DWIZ 882

Walang planong mag self-quarantine ang Pangulong Rodrigo Duterte.

Pahayag ito ni Senador Bong Go matapos mapaulat na naka self-quarantine si Health Secretary Francisco Duque III na laging kausap ng presidente.

Ayon kay Go, minomonitor naman ng mga doktor ang pangulo.

Tuloy anya ang pangulo sa pulong sa Inter Agency Task Force on coronavirus disease 2019 (COVID-19) ngayong hapon.

Iminungkahi ni Quezon City Representative Alfred Vargas sa gobyerno na gamitin ang calamity fund sa ilalim ng 2021 Internal Revenue Allotment (IRA).

Ito aniya ay upang matugunan ang pangangalaingan ng bawat local government units (LGUs) sa gitna ng banta ng coronavirus diease 2019 (COVID-19) sa bansa.

Ayon kay Vargas, dati nang ginawa sa panahon ni dating Pangulong Gloria Macapagal Arroyo ang pauna nang paggamit ng IRA na nakatakda pa sana para sa susunod na taon.

Paliwanag pa nito, maaaring gamitin ng LGU ang 5% bahagi ng calamity fund sa IRA makaraang isailalim sa state of calamity ang Pilipinas, salig na rin ng Section 21 ng Republic Act 10121 na lumilikha sa National Disaster Risk Reduction Management Council (NDRRMC).

Malaking tulong aniya kung magagamit ang bahagi ng naturang pondo bilang tugon sa pangangailangang medikal para mapigilan ang pagkalat ng virus.

Makatatanggap ng ayuda mula sa Department of Labor and Employment (DOLE) ang mga informal workers sa Metro Manila na apektado ng umiiral na enhanced community quarantine.

Ayon kay Labor Secretary Silvestre Bello III, bibigyan nila ng pansamantalang trabaho ang mga naturang manggagawa, partikular ang mga jeepney at tricycle drivers at mga side-walk vendors sa Metro Manila.

Ang ahensya na rin aniya ang bahalang magpa-sweldo sa mga ito.

P5,000 aniya ang ipagkakaloob nila sa bawat manggagawa kada buwan o habang umiiral ang isang buwang enhanced community quarantine.

Samantala, inilalatag na rin, ani Bello, ang ayuda para naman sa mga manggagawa na nasa probinsya.

Binalaan ng Department of Interior and Local Government (DILG) ang mga barangay captains na magpapabaya sa pagpapatupad ng mga panuntunan sa enhanced community quarantine.

Sinita ni DILG Undersecretary Jonathan Malaya ang mga barangay captains na mas marami pang oras sa social media kesa asikasuhin ang kanilang constituents na wala nang makain.

Hindi anya sila mangingiming kasuhan ang mga pabayang barangay captains sa sandaling matapos ang kinakaharap na krisis ng bansa.

Sa ngayon anya ay dapat kasado na ang mga food packs para sa mga barangay lalo na sa mga lugar kung saan marami ang mahihirap.

Batay sa panuntunang inilatag ng DILG, gagamitin ng LGU’s ang kanilang quick response fund para sa pagkain ng mga mahihirap nilang constituents sa unang linggo ng lockdown.

Samantala, sisimulan naman ng Department of Social Welfare and Development (DSWD) ang pamamahagi ng food provisions simula sa susunod na linggo.

Naka self quarantine si Health Secretary Francisco Duque III simula pa ng Miyerkules.

Ayon kay Duque, sumailalim na sya sa coronavirus disease 2019 (COVID-19) testing subalit malalaman pa ang resulta sa susunod na dalawa hanggang tatlong araw.

Sinabi ni Duque na wala naman syang senyales na na impeksyon na sya ng COVID-19.

Tiniyak ni Duque na tuloy-tuloy ang kanyang trabaho mula sa kanyang tahanan.

Tiniyak ng Department of Energy ang 24/7 na suplay ng kuryente sa panahon ng enhanced community quarantine.

Ayon kay Energy Secretary Alfonso Cusi, sa ngayon ay bumagsak ng 30% ang demand ng elektrisidad sa Luzon dahil sarado ang maraming negosyo.

Gayunman, asahan naman anya ang pagkabalam ng mga proyektong para sa enerhiya dahil bawal pang bumiyahe ang mga foreign contractors at manggagawa dahil sa quarantine.

Maliban dito, asahan na rin anya ang delay sa delivery ng mga imported na spare parts at iba pang gamit sa konstruksyon ng energy facilities.