DWIZ 882

Umakyat ng 6.6% ang remittance ng mga Overseas Filipino Workers (OFW) nitong nakaraang Enero.

Ayon sa Bangko Sentral ng Pilipinas (BSP), katumbas ito ng $2.65-B na mas mataas sa naitalang $2.48-B noong nakaraang taon sa kaparehong buwan.

Sinabi ng BSP, nagmula ito sa kapwa pagtaas ng mga remittances ng mga land based at sea-based OFW’s.

Pinakamarami aniyang ini-remit na pera ay mula sa mga OFW’s sa Estados Unidos na nasa 38.6 %.

Sinundan naman ito ng mga padala mula sa Japan, Singapore, Saudi Arabia, United Kingdom, United Arab Emirates, Qatar, Canada, Hong Kong at Korea.

Ipinag-utos na ng Malakanyang ang agarang pagpapalabas sa mga protective equipments tulad ng mask na naka-imbak sa warehouse ng Bureau of Customs (BOC).

Kasunod ito ng naging pahayag Ni Foreign Affairs Secretary Teddy Locsin Jr. Na tonelada ng mga Personal Protective Equipment (PPE) na maaaring magamit ng mga medical personnels ang nakatambak lamang BOC warehouse.

Ayon kay Presidential Spokesperson Salvador Panelo, nanawagan na sila kay Customs Commissioner Rey Leonardo Guerrero na agad ipalabas mga nabanggit na protective equipments.

Sinabi ni Panelo, kanila nang hinimok si Guerrero na pangasiwaan ang pagsasaayos sa kinakailangang mga dokumento para sa pagpapalabas ng mga ito.

Magugunitang sa tweet ni Locsin, kanyang sinabi na hindi maihatid ng mga supplier ang kinakailangang surgical masks ng Philippine General Hospital dahil natengga aniya ito sa BOC.

Ipinag-utos ng Department of Energy (DOE) ang pagpapatupad ng price freeze sa mga mahahalagang produktong petrolyo tulad ng lpg at kerosene sa loob ng 15 araw.

Ayon sa DOE, sakop nito ang mga lungsod at probinsiyang nagdeklara ng state of calamity dahil sa pagkalat ng o coronavirus disease (COVID-19).

Sa ilalim anila ng price freeze, ipatutupad ang mga rollback sa presyo ng ilang mga produktong petrolyo pero mahigpit na ipagbabawal ang pagtataas sa presyo.

Kabilang sa mga nag-deklara na ng state of calamity dahil sa COVID-19 ang mga lungsod ng Quezon, Las Piñas, San Juan, Manila, Pasay, Parañaque, lalawigan ng Cavite, Negros Oriental, Cebu City at Iligan City.

Naipit sa mga inilagay na checkpoints sa mga borders sa pagitan ng ilang lungsod sa Metro Manila at karatig lalawigan ang maraming motorista at mananakay.

Kasundo ito ng pagsisimula ng mahigpit na pagpapatupad ng enhanced community quarantine sa buong Luzon para mapigilan ang pagkalat ng coronavirus disease 2019 (COVID-19).

Kabilang sa mga nilagyan ng harang ng pulisya ang border ng San Mateo, Rizal at Marikina gayundin ang Meycauayan at Valenzuela City.

Ilang mga commuters ang galit dahil hindi rin sila pinayagang makapasok sa mga inilagay harang ng mga pulisya kahit pa malapit lamang sa checkpoint ang kanilang mga tahanan.

Pasado ala una na ng madaling araw kanina nang payagan ng mga pulis ang mga naipit na commuters na makadaan ng border mula marikina patungong San Mateo.

Habang alas tres na nang madaling araw nang palusutin naman ang mga commuters mula Rizal patungong marikina.

Iginiit naman ni Marikina City Chief Police Col. Retituto Arcangel na hindi nila pinahintulutang makadaan ang mga nabanggit na commuters at motorista dahil sa umiiral na curfew sa Marikina.

Samantala, ala una na rin ng madaling araw kanina nang payagan na ring makalusot ang mga motorista at mananakay sa border ng Valenzuela at Meycauayan,Bulacan matapos namang magtungo doon ni Valenzuela Mayor Rex Gatchalian.

Naki-usap si Pangulong Rodrigo Duterte sa Communist Party of the Philippines (CPP) New People’s Army (NPA) na magpatupad muna ng tigil putukan.

Ito aniya ay habang nakatutok pa ang pamahalaan sa problema sa coronavirus disease 2019 (COVID-19).

