DWIZ 882

Balik trabaho na si PNP Chief, General Archie Gamboa matapos itong makaligtas sa pagbagsak ng sinasakyang helicopter.

 Dumalo si Gamboa sa flag raising ceremony na naka cast pa ang kanang kamay.

 Pinasalamatan ni Gamboa  ang lahat ng nagdasal para sa kanyang paggaling kasama ng kanyang mga kasamahan sa bumagsak na chopper.

 Nakiusap rin si Gamboa sa publiko na iwasan ang mga ispekulasyon sa pagbagsak ng chopper.

 Isa lamang si Gamboa sa walong sakay ng bumagsak na chopper kung saan dalawa pang heneral ang kasalukuyang nasa kritikal na kalagayan.

“Of course yung sabotage ‘sinadya’ I don’t believe so, ako personally convinced ako nandun ako sa loob ng helicopter, nobody in his right mind even what kind of interest in his mind would do that. Ako, I strongly believe na walang sabotahe doon,” ani Gamboa.

 Gayunman, nilinaw ni Gamboa na personal nyang opinyon ang paniniwala na walang sabotaheng nangyari sa pagbagsak ng chopper.

 Kailangan pa rin anyang hintayin ang resulta ng imbestigasyon ng special investigation task group.

 Tiniyak rin ni Gamboa na sumailalim sa regular bidding ang bumagsak na chopper kung saan sya pa ang namumuno nuon sa bids and awards committee

 “…Its way above board and these are brand new helicopters it came all the way from Canada, we had a pre-delivery inspection there, it was tested in Canada, before it was finally transported here and another inspection was conducted here. It’s been flying for more than two years now,” ani Gamboa.

Isa sa mga nagpositibo sa 2019 coronavirus disease (COVID-19) ang residente ng Pasig City.

Nilinaw ito ni Pasig City Mayor Vico Sotto sa kanyang post sa Facebook.

Gayunman, nakaconfine ito anya sa isang pribadong ospital na nasa labas ng Pasig City.

Meron anyang isa pang kaso ng COVID-19 sa Pasig na nakaconfine ngayon sa Medical City subalit hindi ito residente ng  kanilang syudad.

Ang dalawang nabanggit na kaso ay kabilang sa 10 kumpirmadong kaso ng COVID-19 sa bansa.

Tiniyak ni Sotto na nakikipag-ugnayan na sila sa Department of Health (DOH) upang hindi kumalat ang COVID-19 sa syudad.

Nagpapatupad na rin anya sila ng precautionary measures tulad ng contact tracing, dedicated response teams, pag-disinfect, kanselasyon ng public events at gatherings at pagpapahinto muna sa pagbibigay ng permit sa mga malakihang events.

Hiniling ng house committee on health sa Pangulong Rodrigo Duterte na i-certify na ‘urgent’ ang resolusyon para mabigyan ng supplemental budget na P2-bilyon ang Department of Health (DOH).

Sa harap ito ng naitalang local transmission ng 2019 coronavirus disease (COVID-19) sa bansa.

Ayon kay Cong. Angelina Tan, chairperson ng komite, matagal na nyang naihain ang resolusyon pero naikalendaryo lamang itong pag-usapan bukas.

Sinabi ni Tan na duda sya kung mapagbobotohan pa ito sa plenaryo dahil hanggang Miyerkules na lamang ang sesyon ng kongreso na magbabakasyon para sa kanilang Lenten break.

Kahit anya hindi nagkaroon ng local transmission, talagang kailangan na ng DOH ang dagdag na budget lalo na ang para sa Research Institute for Tropical Medicine (RITM).

Isinailalim sa temporary lockdown ang Qatif Region sa Saudi Arabia matapos makapagtala ng 11 kumpirmadong kaso ng 2019 coronavirus disease (COVID-19).

Gayunman, positibo pa rin ang interior ministry office na hindi ito magkakaroon ng epekto sa oil production ng Saudi.

Ang Qatif kasi ay isa rin sa mga oil producing province sa Saudi.

