DWIZ 882

Aabot sa P145-bilyon ang tinatayang mawawala sa koleksyon sa buwis ng pamahalaan.

Ayon sa Bureau of Internal Revenue (BIR), epekto ito ng isang buwang extension na ibinigay nila sa paghahain ng annual income tax return.

Dahil dito, posible umanong dagdagan ng pamahalaan ang pangungutang nito upang punan ang kakulangan sa koleksyon ng buwis.

Umapela ang BIR sa mga nakapagsimula na sa proseso ng pagbabayad ng buwis na ipagpatuloy lamang ito sa pamamagitan ng mga mekanismo na maaaring magamit tulad ng online filing at ibat ibang payment platforms.

Pinalawig ng Bureau of Internal Revenue (BIR) ang deadline sa paghahain ng annual income tax return (ITR).

Sa halip na April 15 deadline, naglaan pa ng isang buwan o hanggang May 15 ang BIR para sa mga hindi pa nakapaghahain ng kanilang ITR.

Sa Revenue Memorandum Circular (RMC) na inilabas ng BIR ngayong March 18, 2020, nakasaad na walang babayarang multa ang tax payers kung makapaghahain sila ng ITR hanggang May 15.

Pinagbigyan ng BIR ang apela sa extension ng deadline sa harap ng umiiral na enhanced community quarantine sa buong Luzon.

Ibinaba na ng Philippine Institute of Volcanology and Seismology (PHIVOLCS) ang status ng bulkang Taal sa Alert Level 1 ngayong Huwebes ng umaga.

Sa bulletin na ipinalabas ng PHIVOLCS, sinabi nito na nanatiling mababa ang mga aktibidad ng bulkang Taal sa nakalipas na 4 na linggo.

Anito, nasa low-level na ang volcanic earthquake activity ng Taal, maging ang mga aktibidad sa Main Crater ay nananatiling kalmado.

Gayunpaman ayon sa PHIVOLCS, asahan pa rin ang biglaang pagbuga ng steam, volcanic earthquakes, minor ashfalls, at paglalabas ng volcanic gas na maaaring makaapekto sa mga kalapit na lugar.

Nananatili naman ang pagbabawal sa pagpasok ng sinuman sa Taal Volcano Island na tinagurang Permanent Danger Zone.

Inaasahang babagal ng 5% ang paglago sa ekonomiya ng bansa sa unang kalati ng taon.

Ito ay bunsod ng ipinatutupad na enhanced community quarantine sa buong Luzon dahil sa coronavirus disease 2019 (COVID-19).

Ayon kay Union Bank of The Philippines Chief Economist Carlo Asuncion, 36% ng Gross Domestic Product (GDP) ng bansa ay mula sa Metro Manila.

Habang 73% naman ng GDP ay binubuo ng Luzon.

Binigyang diin naman ni Asuncion, kinakailangang matiyak ang walang tigil na paggalaw ng mga produkto at tao sa ibang rehiyon sa bansa para sa patuloy na pagtakbo ng ekonomiya ng bansa.

Nagdeklara na ng Suspension of Offensive Police Operation (SOPO) ang Philippine National Police (PNP) laban sa Communist Party of The Philippines (CPP) at New People’s Army (NPA).

Ayon kay PNP Chief Police General Archie Gamboa, alinsunod ito sa idineklarang unilateral ceasefire ni Pangulong Rodrigo Duterte sa mga rebelde.

Epektibo aniya ang sopo kaninang alas dose ng hating gabi, Marso 19 at tatagal hanggang Abril 15.

Kasunod nito, sinabi ni Gamboa na inilagay na nila sa defensive posture, disaster response at public safety mode ang lahat ng National, Regional, Provincial at District Police Maneuver Unit na bahagi ng internal security operations.

Aniya, gagamitin aniya ang mga nabanggit na police unit para umalalay sa pagpapatupad ng enhanced community quarantine.

Gayunman, inatasan pa rin ni Gamboa ang pulisya na manatiling nakaalerto laban sa mga posibleng pag-atake ng mga rebelde at iba pang armadong grupo.

Nagpahayag ng pag-aalinlangan ang komunistang grupo sa idineklarang tigil putukan ni Pangulong Rodrigo Duterte habang nahaharap sa problema sa coronavirus disease 2019 (COVID-19) ang bansa.

Ayon kay National Democratic Front Chief Political Consultant At Communist Party Of The Philippines founding Chairman Jose Maria Sison, isa kanilang pinagdududahan ay ang ipinatutupad na enhanced community quarantine sa buong Luzon.

Sinabi ni Sison, hindi paglaban sa COVID-19 ang layunin ng paglalagay ng military lockdown sa Luzon.

Kundi ang magtanim aniya ng takot sa mga tao, hadlangan ang karapatan sa kalayaan, labagin ang karapatang pantao at pigilan ang mga tao sa paghahanapbuhay.

Iginiit ni Sison, patuloy pa rin ang AFP at PNP sa kanilang mga gawain tulad ng redtagging, pagdukot at pagpatay sa mga aktibista at pag-atake sa guerilla front ng New People’s Army (NPA).

Dagdag ni Sison, bagama’t nagpapatuloy ang pag-uusap sa pagitan ng government peace panel at NDFP, wala naman aniyang napagkasunduan hingil sa pagdedeklara rin ng tigil putukan ng mga komunistang grupo bilang konsiderasyon sa sitwasyon.

Hindi tinanggap ng Inter-Agency Task Force (IATF) ang paki-usap ni Pasig City Mayor Vico Sotto na pansamantalang payagan ang pagbiyahe ng mga tricycles sa gitna ng suspensyon sa mass public transport bunsod ng enchanced community quarantine sa buong Luzon.

Ayon kay IATF Spokesperson at Cabinet Secretary Karlo Nograles, ikinababahala nila sa paggamit ng mga tricycles ay ang kawalan ng social distancing sa mga mananakay at driver nito.

Sinabi ni Nograles, maaaring gumamit o humiram ng ibang klase ng sasakyan ang mga Local Government Unit (LGU)’s maliban sa mga tricycle.

Iginiit ng kalihim, hindi ligtas sa mga health workers at frontliners ang pagsakay sa tricycle dahil nagiging lantad din sila sa coronavirus disease 2019 (COVID-19) dahil sa kawalan ng social distancing dito.