DWIZ 882

Namahagi ng mahigit 29 million relief assistance ang taiwan government para sa mga pamilyang naapektuhan ng bagyong Odette sa Pilipinas.

Ayon kay Taiwan Foreign Minister Joseph Wu, naiturn-over na nila ang nasa 500 thousand US dollars o aabot sa P25M na donasyon sa pamamagitan ni Manila Economic And Cultural Office In The Philippines Chairman Wilfredo Fernandez.

Bukod pa diyan, sinabi naman ng Taipei Economic And Cultural Office In The Philippines na bukod sa nasabing halaga ay nagdonate din ang Taiwan Association Inc. ng 2.7 million pesos at 2 million pesos pa mula naman sa Love From Koten Foundation.

Nabatid na kabilang sa mga lugar na winasak ng bagyong Odette ay ang Southern Luzon, Visayas at Mindanao. —sa panulat ni Angelica Doctolero

Umabot na sa P3.1B ang kabuuang pinsalang naidulot ng bagyong Odette sa agrikultura ng bansa makaraang manalasa sa Visayas at Mindanao.

Ayon sa Department of Agriculture (DA), sakop ng halaga ng nasayang ang 90,316 metric tons at 65,432 ektarya ng agricultural areas sa CALABARZON, MIMAROPA, Bicol, Western Visayas, Central Visayas, Eastern Visayas, Zamboanga Peninsula, Northern Mindanao, Davao, at CARAGA.

Habang apektado din ng bagyong Odette ang 39,372 na magsasaka at mangingisda.

Sa ngayon, sinusuri pa ng regional field Offices ng Department of Agriculture ang kabuuang pinsala sa agri-fisheries sector.  —sa panulat ni Angelica Doctolero

Nagtayo ng Community Kitchen ang ilang mga residente sa Dinagat Island upang mapagkasya ang natitirang suplay ng pagkain sa kanilang lugar.

Ayon kay Governor Arlene “kaka” Bag-ao, posible kasing maubos ang suplay ng pagkain sa maraming mga bayan sa Dinagat Island dahil hindi pa umano nakararating sa kanilang lugar ang tulong mula sa gobyerno.

Sinabi ni Bag-ao, na nabasa umano ang ilang mga suplay dulot ng pananalasa ng bagyong Odette na dapat sana ay paunang tulong sa mga residente.

Ikinatuwa naman ng 1,500 mga residente ang pamamahagi ng mga pagkain sa tulong din ng kapwa nila nasalanta ng bagyo. —sa panulat ni Angelica Doctolero

Mahigpit na minomonitor ng Philippine National Police (PNP) ang mga lugar at tindahan na nagbebenta ng paputok.

Ito ay para maiwasan ang ibat-ibang uri ng insidente sa pagsalubong ng bagong taon.

Ayon sa PNP, ipinagbabawal parin ng kanilang ahensya ang pagbebenta ng mga paputok kabilang na ang:

• Watusi
• Piccolo
• Poppop
• Five-star
• Pla-pla
• Lolo thunder
• Giant bawang
• Giant whistle bomb
• Atomic bomb
• Super lolo
• Atomic triangle
• Goodbye bading
• Large size Judas belt
• Goodbye Philippines
• Goodbye de lima
• Bin laden
• Hello columbia
• Goodbye napoles
• Mother rockets
• Coke-in-can
• Super Yolanda
• Pillbox
• Boga
• Kwitis
• Kabasi

Bukod pa diyan, hindi rin umano pinapayagan ang mga sobrang laki at sobra sa timbang na mga firecracker at pyrotechnic device imported man o gawang-lokal.

Layunin ng PNP na maiwasan ang fire related incidents sa bansa kung saan, mas mainam kung gagamit na lang ng pailaw at torotot sa bagong taon.

Sa ngayon, tumaas pa ang presyo ng produkto ng mga paputok sa Bocaue, Bulacan dahil sa kakaunting suplay matapos magbawas ang mga manufacturer sa kanilang produksiyon. —sa panulat ni Angelica Doctolero

Aabot sa 32 barko ang tutulong sa paghahatid ng mga pagkain at mga pasaherong nastranded dahil sa bagyong Odette.

Ayon sa Maritime Industry Authority (MARINA), isasakay sa mga barko ang mga relief goods upang ipamahagi sa mga pamilyang apektado ng bagyo kabilang na ang ilang bahagi ng Visayas at Mindanao.

Nabatid na hinikayat ni Administrator Robert Empedrad, ang mas marami pang Domestic Owners at Ship Operators na mag-apply ng special permits para sa mga apektadong lugar na higit na nangangailangan ngayon ng kanilang tulong.

Siniguro naman ni Empedrad na mabibigyan ng priority consideration ang pag-proseso ng mga ganitong aplikasyon.

Sa ngayon nasa 12 barko ang operational habang magbabalik operasyon palang ang nasa 19 pa na barko.

Nangako naman ang MARINA na patuloy nilang ipapatupad ang mga polisiya upang maiwasan ang pagkaantala sa paghahatid ng mga donasyon para sa mga biktima ng bagyong Odette. —sa panulat ni Angelica Doctolero

Planong maglabas ng P1B ng Office of the President upang ilaan sa mga pamilyang nasalanta ng bagyong Odette sa Visayas at Minadanao.

Ayon kay Department of Budget and Management (DBM) Officer-in-Charge Undersecretary Tina Canda, iniutos na ni Pangulong Rodrigo Duterte ang paglalabas ng naturang ayuda upang ipamahagi sa Regions 4-B, 6, 7, 8, 10, at 13.

Sinabi naman ni Canda na saklaw umano ng Contingent fund ang naturang halaga galing sa Office of the President.

Samantala, umaasa naman ang mga residenteng apektado ng bagyo sa pangako ng pangulo na maglilikom ng P1OB para sa rehabilitasyon at muling pagbangon ng mga nasalanta. —sa panulat ni Angelica Doctolero