangulong Rodrigo Duterte.

Gayunman hindi itinanggi ni Robredo na mayroong nakarating na impormasyon sa kaniya hinggil sa isasagawang protesta.

Ngunit tiniyak ng bise presidente na wala siyang kinalaman dito o maging bahagi man ng anumang panawagang pagbaba sa pwesto ng pangulo.

Sa kabila nito, sinabi ni Robredo na karapatan naman din ng mamamayan na kanilang ipahayag ang kanilang mga saloobin basta’t ito ay naaayon sa Saligang Batas.

Kasabay nito nanawagan ang pangalawang pangulo na gawin din sana ng lahat ng nasa gobyerno ang kanilang trabaho.