DWIZ 882

Pinabibigyang prayoridad ni Sen. Christopher Bong Go sa Department of Social Welfare and Development (DSWD) ang kapakanan ng mga Senior Citizen.

Ayon kay Go, higit na delikado para sa mga matatanda ang coronavirus disease (COVID-19) lalo na sa mga may pre-existing medical conditions gaya ng may diabetes, hypertension, sakit sa baga, sakit sa puso at kanser.

Giit ni Go ang mga ito ang dapat na hinahatiran o door to door delivery ang mga tulong na kanilang kinakailangan upang maiwasan ang kanilang paglabas ng bahay.

Bukod sa mga Senior Citizen, dapat din bigyan ng pansin ng DSWD ang mga solo parent, indigenous people, public transport drivers at iba pang mga manggawang apektado ng enhanced community quarantine sa buong Luzon.

Pinatitiyak ng Trade Union Congress of the Philippines (TUCP) ang buong suporta para sa mga frontline personnel.

Ayon kay TUCP Rep. Democrito Mendoza, dapat ay bigyang prayoridad at alagaan ang mga frontliners dahil ngayong panahon na ito ay kailangan na kailangan ang kanilang serbisyo.

Giit ni Mendoza, mahalagang mabigayan ang mga frontliners ng personal protective equipment, wastong sanitization protocol sa lugar ng trabaho at nagagawa ang social distancing.

Pinaalala rin ni mendoza ang kinakailangang transportasyon ng mga ito para makapasok sa trabaho.

Nababagalan si Sen. Nancy Binay sa aksyon na ginagawa ng National Food Authority (NFA) para makabahagi ngayong umiiral ang enhanced community quarantine sa buong Luzon.

Ayon kay Binay, dapat ay tutukan ng NFA ang mabilis na pamamahagi ng mga bigas sa mga tao.

Giit ng Senadora hindi ito bakasyon kundi giyera kaya’t kailangan ng mabilis na pagtugon ng mga kinauukulang ahensya ng gobyerno.

Dagdag pa ni Binay, may direktiba naman sa NFA at iba pang ahensya ng gobyerno para tiyakin ang sapat na suplay ng pagkain gayundin ang pamamahagi ng relief operations.

Nanawagan si Sen. Panfilo Lacson sa publiko na makiisa ang lahat sa mga panuntunang inilatag ng pamahalaan para labanan ang coronavirus disease (COVID-19).

Ayon kay Lacson, sa panahon ngayon ay kailangan ang pagkakaisa at pagsuporta sa mga hakbang na ipinatutupad ng pamahalaan para sa ikabubuti ng marami.

Kasabay nito umapela rin si Lacson sa mga opisyal ng gobyerno na huwag gamitin ang sitwasyon at kapangyarihan para makakupit sa pondo na kailangang ilaan para tugunan ang pangangailangan ng publiko.

Giit ni Lacson dapat ay gawin ng lahat ang parte upang magtagumpay ang bansa sa paglaban sa COVID-19.

Inaasahang madadagdagan pa ang test kits para sa coronavirus disease (COVID-19).

Ayon kay Cabinet Secretary Karlo Nograles, dahil sa pagdating ng mga karagdagang screening kit, maaaring mabago pa ang mga panuntunan sa pagsasagawa ng test para sa sakit.

Ani Nograles, sa kasalukuyan ay nasa 1,000 COVID-19 testing kits ang nakalaan na para sa mga pasyente na under monitoring na nagpapakita na ng sintomas ng sakit.

Ipauubaya na umano nila sa DOH kung anong maaaring pinakamagandang procedure na gawin para sa mga darating pang testing kits.

Ang naturang mga parating na testing kits umano ay pawang donasyon at binili ng pamahalaan.