Ayon kay Pangulong Duterte, dapat na gawin ng npa ang kanilang bahagi sa pamamamgitan ng pansamantalang pagpapatigil sa mga pag-atake sa puwersa ng pamahalaan.

Iginiit ng Pangulo, oras na ginawa ng mga rebelde ang kanyang hiling, gagantihan aniya ito ng kabutihan sa mga susunod na araw.

Samantala, bilang tugon sinabi ni CPP founding chairman at NDFP Chief Political consultant Jose Maria Sison na kanilang masusing pag-aaralan ang alok na ceasefire ng Pangulo.

Ito aniya ay kung pormal na iaalok ng pamahalaan hindi lamang ang tigil putukan sa panahon ng krisis sa COVID-19 kundi ang panunumbalik sa usapang pangkapayapaan.

Papayagan pa rin makapagreport sa trabaho at makapag-ikot sa buong Luzon ang mga miyembro ng media sa kasagsagan ng enhanced community quarantine.

Ito ang inihayag ni Inter-Agency Task Force (IATF) spokesperson at cabinet secretary karlo nograles sa kondisyon makapag-apply para sa ipalalabas na identification cards o i-d ng Presidential Communications Operations Office (PCOO).

Aniya, dapat isumite ang aplikasyon sa loob ng 72 oras o tatlong araw simula nang maipalabas ang memorandum hinggil sa enhanced community quarantine.

Kaugnay nito, sinabi ni Communications Secretary Martin Andanar na kanilang ipalalabas ang mga special media pass para sa mga journalist at iba pang empleyado sa media industry sa pamamagitan ng International Press Center.

Dagdag ni Andanar, habang hindi pa nila na ipalalabas ang mga id, kikilalanin pa rin ng pulisya at ibang law enforcement agency ang mga media id’s.

Ang tinig nina Cabinet Secretary Karlo Nograles at Communications Secretary Martin Andanar.

Superseded o natabunan na ang ipinatupad na curfew hours ng mga Local Government Units.

Ito ang inihayag ni Inter-Agency Task Force (IATF) Spokesperson at Cabinet Secretary Karlo Nograles matapos na ideklara ang enhanced community quarantine sa buong Luzon simula kaninang hating gabi.

Ayon kay Nograles, maituturing nang 24 hours-curfew ang enhanced community quarantine kung saan ang layunin ay manatili lamang ang lahat sa kani-kanilang mga tahanan.

Dagdag ni Nograles, limitado lamang ang paglabas sa bahay kung saan ang posible lamang puntahan ay ang mga piling establisyemento na nagbibigay ng mga pangunahing pangangailangan tulad ng pagkain at gamot.

Iginiit ni Nograles, iisang miyembro lamang ng pamilya ang maaaring lumabas ng bahay para dito.

Nananatiling suspendido ang klase sa lahat ng antas at mga aktibidad sa eskwelahan hanggang Abril 14.

Kasunod ito ng pagdedeklara ng enhanced community quarantine sa buong Luzon si Pangulong Rodrigo Duterte simula kaninang hating gabi hanggang hating gabi ng Abril 13.

Ayon kay Inter-Agency Task Force (IATF) Spokesperson at Cabinet Secretary Karlo Nograles, mahigpit na ipagbabawal din ang anumang klase ng mass gathering o pagtitipun-tipon.

Ipatutupad din aniya ang work from home arrangement sa lahat ng mga kawani na nasa ilalim ng ehekutibo maliban sa Philippine National Police(PNP), Armed Forces of the Philippines  (AFP), Philippine Coast Guard (PCG), mga health at emergency frontlines at iba pang kabilang sa mga kritikal na serbisyo.

Sa bahagi naman ng pribadong sektor sinabi ni Nograles, tanging ang mga establisyimentong may kaugnayan sa pagbibigay ng mga pangunahing pangangailan at serbisyo ang papayagang magbukas.

Kinakailangan ding matiyak ng pamunuan ng mga nabanggit na establisyimento na kanilang i-aadopt ang pagkakaroon ng skeletal workforce para makapagpatuloy sa operasyon.

Samantala, sinabi ni Nograles na papayagan ding magpatuloy sa operasyon ang mga bpo o business process outsourcing basta’t matiyak ang pagpapatupad ng social distancing measures sa kanilang mga empleyado.

Dapat din aniyang mabigyan ng mga nabanggit na industriya ang kanilang mga empleyado ng  pansamantalang matutuluyan at transportasyon.