DWIZ 882

Magko-convene sa isang special session ang Senado sa susunod na linggo.

Ito ang kinumpirma mismo ni Senate President Vicente Sotto III, upang mapag-usapan ang hiling pamahalaan  ni Pangulong Rodrigo Duterte na P1.6-B na supplemantal budget para malabanan ang coronavirus disease 2019 (COVID-19).

Ayon kay Sotto, halos lahat ng Senador ang nangakong magiging “physical present” sa special session sa kabila ng umiiral na enhanced community quarantine sa buong Luzon.

Sinabi ni Sotto, posibleng ganapin ang special session sa lunes pero kanyang susubukang mapaaga ito at gawin sa sabado para makahabol sa target ng pangulo na maipalabas ang pondo sa susunod na miyerkules.

Muling pinulong ni Pangulong Rodrigo Duterte ang mga opisyal na mieymbro ng Inter-Agency Task Force for the Management 0f Emerging Infectious Diseases (IATF-EID) sa Malakanyang, kagabi.

Batay sa ipinalabas na larawan ng official Facebook page ng presidential communications, kasama ng pangulo sa pulong sina Senador Christopher Bong Go, Executive Secretary Salvador Medialdea, Cabinet Secretary Karlo Nograles.

Gayundin sina Interior Secretary Eduardo Año, Defense Secretary Delfin Lorenzana at PNP Chief General Archie Gamboa.

Gayunman, wala pang ipinalalabas na detalye hinggil sa usapin na natalakay sa nabanggit na pulong.

Una nang nanawagan si Pangulong Duterte ng isang special session sa Kongreso.

Inatasan ni Pangulong Rodrigo Duterte ang mga Local Government Units (LGU)’s na sundin ang mga polisiya ng national government.

Ito ay kaugnay ng ipinalabas na guidelines ng Inter-Agency Task Force for the Management of Emerging Infectious Disease(IATF-EID) hinggil sa pagpapatupad ng enhanced community quarantine sa buong Luzon.

Ayon kay Pangulong Duterte, maituturing na pag-abuso sa kapangyarihan ng mga lokal na pamahalaan ang hindi pagsunod sa itinakdang panuntunan ng IATF.

Partikular aniya rito ang restriction o pagpigil sa paggalaw ng anumang klase ng kargamento sa nasasakupan ng bawat LGU’s.

Iginiit ng Pangulo, hindi maipatutupad ng mga lokal na pamahalaan ang kani-kanilang community quarantine kung hindi rin ito ipinag-utos ng national government.

Pinababantayan ni Pangulong Rodrigo Duterte sa Department Of Interior and Local Government (DILG) at Department of Justice  (DOJ) ang mga Local Government Units (LGU)’s.

Ito ay upang matiyak na nakasusunod ang mga ito sa ipinalabas na direktiba hinggil sa enhanced community quarantine.

Ayon kay Pangulong Duterte, makabubuti kung ang mga tinatahak na aksyon ng LGU’s ay alinsunod sa ipinalabas na guidelines ng Inter-Agency Task Force for the Management of Emerging Infectious Diseases at Office of the President.

Inatasan din ni Pangulong Duterte ang DILG at DOJ na sampahan ng mga kinakaukulang kaso ang mga susuway na mga LGU’s.

Tutulungan ng pamahalaan ang mga naistranded dahil sa suspensyon ng mass public transport gayundin ang mga walang mauwian sa gitna ng ipinatutupad na enhanced community quarantine.

Ito ang ipinangako ni Pangulong Rodrigo Duterte sa kanyang muling naging pagharap sa publiko para magbigay ng direktiba sa mga Local Government Units(LGU).

Ayon kay Pangulong Duterte, kanyang hihilingin sa Armed Forces of the Philippines (AFP) at Philippine National Police (PNP) na tulungan ang lahat ng mga na-istranded.

Aniya, maaaring magtungo sa mga kampo ng militar at pulisya sa iba’t ibang bahagi ng bansa para humingi ng matutuluyan at makakain.

Nagpatawag ng special session sa Kongreso si Pangulong Rodrigo Duterte.

Ito ay para sa agarang pagpasa ng kinakailangang supplemental budget ng pamahalaan upang mapigil ang malawakang pagkalat at matugunan ang epekto ng coronavisus disease 2019 (COVID-19) sa bansa.

Ayon kay Senador Christopher Bong Go, kapwa nagpahayag ng kahandaan sina Senate Presidente Vicente Sotto at House Speaker Alan Peter Cayetano para sa special session ng dalawang kapulungan ng Kongreso.

Posible aniyang gawin ito sa bukas o sa lunes ng susunod na linggo.

Dagdag ni Go, prayoridad ng mga mambabatas ang matiyak na makapagpapalabas ng karagdagang pondo para sa pangangailangang pangkalusugan, tulong pinansiyal at pagkain para sa lahat ng mga Pilipino lalu na ang maliliit na sektor.

Pansamantalang inihinto ng Iglesia ni Cristo ang regular na pagsamba sa kanilang mga kapilya.

Ito ay bilang pagtalima sa kautusan para sa enhanced community quarantine dahil sa coronavisus disease 2019 (COVID-19).

Gayunman, hinihimok ang mga miyembro ng Iglesia ni Cristo na magsagawa ng panalangin sa kani-kanilang mga tahanan.

Nagpadala rin ng aral ang taga pamahala ng Iglesia ni Cristo na babasahin ng pinuno ng bawat sambahayan tuwing huwebes at linggo kasabay ng karaniwang araw ng kanilang pagsamba.