DWIZ 882

Patuloy paring umiikot ang Low Pressure Area (LPA) sa labas ng Philippine Area of Responsibility (PAR) pero maliit ang tiyansa nito na maging isang Tropical depression.

Magdudulot ng pag-ulan ang naturang LPA sa ilang bahagi ng Luzon at posibleng pumasok sa PAR ngayong araw o sa darating na Huwebes.

Dahil diyan, patuloy paring makakaapekto ang shearline sa eastern section ng northern Luzon dahilan ng pagkakaroon ng isolated rain showers partikular na sa Cagayan Valley at eastern section ng northern Luzon.

Umiiral parin ang hanging amihan kung saan, apektado parin nito ang northeast at Central Luzon na may tiyansa na ulanin sa hapon hanggang sa gabi.

Agwat ng temperatura sa Metro Manila ay nasa 23°C na may maximum level hanggang 33°C habang sisikat naman ang haring araw mamayang 6:16 ng umaga at lulubog naman ito mamayang 5:32 ng hapon.  —sa panulat ni Angelica Doctolero

Nilinaw ng Philippine National Police (PNP) na hindi pa pinal ang naitatala nilang bilang ng mga nasawi bunsod na rin ng pananalasa ng bagyong Odette.

Ito’y matapos pagmulan ng kalituhan ang mas maraming bilang ng mga nasasawi ng PNP kumpara sa National Disaster Risk Reduction and Management Council (NDRRMC).

Ayon kay PNP Spokesman P/Col. Roderick Alba, nakabatay sa blotter ng pulisya mula sa iba’t ibang himpilan nito ang mga naitatala nilang nasawi at sugatan.

Kanila itong isinusumite sa Office of the Civil Defense para isailalim sa validation katuwang ang Department of the Interior and Local Government (DILG) at ng Department of Social Welfare and Development (DSWD).

Tiniyak naman ni Alba na maingat ang PNP sa pag-uulat ng datos upang masigurong walang madodoble o hindi kaya’y makaliligtaan sa bilang. —sa ulat ni Jaymark Dagala (Patrol 9)

Hindi muna magsasagawa ng programa, parada at flyby ang Armed Forces of the Philippines (AFP) kaalinsabay na rin ng kanilang ika-86 na anibersaryo ngayong araw.

Ayon kay AFP Chief of Staff, Lt/Gen. Andres Centino, layon nitong bigyang daan ang nagpapatuloy na humanitarian at disaster relief operations para sa mga sinalanta ng bagyong Odette.

Sa halip na pagdiriwang, minabuti ng AFP na gawing mas makabuluhan ang kanilang anibersaryo sa pamamagitan ng pagtulong sa kapwa bilang bahagi ng munting paggunita sa kanilang simulain.

Napapanahon ito ani Centino bilang pagpapahalaga sa tunay na layunin ng kanilang samahan na magpahalaga at magsakripisyo para sa bayan at kapwa Pilipino lalo na ngayong kapaskuhan.

Kasabay nito, nagbigay pugay si Centino sa lahat ng mga miyembro ng Sandatahang Lakas ng Pilipinas na handang isakripisyo ang sariling buhay sa pagganap sa tungkulin. —sa ulat ni Jaymark Dagala (Patrol 9)

Umakyat na sa 156 ang bilang ng mga napaulat na nasawi dulot ng pananalasa ng bagyong Odette batay sa datos ng National Disaster Risk Reduction and Management Council (NDRRMC).

Nagmula ang bilang na ito sa mga lugar ng Palawan, Iloilo, Guimaras, Negros Occidental, Cebu, Bohol, Negros Oriental, Bukidnon Misamis Occidental, Misamis Oriental, Butuan City at Agusan del Sur.

Maliban sa bilang ng mga napaulat na nasawi, may 37 pa na napaulat na nawawala habang 275 naman ang sinasabing nasugatan sa pananalasa ng bagyo.

Pero paglilinaw ng NDRRMC, 9 lamang dito ang kumpirmado habang ang nalalabing bilang ay isinasailalim sa validation kung may kinalaman sa bagyo ang kanilang pagkasawi.

Sa kabilang dako, nakapagtala naman ang Philippine National Police (PNP) ng 375 na bilang ng mga nasawi, 515 na nasugatan habang 56 ang nawawala batay sa datos mula sa kanilang National Operations Center.

Ayon kay PNP Spokesman P/Col. Roderick Alba, aabot na sa 453 ang naikasa nailang operasyon kung saan, umakyat na rin sa 4,980 ang kanilang nasagip. —sa ulat ni Jaymark Dagala (Patrol 9)

Tiniyak ng Philippine National Police (PNP) ang kanilang kahandaang tumulong sa mga mamamayan lalo na sa mga panahong ito ng matinding pangangailangan.

Ito’y ayon kay PNP Chief P/Gen. Dionardo Carlos matapos magpadala sila ng 5,837 na mga tauhan bilang Reactionary Standby Force para umalalay sa Relief, Search and Rescue operations sa mga lugar na sinalanta ng bagyong Odette.

Ayon kay Carlos, mula sa 142 rescue operations na kanilang ikinasa ay nakapagligtas sila ng may 1,263 indibidwal bukod pa sa 808 nilang mga tauhan na nakabantay naman sa mga evacuation center.

Maliban dito, tinututukan din ng PNP ang peace and order lalo pa’t may mga ulat hinggil sa kakulangan ng mga basic needs tulad ng pagkain, tubig, gasolina at iba pa sa mga sinalanta ng bagyo. —sa ulat ni Jaymark Dagala (Patrol 9)

Nasabat sa limang drug suspects ang aabot sa P1M halaga ng droga sa ikinasang buy-bust operation ng mga otoridad sa Antipolo City.

Kinilala ang mga suspek Jason Dalumpines, 21-anyos, pang-9 sa high-value individuals sa National Capital Region, habang ang ibang suspek naman ay sina Cedrick Juanillas, 21-anyos; Joshua Gracilla, 22-anyos; Marco Beatriz, 21-anyos; at Kristina Reblora, 21-anyos.

Kasalukuyang nakapiit sa Marikina City Police Station Custodial Facility ang mga suspek at nahaharap sa kasong paglabag sa Republic Act 9165 O Comprehensive Dangerous Drugs Act of 2002. —sa panulat ni Mara Valle

Inanunsiyo na ng Korte Suprema ang suspension ng trabaho sa lahat ng Trial Courts sa buong bansa sa December 24, 2021 at December 31, 2021.

Sinabi ni Deputy Court Administrator and Officer-In-Charge Raul Bautista Villanueva, ng Office of the Court Administrator (OCA), ito ay upang unahin and koleksiyon at pag oorganisa ng mga court documents na kakailangin para sa preparasiyon ng inventory at iba pang reports sa susunod na taon.

Dagdag pa ni Villanueva, ang mga naturang ‘No Transaction’ days ay ang mga araw na isasagawa ang paglilinis, pagdidis-infet at sanitize ng mga court buildings at offices para sa ibayong pagiingat sa COVID-19. —sa panulat ni Mara Valle