DWIZ 882

Inalmahan ng grupong Alliance of Health Workers (AHW) ang planong iklian ang isolation at quarantine period ng mga medical frontliner na ma-e-expose at magpopositibo sa COVID-19.

Sa ilalim ng bagong polisiya ng Pamahalaan, mula sa 10 araw, pinaikli ang Quarantine period ng mga COVID-19 positive Health workers na asymptomatic at fully-vaccinated sa 5 araw at matapos nito ay maaari na silang bumalik sa trabaho.

Ayon kay AHW National President Robert Mendoza, kung 10 araw ang standard isolation o quarantine period, dapat ito ang sundin ng Health workers, sapagkat may posibilidad na makapanghawa sila ng virus.

Sa halip anya na paiksiin ang isolation period, dapat tugunan ng gobyerno ang kakulangan ng Healthcare workers sa mga ospital at benepisyo na kanilang kailangan.

Samantala, inihayag naman ni Presidential Adviser for COVID-19 response Vince Dizon na pinag-aaralan na rin nila kung ipatutupad ang mas maiksing quarantine sa iba pang indibidwal bukod.   —sa panulat ni Mara Valle

Inihayag ni Dr. Jose Rene De Grano, Presidente ng Private Hospitals Association of the Philippines (PHAP) na umabot na sa critical level ang occupancy rate sa mga pribadong ospital sa Metro Manila.

Kasunod ito ng pagtaas ng kaso ng COVID-19 kahapon matapos sumampa sa mahigit tatlumput tatlong libo ang panibagong COVID-19 cases sa bansa.

Ayon kay de grano, tinuturing na “high-risk” o 70 hanggang 85 percent ang occupancy rate ng 20 pang pagamutan dahil sa mga pasyenteng hindi pa bakunado kung saan, marami ang nagpositibo sa COVID-19 habang ang iba naman ay nakararanas ng moderate symptoms.

Bukod pa dito, marami ring healthcare workers ang nagpositibo sa COVID-19 na kinailangan namang isailalim sa quarantine.—sa panulat ni Angelica Doctolero

Inanunsiyo ng National Telecommunications Commission (NTC) na tumaas ng mahigit tatlong bilyong piso ang collection target sa buwan ng Disyembre taong 2021.

Nabatid na umabot sa mahigit 9 billion pesos ang actual collection ng NTC kumpara sa collection target nito na mahigit 5 billion pesos.

Ayon kay NTC Commissioner Gamaliel Cordoba, lumagpas sa kanilang target ang naging koleksiyon kung saan, ito na ang ika-anim na sunod na taon ng pagtaas sa tulong nadin ng Department of Information and Communications Technology (DICT) sa ilalim ng administrasyong Duterte.—sa panulat ni Angelica Doctolero

Pahirapan pa rin ang pagbili ng paracetamol at mga gamot sa ubo, sipon at lagnat sa mga botika.

Bagaman wala nang mahabang pila, tuloy-tuloy naman ang dating ng mga customer na naghahanap ng paracetamol at iba pang mga gamot.

Ayon sa Department of Trade and Industry at Drugstores Association of the Philippines (DSAP), asahan nang babalik sa normal ang supply ng mga brand ng paracetamol at iba pang gamot pero limitado lamang itong ibebenta.

Samantala, tiniyak naman ng DSAP na hindi sila basta magtataas ng presyo ng mga nasabing gamot.  —sa panulat ni Mara Valle

Mananatili sa Alert level 3 ang National Capital Region (NCR) sa kabila ng panawagan ng ilang grupo na higpitan pa ang restrictions sa NCR dahil sa patuloy na pagtaas ng COVID-19 cases.

Ayon kay Acting Presidential Spokesman Karlo Nograles, hindi pa pasok ang Metro Manila sa pamantayan ng Inter-Agency Task Force upang isailalim sa Alert level 4.

Ito, anya, ay dahil hindi pa naman umaabot sa high o critical risk ang hospitalization rate sa NCR kahit sumipa na sa panibagong record na mahigit 33K ang daily COVID-19 cases.

Ipinunto ni Nograles na ang mataas na vaccination rate sa metro manila ang posibleng dahilan kaya’t hindi gaanong mataas ang hospitalization rate.

Gayunman, inihayag ng Department of Health (DOH) na hindi malabo umakyat na rin ang hospitalization rate sa mga susunod na araw kung magpapatuloy ang pagtaas ng COVID-19 cases.  —sa panulat ni Mara Valle

Inaprubahan na ng Food and Drug Administration (FDA) ang aplikasyon ng Department of Health (DOH) para sa compassionate special permit ng Bexovid, ang generic at mas abot-kayang bersyon ng anti-COVID-19 na Paxlovid ng Pfizer.

Ayon kay FDA Director General Dr. Oscar Gutierrez, ang abot kayang anti-viral ay ipapamahagi sa mga pampublikong ospital sa bansa.

Inaasahan na ang naturang gamot ay mas mura kumpara sa ibang gamot na pangontra din laban sa COVID-19.

Ang Bexovid ang kauna-unahang generic version na inaprubahan ng US-FDA na gawa ng Pfizer na may pangalang Nirmatrelvir at Ritonavir.—sa panulat ni Angelica Doctolero

Nagpaalala sa publiko ang Chairperson Ng Vaccine Expert Panel ng Department of Science and Technology (DOST) na si Dra. Nina Gloriani, kaugnay sa posibleng pagdami ng variant ng  COVID-19 sa bansa.

Ayon kay Gloriani, patuloy lamang tatamaan ng nakakahawang sakit ang publiko kung hindi mag-iingat at magpapabakuna  ang isang indibidwal.

Sinabi ni Gloriani na ang pagmamatigas ng publiko na hindi magpabakuna ay magreresulta lamang sa pagdami ng variant ng COVID-19 sa Pilipinas.

Binigyang diin pa ni Gloriani na walang sinoman ang nais na magkasakit o mahawahan ng nakakahawang sakit kayat panatilihin parin ang pagsunod sa health protocols at pagbabakuna.—sa panulat ni Angelica Doctolero

Nadagdagan pa ang bilang ng mga probinsiyang nanghihingi ng negatibong RT-PCR test result sa mga indibidwal na papasok sa kanilang lugar.

Kasunod ito ng pagsipa ng mga kaso ng COVID-19 sa bansa kung saan, nakapagtala kahapon ng 33,169 na bagong kaso ng COVID-19 sa Pilipinas.

Kabilang sa mga probinsyang nagpatupad ng “No Negative RT-PCR Test Result, No Entry” ay ang Antique, Guimaras Iloilo, Naga City maging ang Boracay Island. —sa panulat ni Angelica Doctolero

Nanawagan sa publiko ang Catholic Bishops’ Conference of the Philippines o CBCP na huwag bumili ng maramihang gamot sa gitna ng pagtaas ng bilang ng kaso ng COVID-19 sa bansa.

Ayon sa hepe ng CBCp Ministry on Health na si Bishop Oscar Jaime Florencio, hindi kailangang bumili ng marami lalo na kung hindi naman ito kailangan.

Sinabi ni Florencio na nadadala ang publiko dahil sa balitang nagkakaubusan na ng gamot katulad ng paracetamol sa mga botika sa National Capital Region (NCR).

Bukod pa dito, nauuso din ang ibat-ibang uri ng sakit gaya ng ubo at sipon dahil sa pabago-bagong panahon.

Matatandaang kahapon ay nakapagtala ng pinakamataas na bilang sa kaso ng COVID-19 matapos sumampa sa mahigit tatlumput tatlong libo ang positive cases sa bansa.—sa panulat ni Angelica Doctolero