DWIZ 882

Inaasahan ng  gobyerno na malaki ang maitutulong ng Janssen Vaccine upang mapabilis o mapataas ang bilang ng mga naturukan kontra COVID-19.

Ayon kay Health Undersecretary Myrna Cabotaje, mas mabilis na makakamit ng pamahalaan ang 54-M target na fully vaccinated na Pilipino sa tulong ng one dose Janssen Vaccine.

Matatandaang bigong naabot ng gobyerno ang 7-M target sa pagbabakuna na isinagawa ng gobyerno mula December 15 hanggang 17 sa mga lugar na hindi naapektuhan ng bagyong Odette.

Sa ngayon, nakabalik na ang vaccination activities sa mga lugar na sinalanta ng bagyo kabilang na ang Region 5, Region 4b, Region 6, 7, 8 at CARAGA. —sa panulat ni Angelica Doctolero

Aabot sa 15,000 individuals ang kailangan ng Pilipinas upang makibahagi sa solidarity trial na pinangungunahan ng World Health Organization (WHO) sa pagsusuri ng dalawang uri ng COVID-19 vaccines sa bansa.

Sinabi ni D.O.S.T. – Philippine Council for Health Research and Development Executive Director, Dr. Jaime Montoya na magsasagawa ng clinical trials dahil hindi pa nakagagawa ng “ideal vaccine”.

Bagaman epektibo ang mga kasalukuyang bakuna, mayroon pa rin anya itong mga kondisyon kaya’t hinahanap ng mga eksperto ang mga bakunang epektibo pero mas kaunti ang hinihinging kondisyon.

Kabilang sa mga kondisyon ay makikita sa mrna vaccines tulad ng Pfizer na kailangang itago sa temperaturang negative 70 degrees celsius.

Humahanap na rin sila ng mga bakuna na mas angkop sa partikular na grupo gaya ng senior citizens, menor de edad at mga indibidwal na may comorbidities.

Ipinagdasal ni Pope Francis sa Angelus St. Peter’s Square sa Vatican ang mga biktima ng bagyong Odette sa Pilipinas.

Ayon sa Catholic Bishops’ Conference of the Philippines o CBCP, umaasa ang Santo Papa na marami ang tutulong sa mga pamilyang apektado kung saan, maraming mga bahay ang winasak ng naturang bagyo.

Bukod pa dito, nasawi din ang nasa mahigit 200 katao sa Visayas at Mindanao.

Nanawagan din si Pope Francis sa publiko na ipagdasal ang mga Pilipinong nakararanas ngayon ng kakulangan sa matutulugan, pagkain, inumin at gamot dahil sa delubyong iniwan ni bagyong Odette. —sa panulat ni Angelica Doctolero

Patuloy paring naghahanap ng karagdagang pondo ang pamahalaan upang matugunan ang pangangailangan ng mga residenteng naapektuhan ng bagyong Odette.

Kasunod ito ng naging kahilingan ni Pangulong Rodrigo Duterte sa mga Local Chief Executive na sinalanta din ng bagyong Odette sa Visayas at Mindanao.

Ayon kay Duterte, bigyan pa sana ang gobyerno ng karagdagang panahon, kung saan, plano nilang makabuo ng PHP 2B pondo na agad ipalalabas para mabilis na maibigay sa mga nasalanta.

Dagdag pa ni Duterte, dahil malapit nang matapos ang taon, ang budget at ang malaking bahagi ng pondo ay ibinuhos na nila sa pagtugon sa COVID-19 pandemic.

Dahil dito, mapipilitan silang bawasan ang budget ng lahat ng available appropriations, lalo na ang mga pondong hindi nagamit o mga proyektong hindi maayos ang takbo upang ilaan sa mga pamilyang apektado ng pananalasa ng bagyong Odette. —sa panulat ni Angelica Doctolero

Inihayag ng Philippine Atmospheric, Geophysical and Astronomical Services Administration PAGASA na isa nanamang Low Pressure Area (LPA) ang namataan sa labas ng pacific ocean o Philippine Area of Responsibility.