Sa kasalukuyan ay umiiral na rin ang travel ban ng Saudi Arabia sa Iran.

Ipatutupad ng Presidential Security Group (PSG) ang “no touch policy” kay Pangulong Rodrigo Duterte.

Ayon kay PSG Commander Col. Jesus Durante III, ang naturang hakbang ang napagkasunduan para maingatan ang pangulo laban sa 2019 coronavirus disease (COVID-19).

Maliban pa aniya sa pangulo, mahigpit din nila umanong babantayan ang first family.

Dagdag pa ni Durante, bilang bahagi rin ng preventive measure, sasailalim sa screening at testing sa anumang uri ng sakit na may kaugnayan sa COVID-19 ang lahat ng PSG at sinumang personalidad o pulitiko.

Magsasagawa ng disembarkation process sa mga pasahero ng MV Grand Princess ngayong Lunes, ika-9 ng Marso.

Ito’y sa sandaling dumaong sa Oakland, California ang cruise ship na isinailalim sa quarantine matapos masawi ang isang pasahero dahil sa 2019 coronavirus disease (COVID-19).

Ayon sa Office of Emergency Services ng California government, agad na dadalhin sa health care facilities ang mga pasaherong may sintomas ng influenza habang isasailalim naman sa isolaton ang mga hindi nakitaan ng sintomas.

Tatapusin naman ang quarantine period sa loob ng barko ang mga crew na walang sintomas.

Batay sa huling ulat, nasa 21 sakay ng barko ang nagpositibo sa COVID-19.

Inalerto na ng Department of Interior and Local Government (DILG) ang lahat ng barangay health emergency response team sa buong bansa.

Ito ang tiniyak ni DILG Undersecretary for Barangay affairs Martin Diño kasunod ng pagdedeklara ni Pangulong Rodrigo Duterte ng public health emergency dahil sa 2019 coronavirus disease (COVID-19).

Ayon kay Diño, kaakibat ng kanilang pag-alerto sa mga barangay ay ang pagpapatupad ng mga hakbang para paghandaan at labanan ang pagkalat ng sakit.

Intensify information campaign, at the same time, ‘yung barangay isolation unit ay prepared na rin. Kailangan din na handa ang mga barangay sa personal protective equipment na gagamitin ng ating barangay personnel,” ani Diño.

Dagdag pa ni Diño, tuloy-tuloy din ang kanilang koordinasyon mula sa Department of Health (DOH) hanggang sa mga barangay health office upang maiparating ang mga kinakailangang impormasyon hinggil sa COVID-19.

Ang protocol pagdating ditto ay in-place na rin, ‘yung coordination natin magmula sa provincial Department of Health, city and municipality DOH, down to barangay level,” ani Diño. —sa panayam ng Balitang Todong Lakas

Inaasahang makakauwi na sa loob ng linggong ito ang mga naka quarantine sa New Clark City na sakay ng Mv Diamond Princess.

 Ayon kay Health Secretary Francisco Duque, sinimulan na ang final na pagsusuri sa kanilang specimen para makatiyak na wala silang impeksyon ng corona virus.

 Sinabi ni Duque na bagamat makakauwi na sa kanilang mga tahanan, strict monitoring pa rin ang paiiralin ng Department of Health (DOH) sa mga galing ng quarantine.

 Unang naquarantine ang mga sakay ng MV Diamond Princess sa Japan bago ang karagdagang 14 na araw sa New Clark City kung saan may mga nag positibo pa rin.

Asahan ang mainit at maalinsangan na panahon sa Metro Manila at iba pang bahagi ng bansa ngayong Lunes, ika-9 ng Marso.

Ayon sa PAGASA, ito ay dahil sa epekto ng easterlies o mainit na hanging nagmumula sa Pacific Ocean.

Maaari rin umanong maitala ngayong araw ang 35°C na temperatura katulad kahapon.

Gayunman magkakaroon pa rin ng isolated o kalat-kalat na pag-ulan sa hapon o gabi.