DWIZ 882

Aaprubahang 2022 National Budget ni Pangulong Rodrigo Duterte na nagkakahalagang 20 bilyon pesos, maaari umanong magamit ng gobyerno pang-tulong sa mga nasalanta ng super typhoon Odette.

Sinabi ni Senate Committee On Finance Chairman Senator Sonny Angara, matutulungan nito ang mga nawalan ng bahay at hanap-buhay dahil sa bagyo.

Bukod dito, kung may savings ang mga ahensya ng gobyerno maaari itong ilipat ng Pangulong Duterte para sa relief at rehabilitation effort o para sa calamity response.

Giit ni Senator Angara ang power to realign savings ng pangulo ay constitutional at ginagawa sa mga sitwasyon tulad ng pagtugon sa kalamidad. —sa ulat ni Cely Ortega Bueno (Patrol 19), sa panulat ni Joana Luna

Patuloy na dinaragsa ng mga papauwing pasahero ang Parañaque Integrated Terminal Exchange (PITX) at Araneta Bus Terminal sa Quezon City, ilang araw bago ang Pasko.

Ayon sa PITX, mas marami ang mga biyahero ngayon kumpara noong bago magpandemya matapos umabot sa 100,000 ang bilang ng mga pauwing pasahero sa kani-kanilang probinsiya nitong Lunes.

Tiniyak naman ng pamunuan ng mga terminal ng bus na nasusunod ang 70% capacity na itinakda ng Inter-Agency Task Force (IATF) gayung pre-booked lahat ng biyahe.

Nagpaalala rin ang pamunuan ng PITX sa mga biyahero na siguraduhing kumpleto ang mga dala-dalang requirements upang hindi maantala ang kani-kanilang biyahe. —sa panulat ni Joana Luna

Tiniyak ng National Food Authority (NFA) na may sapat na suplay ng bigas para sa mga biktima ng bagyong Odette.

Ayon kay NFA Administrator Atty. Judy Carol Dansal, gagamitin nila ang mga stocks ng bigas mula sa ibang warehouse na hindi naapektuhan ng pananalasa ng bagyo upang matugunan ang posibleng kakulangan.

Dagdag pa ng administrador, hindi kailangan mag-alala ng mga residente mula sa apektadong rehiyon dahil nakahanda rin ang prepositioned rice supply ng ahensiya. —sa panulat ni Joana Luna

Pumalo na sa 70 ang naitalang nasawi matapos manalasa ang bagyong Odette sa probinsiya ng Negros Oriental.

Ayon kay Adrian Sedillo ng Negros Oriental Provincial Disaster Risk Reduction and Management Council (PDRRMO) karamihan sa mga nasawi ay nalunod sa baha matapos ma-stranded sa biyahe at madaganan ng tumumbang kahoy.

Sinabi pa ni Sedillo na maari pang madagdagan ang bilang ng mga namatay dahil sa bagyo gayung may mga lugar pang hindi napupuntahan ng rescuers at marami pa ang nawawalang indibidwal. —sa panulat ni Joana Luna

Ipatutupad ng pamahalaan ang “barangay to barangay” at “house to house” na pagbabakuna kontra COVID-19 upang maabot ang milyun-milyong hindi pa bakunadong mga indibidwal.

Inihalimbawa ni Secretary Carlito Galvez, Jr., ang estratehiya ng General Santos City kung saan 26 na barangay dito ay may kanya-kanyang inoculation site bukod sa Mobile Vaccination Facility.

Ani Galvez, dapat mas tutukan ang mga barangay gayung kaunti lang ang mga pumupunta sa mga mall upang magpabakuna.

Sa ngayon, aabot pa lang sa 44.2 million ng 109 million nang populasyon ang fully vaccinated. —sa panulat ni Joana Luna

Aabot sa 350 toneladang relief goods at essential supplies ang inihatid ng BRP Tarlac ng Philippine Navy sa Visayas at Mindanao sa kanilang paglalayag kaninang umaga.

Ayon kay Phililippine Navy Spokesman, Commander Benjo Negranza, nagmula ang nasabing tulong mula sa Department of Social Welfare and Development (DSWD), Department of Health (DOH) gayundin mula sa pribadong sektor.

Lulan din ng BRP Tarlac ang 150 toneladang kagamitan tulad ng AFP Mobile Kitchen, Military Water trucks, mga trak mula sa MERALCO at Maynilad gayundin ang mga Bank on Wheels.

Sakay ng BRP Tarlac ang nasa 200 contingent ng Marine Amphibious Ready Unit ng 9th Marine Battalion na siyang magsasagawa ng Humanitarian and Disaster Relief Operations sa mga lugar na matinding sinalanta ng bagyo. —sa ulat ni Jaymark Dagala (Patrol 9)