DWIZ 882

Naitala sa mga lungsod ng Tuguegarao at Pasay ang pinakamainit na temperatura sa bansa para sa 2020.

Batay sa datos ng pagasa mula sa kanilang mga istasyon sa Tuguegarao at Pasay City, umabot sa 35 point 5 degrees celsius ang rumihestrong temperatura sa mga nabanggit na lugar kahapon, Marso 8.

Sinundan naman ito science garden sa quezon city na may 35 degrees celsius na temperatura, Clark Pampanga na 34.9 degrees at Butuan City na 33.3 degrees celsius.

Inaasahan namang mas iinit pa ang mararamdamang temperatura sa bansa mga susunod na araw kasunod ng paghina na ng northeast monsoon o amihan.

Mananatiling bukas ang mga tanggapan ng pamahalaan.

Ito ang inihayag ng Malakanyang sa kabila ng ulat ng local transmission at pag-akyat ng bilang ng mga apektado ng  coronavirus disease 2019 (COVID-19) sa bansa.

Ayon kay Presidential spokesperson Salvador Panelo, walang nakikitang dahilan ang Palasyo para magsuspinde na ng pasok sa mga tanggapan ng pamahalaan sa ngayon.

Dagdag ni Panelo, wala ring magiging pagbabago sa mga nakatakdang aktibidad ni Pangulong Rodrigo Duterte sa kabila ng pagdami ng kumpirmadong kaso ng COVID-19.

Samantala, hinimok naman ng Trade Union Congress of the Philippines (TUCP) kapwa ang mga employers at manggagawa na magkaroon  ng bukas na komunikasyon at kasunduan para sa alternatibong paraan ng pagtatrabaho.

Ito anila ay upang maiwasan o mabawasan ang panganib ng mga manggagawa na malantad sa COVID-19.

Tatalakayin sa isasagawang pulong ng Inter-Agency Task Force (IATF) on emerging infectious disease ngayong araw ang usapin sa pagsusupinde ng klase ng mga paaralan.

Ito ang inihayag ni Justice secretary Menardo Guevarra, isa sa mga miyembro ng IATF, sa gitna na rin ng mga panawagan para sa class suspension matapos namang maitala ang unang kumpirmadong local transmission ng coronavirus disease 2019 (COVID-19) sa bansa.

Ayon kay Guevarra, pangunahing ikinukunsidera ng inter-agency task force ang kalusugan ng publiko kaya kabilang ang ito sa pagpapasiyahan alinsunod na rin aniya sa magiging batayan ng Department of Health (DOH).

Iginiit ni Guevarra, maaari pa ring mabawi ang mga mawawalang kita sa kalakalan at turismo at ma-reschedule ang mga nakatakdang aktibidad pero hindi aniya ang buhay ng mga taong nailagay sa alanganin dahil sa kawalan ng pag-iingat.

Samantala, ipinauubaya naman ng Malakanyang sa mga local government units at pamunuaan ng mga eskuwelahan ang pagpapasiya kung kinakailangang magsuspinde ng klase.

Nakatakdang magpulong ngayong araw ang Special Investigation Task Group (SITG) Bell 429 para talakayin ang mga nakalap na ebidensiya hinggil sa pagbagsak ng helicopter ng Philippine National Police (PNP) sa Laguna noong nakaraang linggo.

Ayon kay SITG Bell Commander at PNP deputy chief for operations Police Lieutenant General Guillermo Eleazar, natapos na nila ang documentation sa insidente at nalinis na rin ang lugar na pinagbagsakan chopper.

Sinabi ni Eleazar dinala na sa hangar ng  Special Action Forces (SAF) air unit sa general aviation area sa Pasay City ang mga nakolektang debris at katawan ng chopper kung saan susubukan itong i-reconstruct at ipadadala sa manufacturer bilang bahagi ng imbestigasyon.

Sa kasalukuyan aniya ay nakatutok na sila sa pagkuha ng pahayag mula sa mga testigo at sa mismong mga nakaligtas sa insidente.

Kaugnay nito nananawagan si Eleazar sa mga residenteng mnalapit sa crash site na magbigay ng mga kuhang larawan o video ng insidente para magamit bilang karagdagdang impormasyon at ebidensya.

 It’s early for us magbigay ng findings o conclusion kasi nandoon parin tayo sa gathering and collecting of information and evidence pati na ung papadokumento ng mga statement ng iba ibang mga witnesses at pati rin mga survivor, the pilot, the passenger at mga pwede natin sabihin na makakatulong sa ating imbestigation,” ani Eleazar sa panayam ng DWIZ

Hindi isasailalim sa lockdown ang mga lugar kung saan naitala ang kumpirmadong kaso ng local transmission ng coronavirus disease 2019 (COVID-19) sa Pilipinas

Ayon kay Interior and Local Government secretary Eduardo Año, wala pa silang nakikitang dahilan para magpatupad ng lockdown dahil nasa Code Red sub level 1 alert pa lamang ang bansa.

Sinabi ni Año, sa halip ay paiigtingin aniya ng pamahalaan ang pagsasagawa ng contact tracing para agad na matunton ang lahat ng mga nakasalamuha ng mga nagpositibo sa COVID-19.

Inatasan na rin ni año ang mga  Local Govenrment Units (LGU) na paganahin na ang kani-kanilang mga lctf o local COVID-19 task forces.

Ito aniya ang mangunguna sa pagdadala sa taong nakitaan ng sintomas sa mga pinakamalapit na referral facility ng Department of Health (DOH) para agad na masuri at masailalim sa quarantine.

Ipinag-utos na rin ni Año ang mahigpit na pakikipag-ugnayan at pakikipagtulungan ng lahat ng local chief executives sa DOH.

