DWIZ 882

Nakarating na sa Dinagat Island ang mga tulong para sa mga residente ruon na matinding sinalanta ng Bagyong Odette.

Dala ng Philippine Navy ang nasabing tulong sakay ng BRP Rafael Pargas ng Naval Forces Eastern Mindanao.

Ayon sa Navy, agad nagsagawa ng relief operations ang kanilang mhga tauhan, namahagi ng pagkain at nagsagawa rin ng feeding activity.

Nagtayo rin sila ng charging station sa San Jose Port para sa mga naubusan na ng baterya at kailangang tumawag sa kanilang mga mahal sa buhay.

Isa ang BRP Rafael Pargas sa 19 na humanitarian aid-focused vessels ng Philippine Navy na naghahatid ng tulong sa mga nasalanta ng bagyo sa Visayas at Mindanao. —sa ulat ni Jaymark Dagala (Patrol 9)

Inaasahan na ng Department of Education ang magiging resulta ng vaccine campaign ng pamahalaan para sa face-to-face classes sa susunod na election.

Kumpiyansa si Education Secretary Leonor Briones, na mas mapapalawak pa ang limited face-to-face classes dahil sa dami ng mga Pilipinong nagpabakuna bago matapos ang taon.

Nabatid na umabot na sa mahigit 44M ang kabuuang bilang ng mga indibidwal na nagpaturok sa ikinasang vaccination program ng pamahalaan na “Bayanihan, Bakunahan.”

Ayon kay Briones nakasalalay sa resulta ng mga fully vaccinated ang muling pagbubukas ng mga pisikal na klase sa buong bansa.  —sa panulat ni Angelica Doctolero

Aabot sa P3M ang halaga ng special collection na ilalaan ng Manila Cathedral sa mga nasalanta ng bagyong Odette.

Matatandaang isinagawa ang special collection matapos ang naging panawagan sa publiko ni Manila Archbishop Jose Cardinal Advincula kung saan ang lahat ng mass collection at online donations ng naturang simbahan mula noong December 18 hanggang 19 ay ipamamahagi sa mga nasalanta ng bagyong Odette.

Layunin nitong, mapagaan ang sitwasyon at problema ng mga residenteng naapektuhan ng pananalasa ng bagyo lalo pa ngayong magpapasko.  —sa panulat ni Angelica Doctolero

Palalawakin ng BBM-Sara UniTeam ang Roll on/Roll off Terminal System ng bansa upang pabilisin ang pagbibigay ng tulong sa mga lugar na tinatamaan ng kalamidad, sakaling manalo si dating senador Ferdinand “Bongbong” Marcos Jr. sa 2022 elections.

Ito ang tugon ni Marcos Jr. matapos ang iniwang pinsala ng super typhoon Odette sa Visayas, Mindanao at ilan pang bahagi ng bansa.

Dahil sa pagiging archipelago ng bansa, kailangan anya ng mas epektibong paraan ng pagresponde at pamamahagi ng tulong gaya ng relief goods at heavy equipment.

Ayon kay Marcos, kung madaragdagan ang mga ruta ng mga Roro vessel ay mas mapabibilis ang pagresponde tuwing may kalamidad.

Inihayag din ng UniTeam na agad kumilos ang kanilang volunteer network sa bansa upang magbigay ng tulong sa mga biktima ng bagyong Odette.

Magugunitang binisita ni Marcos noong linggo ang Southern Leyte, Bohol, Cebu at Butuan City upang mamahagi ng tulong sa mga apektadong komunidad.

Isang commercial building ang nasunog sa Barangay Poblacion, Makati City.

Ayon sa mga otoridad, pinaghihinalaan na isang nag-over heat na home appliaces ang dahilan ng sunog.

Kinilala ng Bureau of Fire Protection (BFP) ang may-ari ng unit na si Shela Gulios kung saan, nasa P15,000 ang halaga ng pinsalang naabo sa sunog.

Wala namang naitalang nasawi o nasugatan sa sunog matapos ang insidente.  —sa panulat ni Angelica Doctolero

Hinikayat ni Overseas Workers Welfare Administration (OWWA) Board of Trustee Celerino “Chie” Umandap, ang mga Overseas Filipino Workers na bumuo ng grupo na mga nawalan ng trabaho dahil sa COVID-19 pandemic.

Ayon kay Umandap, naglaan ang kanilang ahensya ng P200M para sa isang taon na magagamit ng mga OFWs.

Bukod pa ito sa P500M cash aid grant financial assistance para sa Distressed OFWs.

Sinabi ni Umandap na sakaling makabuo ng 5 hanggang 10 miyembro ang isang grupo ay maaari silang makatatanggap ng P150,000 grant mula sa OWWA at P250,000 grant naman para sa 11 hanggang 25 miyembro.

Habang ang mga miyembrong nasa 16 hanggang 30 ay makakatanggap naman ng kalahating milyong piso.

Samantala, nilinaw ni Umandap na dapat umanong magparehistro ang grupo o asosasyon sa government institutions kagaya ng Department of Labor and Employment (DOLE), Security and Exchange Commission (SEC), Department of Trade and Industry (DTI) o sa Cooperative Commission.  —sa panulat ni Angelica Doctolero

Umabot na sa P3B ang halaga ng mga ari-ariang winasak ni bagyong Odette sa Southern Leyte.

Ayon sa Department of Public Works and Highways (DPWH), magastos ang iniwang pinasala ng bagyo kung saan, karamihan sa mga nasira ay ang mga kabahayan at mga poste dahilan kung bakit hanggang ngayon ay wala paring suplay ng kuryente sa lugar.

Bukod pa dito, nawalan din suplay ng tubig sa lugar, maging ang kanilang komunikasyon.

Sa pahayag ni Public Works Secretary at Southern Leyte Rep. Roger Mercado nasa 19 na indibidwal ang nasawi habang nasa 8 naman ang naitalang sugatan.

Sa ngayon, ginagawan na ng paraan ng DPWH upang matugunan ang kakulangan at pangangailangan ng Southern Leyte. —sa panulat ni Angelica Doctolero

Nagpaalala sa mga employers ang Department of Labor and Employment (DOLE) kaugnay sa nalalapit na araw ng Pasko at Rizal Day.

Ayon sa DOLE, dapat na mabayaran ng tamang pasahod ng mga kumpaniya ang kanilang mga empleyado sa holiday.

Base sa Labor Advisory No. 23, series of 2021 ng DOLE, nakasaad dapat ay mabayaran ng doble o equivalent sa 200% ang magiging sahod sa unang walong oras.

Sakaling namang hindi magtrabaho ang kanilang empleyado sa mismong holiday ay dapat din itong mabayaran ng 100% ng sahod.

Sa mga mag-oovertime naman sa kanilang trabaho ay dapat madagdagan ng karagdagang tatlumpung porsyento kada oras sa nasabing araw.

Kung ang isang empleyado naman ay nagtrabaho sa regular holiday sa araw ng kaniyang day off, dapat itong bayaran ng karagdagang 30% ng pangunahing sahod na 200% . —sa panulat ni Angelica Doctolero

Ayon sa DOLE, dapat na sundin ng mga kumpanya at establisyimento sa pribadong sektor ang tamang pagbabayad ng sahod sa kanilang mga manggagawa ngayong buwan upang kanilang maramdaman ang tunay na diwa ng pasko sa gitna ng pandemiya.