DWIZ 882

Pinapurihan ni Pangulong Rodrigo Duterte ang mga ipinagkaloob na tulong ng ilang mga pribadong kumpanya at indibiduwal sa gitna ng kinahaharap na krisis ng bansa dahil sa coronavirus disease 2019 (COVID-19).

Ito ang ipinabatid ng pangulo sa pamamagitan ng isinagawang pulong balitaan ng Inter-Agency Task Force For The Management of Emerging Infectious Diseases (IATF-EID)  kagabi.

Ayon kay IATF Spokesperson at Cabinet Secretary Karlo Nograles, sinabi ng Pangulo na ipinakikta ng mga nabanggit na indibiduwal at organisasyon ang tunay na kahulugan ng bayanihan para masugpo ang nararanasang problema ng bansa.

Kaugnay nito, nananawagan aniya si pangulong duterte na sundan ang naging hakbang ng mga nabanggit na indibiduwal at organisasyon at gampan ang bahagi ng bawa’t isa sa lipunan.

Sinabi ni Nograles, magagawa ito sa pamamagitan ng pananatili lamang sa mga tahanan at pagsunod sa mga awtoridad.

Hinimok ng Inter-Agency Task Force for the Management of Emerging Infectious Diseases (IATF-EID) ang publiko na isumbong sa mga kinauukulan ang mga mananamantala sa panahon ng state of calamity dahil sa coronavirus disease 2019 (COVID-19).

Ayon kay IATF spokesperson at Cabinet Secretary Karlo Nograles, ipinatutupad ang price freeze o price control para matiyak ang abot kayang presyo ng mga pangunahing bilihin sa gitna ng krisis.

Gayundin ang matiyak na walang sinuman o anumang kumpanya ang mananamantala sa kasalukuyang sitwasyon ng bansa.

Dagdag ni nograles, maaaring i-report o ireklamo sa hotline 1384 o email consumercare@DTI.gov.ph ang lahat ng mga abusadong indibiduwal o negosyo.

Nanawagan din si Nograles ng pakikisa sa lahat ng mga Filipino.

Epektibo na hanggang Mayo 15 ng kasalukuyang taon o sa loob ng 60 araw ang ipinatutupad na price freeze para sa mga pangunahing bilihin sa bansa.

Ito ang inihayag ni Trade and Industry Secretary Ramon Lopez kasunod ng deklarasyon ng state of public health emergency ng Pangulo noong Marso 8 at state of calamity sa buong bansa nitong Marso 16.

Sa ilalim aniya ng joint memorandum circular ng Department of Trade and Industry (DTI), Department of Agriculture (DA) at department of Health (DOH), sakop ng prize freeze lahat ng mga ibinebentang basic commodities maging sa online.

Dagdag ni Lopez, magkakaroon din ng composite team ang tatlong nabanggit na ahensiya para mas mapaigting ang pagbabantay laban sa over pricing at matiyak na nasusunod ang price ceiling sa mga pangunahing produkto o pangangailan.

Maaari din aniyang irekomenda ng mga nabanggit na ahensiya ang pagpapalawig ng price freeze sakaling tumagal pa ang maging epekto ng corona virus disease 2019 (COVID-19)sa bansa.

Binalaan rin ni Lopez ang lahat ng mga indibiduwal o korporasyon na lalabag sa price act.

Nagpalabas ng Suggested Retail Price (SRP) para sa ilang mga pangunahing produktong agrikultural ang Department Of Agriculture (DA).

Kasunod na rin ito ng pagsasailalim sa state of calamity ng buong bansa.

Ayon kay Agriculture Secretary William Dar, alinsunod sa kanilang ipinalabas na circular noong Pebrero 20, itinatakda ang presyo ng mga sumusunod na produkto:

     karne ng baboy (pigue o kasim) – P190.00 per kilo

     manok (whole, dressed) –P130.00 per kilo

     asukal (brown) – P45.00 per kilo

     asukal (puti) – P50.00 per kilo

     bangus – P162.00 per kilo

     tilapia – P120.00 per kilo

     galunggong (imported) – P130.00 per kilo

     bawang (imported) – P70.00 per kilo

     bawang (local) – P120.00 per kilo

     pulang sibuyas – P95.00 per kilo

Kasabay nito, tiniyak ni Dar na mahigpit nilang babantayan kung naipatutupad ang mga nabanggit na srp bilang bahagi na rin ng umiiral na price freeze.

Ipinauubaya ng Department of Transportation (DOTr) sa mga pribadong kumpanya na maituturing na nasa essential sector ang pagbibigay ng transporatsyon sa kani-kanilang mga papasok na empleyado.