Sinuspinde na ng Department of Education (DepEd) ang ilang mga nakatakdang national at regional events para sa mga estudyante mula sa iba’t ibang panig ng Pilipinas.

Kasunod ito ng ulat ng kauna-unahang kaso ng local transmission ng COVID-19 sa bansa.

Ayon sa DepEd, kabilang dito ang mga laban para sa palaro regional habang pag-aaralan pa ng board kung itutuloy ang pagsasagawa ng palarong pambansa sa Mayo.

Sinabi ng DepEd, magpapatuloy naman ang National Festival of Talents (NFOT) at National Schools Press Conference (NSPC) dahil nasa venue na anila ang mga kalahok.

Gayunman mahigpit na magpapatupad ng mga precautionary measures kung saan ilang mga programang may kaugnayan sa aktibidad ang posibleng hindi na ganapin.

Dagdag ng DepEd, nakatakda nilang pagpasiyahan ang iba pang mga aktibidad oras na makatanggap ng abiso mula sa Inter-Agency Task Force.

Isusumite na Department of Interior and Local Government (DILG) kay Pangulong Rodrigo Duterte ang resulta ng imbestigasyon hinggil sa pagkakasama ni Police Lt. Col. Jovie Espenido sa drug list, ngayong linggo.

Ayon kay DILG secretary Eduardo Año, nakatakda na sanang  isumite kay Pangulong Duterte ang nabanggit na report nitong nakalipas na Sabado, Marso 7.

Gayunman, naantala aniya ito matapos maaksidente at bumagsak ang sinasakyang helicopter nina Police National Police (PNP) Chief Police General Archie Gamboa at pitong iba pang mga opisyal ng pambansang pulisya.

Sinabi ni Año, kinakailangan muna nilang unahin ang kalagayan ng mga naaksidenteng opisyal ng PNP.

Una nang kinumpirma ni Gamboa na natapos na nila ang pag-validate sa kaso ng mahigit 300 mga pulis na sangkot sa transaksyon ng iligal na droga.

Agad na nagpakalat ng mga karagdagang surveillance team ang Department of Health (DOH) at Inter-Agency Task Force on Emerging Infectious Disease para magsagawa ng contact tracing.

Kasunod ito ng pagkakatala sa apat na bagong kumpirmadong kaso at local transmission ng coronavirus disease 2019 (COVID-19) sa bansa.

Ayon kay Health Secretary Francisco Duque III, nagpapatupad na sila ng mga karagdagang hakbang bilang pagtugon sa sitwasyon.

Sinabi ni Duque, tuloy-tuloy ang pagkalap ng impormasyon ng Epidemiology Bureau kaugnay ng mga bagong kumpirmadong kaso ng COVID-19 at agad nilang isasapubliko ang mga ito oras na maisailalim sa beripikasyon.

Pagtitiyak pa ni Duque, matagal nang nakahanda ang ahensiya sa pagkakaroon ng local transmission.

Kaugnay nito, hinimok ng kalihim ang lahat ng mga indibiduwal na tatawagan ng surveillance team ng DOH na makipagtulungan sa ahensiya.

Gayundin ang lahat ng nakararanas ng lagnat o anumang sintomas ng respiratory disease at nagkaroon ng contact sa may COVID-19 o bumiyahe sa mga apektadong bansa na makipag-ugnayan agad sa DOH.

Umakyat na 10 ang bilang ng kumpirmadong kaso ng coronavirus disease 2019 (COVID-19) sa Pilipinas.

Ayon sa pinakabagong press release ng Department of Health (DOH) ngayong Linggo ng gabi, Marso 8, lumabas ang resulta ng isinagawang test kung saan 4 na bagong kumpirmadong pasyente ng COVID-19 ang kanilang naitala.

Anila, isang 38-year-old na lalaking Taiwanese ang ika-7 kumpirmadong kaso.

Wala itong history ng pagbiyahe sa labas ng bansa pero nagkaroon ng contact sa Taiwanese national na unang napaulat na nagpositibo sa COVID-19 pabalik ng Taiwan matapos bumisita sa Pilipinas.

Ang ika-8 kaso naman ay isang 32-year-old na Pilipino na bumiyahe ng Japan sa nakalipas na 14 na araw at nagsimulang makitaan ng sintomas noong Marso 5.

Isa namang 86-year-old na lalaking Amerikano ang ika-9 na kumpirmadong kaso ng COVID-19 sa Pilipinas na nagsimulang makitaan ng sintomas noong Marso 1.

Sinabi ng DOH, una na itong nakararanas ng hypertension at may travel history sa U.S.A at South Korea.

Habang isang 57-year-old na lalaking Pilipino na walang travel history sa labas ng bansa pero napaulat na nagkaroon ng contact sa isang kumpirmadong nagtataglay ng COVID-19.

Dagdag ng DOH, pawang naka-admit sa mga pribadong ospital ang 4 na bagong kumpirmadong kaso ng COVID-19 sa Pilipinas.

Patuloy pang tinutunton ng lokal na pamahalaan ng Quezon City ang mga kaanak ng babaeng taga Australia na nagpositibo sa coronavirus disease 2019 (COVID-19) matapos bumisita ng Pilipinas.

Ayon kay Q.C. Mayor Joy Belmonte, kanya nang ipinag-utos na puntahan ang lugar kung saan nakatira ang mga ito.

Gayundin ang pakikipag-ugnayan sa pamunuan ng tinirihang lugar sa Quezon City ng nabanggit na Australyano habang nasa Pilipinas ito.

Dagdag ni Belmonte, oras na matukoy na nila ang lugar agad silang magsasagawa ng pre-emptive disinfection at maingat na magpapakalat na rin ng impormasyon para hindi magresulta sa panic.