DWIZ 882

Tuluyan nang kumalas ang FEU Dr. Nicanor Reyes Medical Foundation sa PhilHealth dahil sa utang sa kanila ng ahensya na nasa 200 million pesos hanggang nitong katapusan ng Nobyembre.

Dahil dito, ipinabatid ni FEU NRMF Chief Operating Officer Juan Enrique Reyes na hindi na nila ibabawas sa PhilHealth  benefits ang hospital bill ng mga pasyenteng miyembro ng ahensya.

Inamin ni Reyes na mahirap ang nasabing hakbangin lalo nat hindi naman nila matutulungan ang kanilang mga estudyante kung kulang silang sa pinansiyal.

Sa kabila nito, tiniyak ni Reyes na ibibigay nila ang lahat ng mga form na kailangan para makapag-apply ang mga pasyente ng kanilang  reimbursements.—sa panulat ni Airiam Sancho

Inaprubahan na ng Food and Drug Administration (FDA) ang Emergency Use Authorization (EUA) ng COVID-19 vaccine ng Pfizer-Bio N Tech para sa may edad lima hanggang onse.

Inanunsyo ito ni FDA Director General Dr. Eric Domingo bilang pag-umpirma na rin ng naunang pahayag niyang magiging available ang COVID-19 vaccine para sa 5-11 age group bago matapos ang taong ito.

Binigyang diin ni Domingo na mas mataas pa sa 90% ang efficacy rate ng bakuna ng Pfizer para sa nasabing age group.—sa panulat ni Airiam Sancho

Patuloy ang paghaba ng pila ng mga pasaherong uuwi ng mga lalawigan sa NAIA Terminal 3 dalawang araw bago ang Pasko.

Pinayuhan ng NAIA ang mga pasaherong i-check muna ang mga requirements na kailangan ng LGU na uuwian bago magtungo ng airport.

Sinabi ng NAIA na bukod sa ticket, kailangan na ring ipakita ng mga pasahero ang S-Pass, vaccination card at negative RT-PCR test kung hindi naman vaccinated.

Kasabay nito, muling tiniyak ng pamunuan ng NAIA ang mahigpit na pagpapatupad ng health protocols tulad nang pagsusuot ng face mask at pag-obserba sa physical distancing.—sa panulat ni Airiam Sancho

Nagpatupad ang Commission on Elections (COMELEC) ng liquor ban, epektibo mula May 8, 2022 hanggang May 9, 2022, araw ng eleksyon.

Batay sa inilabas na resolusyon, exempted ang mga hotel, resorts, restaurant na duly cetified ng Department of Tourism (DOT).

Paiiralin din sa panahon ng eleksyon ang ‘gun ban’ o ‘firearms ban’ gayundin ang pagbabawal sa pagsasagawa ng ‘public works’ o infrastructure projects’.

Samantala, makikita ang kopya ng bawat resolusyon sa COMELEC website. —sa panulat ni Airiam Sancho

Iminugkahi ni House Deputy Speaker at Davao City 3rd District Representative Isidro Ungab na gamitin ang natitirang quick response fund (QRF) mula sa iba’t ibang departamento at ahensya ng pamahalaan upang idagdag sa 10 bilyong pisong pondo para sa mga biktima ng bagyong Odette.

Kabilang dito ang Office of the Secretary ng Department of Agriculture (DA), DOH, DSWD at DPWH.

Gayundin ang DepEd, DILG-BFP, DILG-BJMP at DND-OCD.

Aniya, ang perang maaaring makuha mula sa mga QRF ay pwedeng gamiting para sa rehabilitasyon ng mga lugar na sinalanta ng bagyo.

Bukod pa rito, inirekomenda rin ng mambabatas na gamitin ng pangulo ang anumang natitirang pondo mula sa calamity fund, sa ilalim ng 2021 General Appropriations Act.

Matatandaang batay sa ulat ng Department of Budget and Management (DBM), mayroong pang dalawang bilyong pisong pondo mula sa calamity fund ng bansa. —sa ulat ni Tina Nolasco (panulat ni Airiam Sancho

Tumaas na ang presyo ng karamihan sa mga prutas sa Clover Leaf Market sa Balintawak dalawang araw bago mag Pasko.

Kabilang dito ang mga bilog na prutas tulad ng melon na nasa 50 pesos kada kilo mula sa 40 pesos.

Ang pomelo naman ay naglalaro sa 130 hanggang 150 pesos kada kilo na noo’y 110 pesos lamang.

Habang ang ubas ay nasa 180 pesos kada kilo mula sa 100 pesos.

Samantala, asahan na lalo pang tataas ang presyo ng ilan pang mga prutas bago mag bagong taon. —sa panulat ni Airiam Sancho

Sinimulan na ng mga lokal na pamahalaan sa Metro Manila ang panghihikayat sa mga mamamayan na magpa-booster shot.

Ito’y mula ng ianunsyo ng Department of Health (DOH) na aprubado na ng Food and Drug Administration (FDA) ang pinaiksing panahon ng pagpapaturok ng booster shot sa tatlong buwan mula sa anim na buwan matapos na makatanggap ng dalawang dose ng bakuna.

Paalala ng LGUs na dapat dalhin ng mga nais magpabooster ang vaccination card upang katunayang nakatanggap na ng second dose ng bakuna.

Samantala, mahigpit pa ring ipatutupad ng mga lokal na pamahalaan ang minimum health and safety protocols. —sa panulat ni Airiam Sancho

Hindi na nahuhuli ang Pilipinas sa international ranking kaugnay sa katatagan at kagalingan ng ilang bansa na harapin ang pandemya.

Ayon sa Bloomberg, nasa ikalimampung pwesto na mula sa 53 bansa sa monthly COVID-19 resiliency ranking ang bansa habang pumalit sa pwesto nito ang Vietnam.

Matatandaang tatlong sunod-sunod na kulelat ang Pilipinas sa naturang ranking sa loob ng tatlong buwan batay sa indicators ng Bloomberg kabilang ang vaccination coverage, virus containment, severity of lockdowns, quality of health care, progress towards restarting travel, at overall mortality. —sa panulat ni Airiam Sancho