DWIZ 882

Nakitaan ng probable cause ng Department of Justice (DOH) ang kasong reckless imprudence resulting in homicide laban kay dating Health Secretary Janet Garin at iba pa.

Nag ugat ito sa pagkasawi ng ilang batang naturukan ng dengvaxia.

Nakasaad sa resolusyon ng DOJ na magkaroon ng kapabayaan ang panig ni Garin at iba pang respondents nang ipatupad ang mass immunization program.

Bukod kay Garin, 9 na iba pang opisyal ng Department of Health (DOH) kabilang ang mga opisyal ng Food and Drug Administration (FDA), Research Institute for Tropical Medicine (RITM) at Sanofi Pasteur ang kinasuhan.

Matatandaang mismo ang kumpanyang Sanofi ang nagsabi na epektibo lamang ang dengvaxia sa mga batang nagkasakit na ng dengue.

Hindi napigilan ni dating Chief Justice Maria Lourdes Sereno na maglahad ng kanyang saloobin sa kasong isinampa laban ng solicitor general laban sa ABS-CBN Corporation.

Matatandaang naghain ng quo warranto petition si Solicitor General Jose Calida sa Korte Surpema, ang kaparehong paraan na ginamit din niya para mapatalsik si Sereno sa puwesto nuong 2018.

Ayon kay Sereno, ang pagkilos na ito ng solicitor general ay maituturing na pananakot sa network.

Maituturing din aniyang redundant ang naturang pagkilos kung talagang pa–expire na ang prangkisa ng ABS-CBN sa Marso.

Naniniwala si Sereno na mayroong malalim na mensahe ang administrasyon sa ginagawa nito sa ABS-CBN lalo na ngayong inihirit pa sa Korte Surpema na patahimikin ang network sa pamamagitan ng gag order.

Namigay ang Department of Agriculture (DA) ng P32-milyong halaga ng livelihood assistance sa mga hog raisers na apektado ng African swine fever (ASF).

Ayon sa DA, mahigit 700 mga hog raisers sa anim na barangay ang nabigyan ng mga bagong alagang baka, kambing, pugo, at manok.

Matatandaang unang naitala ang ASF outbreak sa bansa sa Rodriguez, Rizal kung saan umabot sa 7,000 mga baboy ang namatay dahil sa sakit.

Ngunit nito lamang Huwebes nang ideklara ng Agriculture Department na ASF–free ang naturang bayan.

Nadagdagan pa ng 41 ang mga kaso ng hinihinalang coronavirus disease 2019 (COVID-19) sa bansa.

Ayon sa DOH, dahil dito pumalo na sa 597 ang kabuuang bilang ng person under investigation (PUI) dahil sa COVID-19.

Sa kabila ng panibagong mga kaso ng naturang sakit, 455 o 76% ng mga PUI ay nakalabas na ng ospital.

Habang 139 sa mga ito ang patuloy pa ring monimonitor sa mga pagamutan kung saan karamihan ay nasa Metro Manila.

Sa ngayon ay wala pa rin anilang naitatalang local transmission ng COVID-19 sa Pilipinas.

Asahan na ang pagpapatupad ng water service interruption sa Metro Manila sa mga susunod na mga araw.

Ito ang inihayag ng National Water Resources Board (NWRB) bunsod pa rin ng pananatili ng mas mababa sa normal na alokasyon ng tubig sa mga kabahayan sa Metro Manila at mga karatig na lalawigan.

Ayon kay NWRB executve director Sevillo David Jr., hindi nila kayang maibalik ang 46 cubic meters/second na normal allocation ng mga water concessionaires dahil sa pananatiling mababa sa normal operating level ng Angat Dam.

Paliwanag ni David, kinakailangang iregulate ang ibinibigay na alokasyon mula Angat Dam para maging sapat ang suplay ng tubig sa mga susunod na buwan.

Gayundin aniya ang maiwasang maulit ang naranasang krisis sa tubig na matinidng nakaapekto sa libu-libong kabahayaan sa Metro Manila noong nakaraang taon.

Walang namomonitor na anumang destabilization plot laban kay Pangulong Rodrigo Duterte ang Philippine National Police (PNP).

Ito ang inihayag ng PNP matapos umugong ang balitang magkakaroon ng malawakang kilos protesta laban kay Pangulong Duterte sa ika-22 ng Pebrero –ilang araw bago ang anibersaryo ng EDSA People Power Revolution.

Ayon kay PNP spokesperson Brig. Gen. Bernard Banac, wala pa silang natatanggap na kumpirmadong impormasyon hinggil sa plano o pagkilos para pabagsakin ang pamahalaan.

Igiinit din ni Banac na nananatiling matibay ang suporta at katapatan ng PNP sa chain of command.

Kasabay nito, tiniyak naman ni Banac na mananatiling naka-alerto at mapagmatiyaga ang PNP para mapanatili ang kapayapaan at kaayusan sa bansa gayundin ang malabanan ang mga krimen.