DWIZ 882

Nakarating na ang patrol vessel ng Philippine Coast Guard (PCG) na may dalang relief supplies para sa Central Visayas.

Ayon sa PCG, ang BRP Tubbataha (MRRV-4401) ay naglalaman ng 270 na sako ng bigas, 37 piraso na tarpaulin, 4 na drum ng gasolina, 4 na solar sets, 2 generator sets at kahun-kahong mga delata at noodles

Base sa datos ng PCG sila ay nakapag rescue ng 1,032 na mamamayan sa kabuuan at nakapagpalikas ng tinatayang nasa 12,000 na indibidwal sa Northeastern Mindanao, Northern Mindanao, Central Visayas, Western Visayas, Eastern Visayas, at Palawan.

Ipinahayag na rin ang mga otoridad na ligtas naman ang lahat ng mga International tourists sa Siargao Island na naipit sa kasagsagan ng bagyong Odette. —sa panulat ni Mara Valle

Hinimok ng Department of Science and Technology (DOST) at United Architects of the Philippines (UAP) ang mga LGU’s na tiyaking kayang makipagsabayan sa extreme weather conditions ang mga itatayong istruktura sa bansa.

Ayon kay DOST USec. Renato Solidum, base sa datos ng PAGASA ay iinit pa ang temperatura sa buong mundo at maging sa Pilipinas.

Dagdag pa niya, ang mga bagyo ay hindi dadami, ngunit tataas and intensity ng mga bagyo at hangin.

Giit ng UAP, hindi naman umano ganon kamahal ang bayad sa serbisyo ng mga arkitekto at kumpiyansa sila na tiyak makakatulong ang pag iinvest dito upang mabawasan ang suliraning kakaharapin ng mga mamamayan sakaling magkaroon ng sakuna tulad ng mga bagyo.

Kasabay nito, sinabi ng UAP na handa silang tumulong sa mga apektadong LGU’s sa pamamagitan ng kanilang 200 chapters sa buong bansa. —sa panulat ni Mara Valle

Nasawi ang mag-iina sa bayan ng Ubay, sa Bohol matapos gumuho ang bodega na kanilang sinulungan sa kasagsagan ng bagyong Odette.

Batay sa kuwento ng Padre de pamilya, nagpasya sila na lumipat sa katabing bodega sa pag-aakalang kakayanin nito ang hagupit ng bagyo matapos mawasak ang kanilang bahay na nasa bukid.

Kinilala ang mga biktima na si Tarcila Ramos, at dalawa pa nitong anak na babae habang sugatan naman ang asawa nito at dalawa pa nilang anak.

Ayon kay Bohol Governor Arthur Yap, nasa 80 na ang nasawi sa lalawigan, 13 ang nawawala at 78 ang sugatan dahil sa nagdaang bagyo. —sa panulat ni Mara Valle

Nananawagan ang private education sectors sa Department of Education (DEPED), kaugnay sa pagpapahintulot ng face-to-face classes.

Ayon kay Joseph Noel Estrada, Managing Director ng Coordinating Council of Private Educational Associations of the Philippines (COCOPEA), kinakailangan nang maibalik ang in-person classes upang muling sumigla at makabangon mula sa mga nawalang kita ang mga pribadong paaralan.

Humihingi rin ng suporta ang COCOPEA mula sa Commission on Higher Education (CHED) para sa unti-unting pagbabalik sa paaralan ng Higher Education Institutions (HEI’s).

Dagdag pa ni Estrada, patuloy na naghahanda ang mga Private Education Institutions para sa expanded phase ng physical classes alinsunod sa guidelines na itinakda ng   DEPED, Department of Health at ng IATF sa pamamagitan ng school safety assessment tool. —sa panulat ni Mara Valle 

Naipamahagi na ng Department of Social Welfare and Development (DSWD) sa mga lokal na pamahalaan ang nasa mahigit Php 14.5-M halaga ng ayuda para sa mga nasalanta ng bagyo.

Ayon kay DSWD Spokesman Dir. Irene Dumlao, ito ay bilang tugon sa mga nasalanta ng bagyong Odette kasabay ng pamamahagi ng mga food packs sa Regions 10, 11 at 12 maging ang Western Visayas, Eastern Visayas at MIMAROPA.

Samantala, makakatanggap din ng tig-limang-libong pisong food packs ang Dinagat Islands at Siargao. —sa panulat ni Angelica Doctolero

Inihayag ng Department of Health (DOH) na aabot sa 100 mga vial ng Pfizer-Biontech COVID-19 vaccine ang nag-expire matapos tamaan ng bagyong Odette ang Region 6.

Ayon kay Health Undersecretary Myrna Cabotaje, ang mga bakuna ay nasira dahil kaya lamang nitong tumagal ng 30 araw sa ilalim ng temperatura na 2 hanggang 8°C kung saan, hindi agad ito na-administer dahil sa kakulangan ng mga vaccinators.

Bukod pa dito, naantala din ang ikalawang bugso ng Bayanihan, Bakunahan sa ilang lugar na naapektuhan ng bagyong Odette.

Matatandaan ding nawalan ng kuryente sa Visayas at Mindanao matapos magbagsakan ang mga poste dahil sa malakas na hangin.

Sa kabila nito, naniniwala parin ang pamahalaan na maaabot ang target 54M na pagbabakuna sa buong bansa. —sa panulat ni Angelica Doctolero