Ayon kay PAGASA Weather Specialist Aldczar Aurelio, patuloy nilang minomonitor ang naturang LPA.

Hindi naman umano nakakaapekto ang namataang LPA sa alinmang bahagi ng bansa ngunit patuloy itong babantayan ng PAGASA.  —sa panulat ni Angelica Doctolero

Lumawak pa sa  23, 438 ektarya ng  agricultural areas sa ilang rehiyon sa bansa ang sinalanta ni bagyong Odette.

Huling napabilang sa talaan ng Department of Agriculture ang mga agricultural areas sa Zamboanga Peninsula Central Mindanao, Davao at CARAGA Region.

Abot na sa kabuuang 20,319 metric tons ng produksyon ang nasira at lugi sa  mga magsasaka kasama na ang mga nasa CALABARZON, Bicol, Western Visayas, Central Visayas at Eastern Visayas .

Nasa 12,906 na ang bilang ng mga magsasaka at mangingisda ang nawalan ng kabuhayan dahil sa kalamidad.

Base sa ulat ,lumobo na sa  Php 362.3M ang pinsala sa agrikultura at pangisdaan. —ulat mula kay Jaymark Dagala (Patrol 9)

Isang residential area sa kahabaan ng Tuazon St. Corner Camba St. Sa Brgy. 45, Tondo, Maynila ang nasunog kahapon.

Sa imbestigasyon ng mga otoridad, itinaas ang unang alarma bago idineklarang fire out ng mga tauhan ng BFP-Manila kung saan, pinaghihinalaang Electric issue ang sanhi ng sunog.

Inaalam pa ng mga otoridad kung mayroong mga nasawi o nasugatan sa naturang sunog. —sa panulat ni Angelica Doctolero

Aarangkada na ngayong araw ang taas-singil sa presyo ng produktong petrolyo.

Nabatid na aabot sa 0.50 hanggang 0.70 centavos ang taas-singil sa kada litro ng gasolina at diesel habang 0.60 – 0.70 centavos naman sa kerosene.

Kabilang sa mga kumpaniyang magtataas ng singil sa presyo ng langis ay ang Sea Oil, Pilipinas Shell, Caltex, Petro Gazz at Cleanfuel.

Samantala, sa kabila naman ng dagdag-presyo nito, ipinagpaliban ng kumpaniyang Phoenix Petroleum, ang pagtataas ng presyo sa mga lugar na apektado ng bagyong Odette.

Sa ngayon, ito na ang ikalawang linggong taas-presyo sa produktong petrolyo ilang araw bago kapaskohan.  —sa panulat ni Angelica Doctolero

Asahan parin ang epekto ng hanging amihan sa dulong hilaga ng Luzon habang magiging maulap na may mahihinang pag-ulan sa Batanes at Babuyan Island.

Makakaranas ng maaliwalas na panahon ang northern Luzon, buong central Luzon at Metro Manila pero posibleng magkaroon ng mahihinang pag-ulan sa hapon o sa gabi.

Magiging mainit at medyo maalinsangan naman ang southern part ng Luzon pero may tiyansa ng mga pag-ulan na may kasamang pagkidlat at pagkulog sa hapon o sa gabi.

Mainit na panahon din ang mararanasan sa buong Visayas at Mindano pero may isolated rain showers dulot ng localized thunder storm.

Nagpaalala naman ang PAGASA sa publiko na ugaliing magdala ng payong bilang proteksiyon sa init ng araw maging sa biglaang pagbuhos ng ulan.

Magiging maalon parin sa ilang baybaying dagat kabilang na ang Batanes at Babuyan Island kaya pinapayuhan ang mga mangingisda at may mga maliliit na sasakyang pandagat na huwag munang pumalaot upang maging ligtas.

Agwat ng temperatura sa Metro Manila ay nasa 24°C na may maximum level hanggang 31°C habang sisikat naman ang haring araw mamayang 6:16 ng umaga at lulubog naman ito mamayang 5:23 ng hapon.  —sa panulat ni Angelica Doctolero