Tigil operasyon ang lahat ng paliparan sa Luzon matapos ang 72 oras.
Ayon kay Transport Spokesperson Asec. Goddes Libiran, kaya maging Filipino na papaalis ng bansa o paparating ay hind na makakapasok sa Luzon.
Ani Libiran sa ngayon ay may oras pa para makapasok ang mga Filipino passenger na mula sa ibang bansa.
Papayagan naman ang mga Pinoy na may asawang dayuhan batay na rin sa inilabas na kautusan ng Malakaniyang.
Muling pinaalalahanan ng Philippine Coast Guard (PCG) ang mga passenger vessels kaugnay sa pinaiiral na “no sail policy” sa mga lugar na nasa ilalim ng community quarantine.
Ayon sa PCG maaari namang makapalakaya pa rin ang mga mangingisda sa legal na kaparaanan basta’t kailangan nilang sundin ang itinakdang health protocol and safety guidelines.
Gaya na lamang ng pagsalang ng mga tripulante sa thermal check-up para ma-check ang mga body temperature nito.
Ang makikitaan ng mga sintomas ng COVID-19 ay hindi maaaring tumuloy sa paglalayag o ibubukod sa restricted cabin.
Para naman sa mga maliliit na mangingisda, pinapayuhang kanselahin na lamang ang paglalayag kung hindi naman maganda ang nararamdaman o kung may sakit.
Hinikayat ng isang mambabatas ang pamahalaan na maglatag na ng food security plan kasunod ng ipinatupad na Luzon community quarantine.
Ayon kay Magsasaka Partylist Rep. Argel Cabatbat, maigi nang habang maaga pa ay makapagbalangkas na ang pamahalaan ng plano para matiyak ang food sufficiency sa rehiyon.
Sa ngayon aniya ay hindi pa gaanong ramdam ang epekto ng community quarantine pagdating sa kabuhayan ng marami ngunit hindi umano magtatagal ay ramdam na ito ng mamamayan.
P100-milyon ang inihanda ng SM Group bilang tulong sa mga ospital ng pamahalaan sa harap ng coronavirus disease 2019 (COVID-19) outbreak.
Ayon sa anunsyo ng SM Group ang naturang halaga ay ipagkakaloob sa Philippine General Hospital (PGH) at Research Institute for Tropical Management (RITM).
Nakipag-ugnayan na rin ng SM Group sa Manila HealthTek Inc. upang mamahagi ng 20,000 test kits ng libre sa mga ospital ng gobyerno sa sandaling maaprubahan ito.
Panibagong 21 kaso ng COVID-19 ang naitala sa mainland China.
Dahil dito umakyat na sa 80,881 ang kumpirmadong kaso.
Umabot naman sa 3,226 ang nasawi na dahil sa COVID-19 sa nasabing bansa.
12 dito ay mula sa Hubei Province na sinasabing pinagmulan sakit.
Itinututuring na ngayon na person under monitoring (PUM) si Presidential Son Davao City Vice Mayor Sebastian “Baste” Duterte.
Ayon sa kaniyang kapatid na si Davao City Mayor Sara Duterte, nakitaan kasi si Baste ng sintomas ng pagkakaroon ng COVID-19.
Nakakaranas aniya ngayon si Baste ng lagnat, ubo at sore throat kaya’t sa ngayon ay naka home quarantine umano ito.
Apat na linggo ang nakaraan nasa Maynila umano si Baste.
Tigil operasyon muna ang Grabcar, Grabfood, Grabexpress at Grabtrike sa buong Luzon simula ngayong araw.
Ito’y kasunod ng pagsasailalim sa enchanced community quarantine ni Pangulong Rodrigo Duterte sa buong Luzon dahil sa COVID-19.
Ayon sa Grab, magtatagal ang kanilang tigil operasyon hanggang sa susunod na abiso.
Kasabay nito tiniyak ng Grab na kaisa sila ng pamahalaan para malabanan ang pagkalat ng COVID-19.
Tuloy pa rin ang pag-akyat ng bilang ng mga nasawi dahil sa COVID-19 sa Italy.
Sa ngayon ay pumalo na ito sa 2,158.
Umabot naman na sa 27,980 kaso ng COVID-19 sa Italya mahigit 3,000 dito ang bagong kaso.
Samantala mayroon namang 14,991 na kaso sa iran at 853 ang nasawi.
Nasa 9,942 naman ang kaso sa Spain habang 342 ang nasawi.
Nasa 8,236 naman ang kaso sa South Korea at nananatiling 75 ang bilang ng nasawi.
Hinikayat ng Department of Labor and Employment (DOLE) ang mga malalaking kumpanya na bayaran pa rin ang kanilang mga empleyado sa gitna ng pagpapatupad ng enchanced community quarantine sa buong Luzon sa loob ng isang buwan.
Ayon kay Labor Sec. Silvestre Bello III, maging si Pangulong Rodrigo Duterte ay umapela na sa ibang kumpanya na paagahin na ang pagbibigay ng 13th month pay upang makatulong sa mga manggagawang maapektuhan ng community quarantine dahil sa COVID-19.
Hirit ni Bello, sana ay makatanggap pa rin ng pang isang buwang sahod ang mga empleyado sa ilalim ng kumpanya nila Sy, Ty at Gokongwei.
Samantala, sinabi ni Bello na maaari namang tumulong sa gobyerno ang mga displaced worker sa pagdi-disinfect ng mga building sa ilalim ng emergency jobs program.
Nahirapan sa pagsakay ang ilang pasahero Commonwealth Avenue Quezon City bunsod ng enchanced community quarantine sa buong Luzon para labanan ang COVID-19.
Kahit maaga pa lamang ay nasa kalsada na ang mga pasahero, bigo pa rin silang makasakay agad dahil iilan lamang ang mga sasakyan na bumabyahe.
Sa ilalim ng enchanced community quarantine suspendido ang pampublikong transportasyon.
Dahil dito hindi na rin nasunod sa mga jeep ang ipinatupad na social distancing para maiwasan ang pagkalat ng sakit.