Posibleng hindi makapaglaro si Los Angeles Laker Star Anthony Davis ng ilang buwan dahil sa medial collateral ligament (MCL) sprain sa kaniyang tuhod.
Natamo ni Davis ang injury sa laban sa pagitan ng koponang Minnesota Timberwolves ng magkabanggaan sila ni Jaden Mcdaniels.
Umaasa naman ang koponan sa agarang paggaling ni Davis.
Hinimok ng Department of Health (DOH) ang mga Pilipino na gawin sa mga Al Fresco o open area ang mga pagtitipon ngayong Kapaskuhan.
Sa laging handa briefing sinabi ni DOH Undersecretary Myrna Cabotaje na mas mabuting magdiwang sa mga open area dahil maayos ang daloy ng hangin dito.
Una nang sinabi ng ilang eksperto na mas madaling mahawaan ng virus ang isang indibidwal na nasa mga kulob na lugar dahil hindi gaanong pumapasok ang hangin dito.
Samantala, ipinaalala ni Cabotaje na hindi pa rin aniya dapat na kalimutan ang pag-obserba sa minimum public health and safety protocols.—mula sa ulat ni Jopel Pelenio sa panulat ni Airiam Sancho
Aabot sa mahigit isang milyong doses ng COVID-19 vaccine ang ipadadala sa mga rehiyong apektado ng Bagyong Odette bilang paghahanda sa ikalawang round ng nationwide vaccination drive.
Ayon kay National Task Force against COVID-19 medical consultant Doctor Maria Paz Corrales. Ang mahigit 663,400 doses ng AztraZeneca vaccine at mahigit 500,000 doses ng bakunang Moderna na dumating sa NAIA terminal 3 kagabi ay ilalan sa mga nasabing apektado ng bagyo.
Matatandaang sinuspinde ang ikalawang bugso ng bayanihan bakunahan sa region 4-B, 5, Visayas at Mindanao dahil sa bagyong Odette. —sa panulat ni Airiam Sancho
Iminungkahi ni Rizal second district representative Fidel Nograles na pansamantalang suspendihin ang mga kailangan sa pagbibiyahe kaugnay sa COVID-19 sa mga lugar na hinagupit ng bagyong Odette.
Paliwanag ni Nograles, batid niyang patuloy ang banta ng COVID-19 sa bansa, ngunit dapat aniyang luwagan ang ilang patakaran upang mabilis na maihatid ang tulong mula sa gobyerno at pribadong sector, gayundin upang mas madali na makamusta ng ilang mga kaanak at kaibigan ang mga apektado ng bagyo.
Magugunitang, wala pa ring maayos na linya ng komunikasyon ang ilang lugar sa Visayas at Mindanao.–-mula sa ulat ni Tina Nolasco sa panulat ni Airiam Sancho
Unti-unti nang binuksan ang mga negosyo sa Surigao City matapos na manalasa ang bagyong Odette.
Kabilang dito ang mga bangko, kainan, supermarket at iba pang mga negosyo na bukas sa limitadong operasyon.
Samantala, nanawagan ang lokal na pamahalaan ng nabanggit na lungsod ng tulong-pinansyal para sa mga libu-libong residente na nasira ang bahay at ari-arian.—sa panulat ni Airiam Sancho
Inihayag ng National Disaster Risk Reduction and Management Council (NDRRMC) na halos dalawang milyong indibidwal ang apektado ng Bagyong Odette.
Ayon kay NDRRMC spokesperson Mark Timbal, 438,359 sa nasabing bilang ang nananatili sa labas ng mga evacuation center.
Aniya, mahigit 14 na milyong pisong halaga na rin ng tulong ang naibigay sa mga apektadong residente.
Samantala, sinabi ni Timbal na hindi pa nabeberipika ng NDRRMC ang mga ulat sa umano’y insidente ng looting sa mga lugar na tinamaan ng bagyo.—sa panulat ni Airiam Sancho
Patay ang isang suspek dahil sa pagnanakaw ng motorsiklo sa lalawigan ng Sultan Kudarat.
Kinilala ang motornapper na si Sabahuddin Maton, residente ng Ampatuan Maguindanao.
Ayon kay Esperanza Chief of Police Major Alexander De Pedro, hinarang ng awtoridad ang suspek, ngunit hindi ito huminto at mabilis na pinatakbo ang sinasakyang motorsiklo.
Nasawi naman si Maton matapos magtamo ng mga tama ng bala sa katawan nang makipagbarilan sa awtoridad.—sa panulat ni AIriam Sancho
Patuloy na tumataas ang demand para sa mga essential migrant workers sa gitna ng pandemya.
Batay sa ulat ng International Organization for Migration (IOM), kabilang sa mga trabahong hinahanap ay mga doktor, nurse at iba pang health workers.
Tinatayang nasa halos 170 milyon migrant workers ang nagtatrabaho sa buong bansa na mas mataas kumpara noong 2010 na nasa 53 milyon.—sa panulat ni Airiam Sancho
Aabot sa 71 mga paaralan ang napinsala sa pananalasa ng Bagyong Odette sa bansa batay sa datos mula sa Department of Education (DepEd).
Pinakamaraming napinsalang paaralan sa Region 6 na 26 na sinundan ng Region 7 na may 12 gayundin ang Region 8 at CARAGA na may tig-10 napinsalang paaralan
6 ang napinsala sa Region 5, tig-3 sa Region 4-B at Region 10 habang 1 sa Bangsamoro Autonomous Region in Muslim Mindanao
Samantala, umabot naman sa 29, 671 na mga paaralan ang naapektuhan ng Bagyo sa 11 rehiyon sa bansa habang nasa mahigit 12 Million na mag-aaral ang naapektuhan
Naibaba na ng Philippine Air Force ang mga tulong na kinakailangan para sa mga apektado ng Bagyong Odette sa Cebu.
Ayon kay Air Force Spokesperson, Lt. Col. Maynard Mariano, dumating kahapon sa Cebu ang kanilang C-130 aircraft.
Laman nito ang samu’t saring relief goods kasama ang mga sako ng bigas, galon ng tubig at mga de lata gayundin ang mga non-food item tulad ng tent, toiletries, donasyong damit at maging generator set.
Ipamamahagi ng ang relief goods sa Visayas region at Northern Mindanao na matinding hinagupit ng bagyo.
Samantala, maliban sa relief operations, tiniyak ng Air Force na patuloy pa rin ang kanilang search and rescue operations.
Handa rin silang magsagawa ng airlift para lang makapaghatid ng tulong. —ulat mula kay Jaymark Dagala (Patrol 9)