DWIZ 882

Pinawi ng lokal na pamahalaan ng San Juan City sa Maynila ang pangamba ng publiko kaugnay sa pamamasyal sa Greenhills Shopping Center sa kabila ng banta ng 2019 coronavirus disease (COVID-19).

Ito’y makaraang lumabas ang impormasyon na madalas magtungo sa isang prayer room sa naturang mall ang isa sa mga pasyenteng nagpositibo sa virus.

Ayon kay San Juan Mayor Francis Zamora, ligtas na magtungo sa Greenhills dahil patuloy aniya ang kanilang isinasagawang sanitation at disinfection rito mula pa nang kumpirmahin ng Department of Health (DOH) ang bagong kaso ng COVID-19.

Nagsasagawa rin aniya siya ng surpresang inspeksyon upang matiyak na sumusunod ang shopping mall sa mga hakbang na kanilang napagkasunduang ipatupad laban sa virus.

Dagdag pa nito, muli nang binuksan sa publiko ang prayer hall na madalas puntahan ng pasyenteng nagpositibo sa COVID-19 batay na rin sa rekomendasyon ng DOH.

Hindi dapat maparusahan ang mga broadcast companies at matigil ang kanilang operasyon dahil lamang sa kawalan ng pag-aksyon ng Kongreso para sa kanilang hinihinging franchise renewal.

Ito ang inihayag ni Justice secretary Menardo Guevarra matapos na ihain sa Korte Suprema ang isang petisyon na kumukwestiyon sa ligalidad ng sulat ng House franchise committee sa National Telecommunications Commision (NTC).

Kaugnay ito ng kahilingang magpalabas ng provisional authority para sa patuloy na pag-operate ng ABS-CBN habang dinidinig ang franchise renewal bill nito.

Ayon kay guevarra, hindi hinihingi ng ABS-CBN ang kanilang original franchise kundi renewal lamang para sa kanilang prangkisa na una nang ibinigay ng Kongreso.

Magugunitang nagpalabas ng guidance si Guevarra kaugnay sa pagbibigay ng provisional authority ng Kongreso sa NTC para payagang makapag-operate ang mga broadcast companies habang dinidinig ang franchise renewal ng mga ito.

Itinanggi ng Anti Money Laundering Council (AMLC) ang alegasyong nagkaroon sila pagpapabaya matapos makapasok ang mahigit 600-milyong dolyar na cash na bitbit ng mga Pilipino at Chinese couriers sa nakalipas na pitong buwan.

Ayon kay AMLC Executive Director Mel Georgie Racela, tumatayo bilang pangunahing regulator sa pagpasok ng mga foreign currency sa bansa ang Bangko Sentral ng Pilipinas (BSP) at Bureau of Customs (BOC).

Sinabi ni Racela, makakagalaw lamang sila kapag nagsumite na ng foreign currency and other foreign exchange-denominated bearer monetary instruments declaration form ang BOC para makapagimbestiga ang AMLC.

Alinsunod sa isang memorandum of agreement, kinakailangang isumite ng BOC ang nabanggit na form sa AMLC sa loob ng unang 10 araw ng bawan buwan.

Iginiit pa ni Racela Marso pa lamang noong nakaraang taon nagsimula na silang mag-imbestiga hinggil sa pagpasok ng malaking halaga ng dolyar sa bansa at Agosto nang kanilang inalarma ang BOC at BSP hinggil dito.

Magugunitang sa pagdinig ng Senado noong nakaraang linggo, nagbabala si Blue Ribbon committee Chairman Richard Gordon laban sa pagsasampa ng kaso laban sa AMLC dahil sa pagpapabaya kaugnay ng pagpasok ng milyong-milyong halaga ng dolyar sa bansa.

Inaasahang bababa ng isa hanggang 3% ang kabuuang tala ng tourist arrivals sa buong mundo dahil sa coronavirus disease 2019(COVID-19) outbreak.

Batay ito sa pagtaya ng  United Nations World Tourism Organization (UNWTO) kung saan pinakamaaapektuhan ang Asia and Pacific region na aabot sa 9% hanggang 12% pagbaba.

Ayon sa UNWTO, nagkaroon sila ng pagbabago sa kanilang ipinalabas na projection para sa international tourist arrival matapos magkaroon ng outbreak ng COVID-19.

Bunsod nito, inaasahan anilang aabot sa 30 hanggang 50 billion dollars ang mawawalang kita sa international tourism.

Magugunitang, lumago nang 4% o katumbas ng 1.46 billion ang tourista arrivals sa iba’t ibang mga destinasyon sa buong mundo noong 2019.

Pasok ito sa target ng UNWTO na 3% hanggang 4%.