Ito ay sa gitna na rin ng suspensyon sa mass public transport kasunod ng pagpapatupad ng enhanced community quarantine sa buong Luzon.

Ayon kay Transportation Undersecretary Artemio Tuazon, walang ilalaang shuttle service ang ahensiya para sa mga empleyado mula sa pribado pero maituturing na mahahalagang kumpanya tulad sa bangko, grocery, guwardya at iba pa.

Sinabi ni Tuazon, napag-usapan na aniyang ang mga pribadong korporasyon ang mabibigay at hahanap ng transportasyon para sa kani-kanilang mga empleyado lalu’t may umiiral na pulisya para sa strict home quarantine.

Binigyang diin ng opisyal, tanging mga emergency at healthcare workers ang kanilang bibigyan ng libreng shuttle service.

BASAHIN: Pansamantala munang hahalili sa DWIZ 882 (Official Facebook Page ng DWIZ 882 kHZ AM Station) ang Dwiz Todong Lakas (Facebook account) sa paghahatid ng balita, anunsyo, at live streaming ng mga programa ng himpilan.

Walang dapat ipagkabahala ang publiko sa suplay ng isda sa merkado sa Metro Manila at mga karatig lalawigan sa Luzon.

Iyan ang pagtitiyak ni Atty. Glen A. Pangapalan, General Manager ng Philippine Fisheries Development Authority, na nasa ilalim ng Department of Agriculture (DA).

Ayon kay Atty. Pangapalan, mula nang ianunsiyo ni Pangulong Rodrigo Duterte ang Enhanced Community Quarantine sa buong Luzon, agad silang naglatag ng panuntunan para hindi maantala ang pagbiyahe ng mga produktong isda palabas ng Navotas Fish Port.

Hindi sila (biyahero) maaring pigilan dahil nag-isyu na rin ang DA ng conduct pass para sa may mga kargang isda at iba pang agricultural products,” ani Pangapalan.

Sa katunayan, inanunsyo kahapon, Marso 17, ni Agriculture Secretary William Dar na magkakaroon ng designated food lane para sa mga bumibiyahe ng isda, gulay, prutas at karne.

Maglalagay din kami ng stickers sa mga delivery trucks para agad silang ma-recognized sa checkpoints,” ani Pangapalan.

Bilang kami po ang nangangasiwa sa mga fish ports, tuloy po ang operasyon natin sa harap ng banta ng COVID-19, kailangan lamang sumunod ang ating mga biyahero sa procedure na ating ipinatutupad sa gitna nitong enhanced community qurantine,” dagdag pa ng opisyal.

Business as usual tayo subalit kami po ay mag-imposed ng iskriktong safety measures, kung mai-screen man kayo, o sa mga bisita sa fish port ay wag po kayong magagalit, ipatutupad lang po natin ang kaayusan sa lahat,” dagdag pa nito.

Samantala, tiniyak naman ng opisyal na walang hoarding ng isda o pagkaing dagat dahil sapat ang suplay ng mga ito kaya’t walang dahilan para magtaas ng presyo ang mga whole seller dahil may price list ding nakapaskil sa Navotas Fish Port bilang gabay.

Samantala, sa panig naman ng Lokal na Pamahalaan ng Navotas City, sinabi ni Mayor Tobby Tiangco na nag-usap na sila ni GM Pangapalan hinggil sa protocol na dapat ipatupad sa Navotas Fish Port.

Kasama aniya sa kinausap nila ay ang Navotas Fish Port Authority para masiguro na tuloy-tuloy ang operasyon nito at para hindi maapektuhan ang suplay ng isda sa buong Luzon.

Dapat naka-white boots, white shirt at masks ang ating mga mangangalakal diyan sa Navotas Fish port, kailangan din siyempre suriin ang kanilang temperature,”  ani Mayor Tiangco.

Kahit po tayo ay naka-lockdown sa buong Luzon ay hindi po pupuwedeng hindi mag-operate ang fish port, alalahanin po natin na ang main source ng isda sa Luzon ay diyan nanggagaling sa Navotas Fish Port,” dagdag pa ng alkalde.

Nilinaw din ni Tiangco, na sa panahong ito ay mas higit na kailangan ang tuloy-tuloy na operasyon ng Navotas Fish port para hindi maapektuhan ang presyuhan ng isda sa Merkado.

Pagtitiyak din nito na may regular price monitoring silang ipinatutupad para hindi samantalahin ng mga negosyante ang kasalukuyang sitwasyon sa Metro Manila at buong Luzon.