DWIZ 882

Inabisuhan na ang mga Bar examinee na magsimula nang mag-self quarantine para sa paghahanda sa bar exam.

Ayon sa Supreme Court, ang mga examinee na magpopositibo sa COVID-19 ay hindi papapasukin sa mga local testing center para sa kanilang pagsusulit sa January 23 at 25.

Ang mga fully vaccinated examinee ay sasailalim sa Antigen test sa loob ng 48 oras bago ang January 23.

Samantala, ang mga hindi pa bakunadong examinee ay kailangan namang magpakita ng negative result ng kanilang Reverse Transcription-Polymerase Chain Reaction Test (RT-PCR Test) na kinuha sa loob ng 72 oras bago ang unang araw ng pagsusulit.  —sa panulat ni Mara Valle

Aabot sa 10 baril nasamsam ng Philippine National Police (PNP) habang 11 ang naaresto sa unang dawalang araw ng pagpapatupad ng Nationwide COMELEC gun ban.

Ayon kay PNP Spokesperson P/Col. Roderick Alba, pawang mga sibilyan aniya ang nahuli ng PNP sa 10 magkakahiwalay na checkpoint operations.

Maliban sa mga nakumpiskang armas, isang replica ng baril din ang nakuha ng pulisya gayundin ang may 95 bala.

Tatagal ng 150 araw ang ipinatutupad na gun ban na naging epektibo nuong araw ng Linggo, Enero a-9 hanggang Hunyo a-8 kung saan ay kanselado ang lahat ng Permit To Carry Firearms Outside Of Residence (PTCFOR).

Mahigpit na pinagbabawalan ang lahat ng nagmamay-ari ng baril na dalhin ito sa labas ng kanilang tahanan kahit pa sa mga nasa unipormadong hanay maliban na lang kung sila’y naka-duty at kung may exemption mula sa COMELEC.

Tiniyak ng pamuan ng Philippine National Police o PNP na hindi maaapektuhan ang kanilang operasyon sa kabila ng patuloy na pagtaas ng bilang ng mga tinatamaan ng COVID 19 sa kanilang hanay.

Batay sa datos ng PNP Health Service, pumalo na sa 2,412 ang aktibong kaso ng COVID-19 sa hanay ng pulisya matapos na madagdagan ng 537 ang bagong kaso.

Dahil diyan ay namemeligro nang sumampa sa 44,000 ang kabuuang bilang ng mga tinamaan ng COVID-19 sa PNP na ngayon ay nasa 43,992 na.

May 10 namang nadagdag sa bilang ng mga gumaling sa sakit kaya’t umusad na sa 41,455 ang total recoveries habang nakapako naman sa 125 ang kanilang death toll.

Una rito, sinabi ni PNP Chief P/Gen. Dionardo Carlos na may istratehiya na silang ipinatupad kung saan, sasaluhin ng mga pulis na negatibo sa virus ang trabaho ng kanilang mga kasama na nagpositibo at naka-isolate.

Nagpasalamat naman si Carlos na karamihan sa mga bagong kaso ay nakararanas lang ng mild na sintomas kaya’t kinakailangan lang sa kanila na mag-home quarantine.

TULOY sa kaniyang trabaho si Department of the Interior and Local Government Secretary Eduardo Año.

Ito’y makaraang kumpirmahin ng kalihim na siya ay nagpositibong muli sa COVID-19 matapos namang sumailalim sa RT-PCR test kahapon at lumabas ang resulta ngayong umaga.

Gayunman, sinabi ni Año na siya’y asymptomatic kaya’t patuloy niyang gagampanan ang kaniyang tungkulin kahit siya’y naka-isolate sa ngayon.

Ito na ang ikatlong pagkakataon na nagpositibo sa virus si Año buhat nang magsimula ang pandemiya may 2 taon na ang nakalilipas.

Samantala, naka-quarantine din sa Kampo Crame si Philippine National Police o PNP Spokesman P/Col. Roderick Alba na positibo rin sa virus.

Nakararanas si Alba ng sintomas tulad ng ubo, sipon at trangkaso kaya agad siyang nagtungo sa Kiangan Quarantine facility.

Magugunitang nagpositibo rin sa COVID 19 si PNP Chief P/Gen. Dionardo Carlos na ngayon ay naka quarantin din.

Itinalaga bilang Officer-in-Charge ng Caloocan City Jail si J/Supt. Lloyd Gonzaga ngayong araw kapalit ni J/Supt. Niel Subibi.

Ito’y makaraang ipag-utos na ni Bureau of Jail Management and Penology (BJMP) Director Alan Iral ang pagsibak sa pwesto kay Subibi dahil sa Command Responsibility.

Nangyari ito matapos ang sumiklab na riot sa loob ng Caloocan City Jail kahapon ng hapon kung saan, 6 ang nasawi habang nasa 33 ang nasugatan.

Sa kasalukuyan, nananatili ang heightened alert status sa naturang piitan at pansamantalang tigil din muna ang lahat ng aktibidad.

Matapos ang naging diyalogo kagabi ay agad ding nagkasa ng Oplan Greyhound sa loob ng piitan para linisin ang mga selda mula sa anumang kontrabando.

Aabot na sa halos 52.4M ang mga fully vaccinated laban sa COVID-19.

Ayon kay Health Secretary Francisco Duque III, ang nasabing bilang ay 68% pa lamang ng target population sa bansa.

Sa kanyang pag-uulat kay Pangulong Rodrigo Duterte sa Talk to the People, kahapon, inihayag ni Duque na nasa 61.9M na ang nakatanggap ng 1^st dose ng bakuna.

Tinaya naman ng kalihim sa 3.3M individuals ang tumanggap ng booster shots.

Muling nilinaw ni Health Secretary Francisco Duque III na hindi nagkulang ang suplay ng gamot sa bansa.

Kasunod ito ng balitang nagkakaubusan na ng suplay ng mga gamot partikular na ang paracetamol at iba pang brand sa ilang mga pharmacy at drug stores.

Ayon kay Duque, walang katotohanan ang kumakalat na balitang nagkakaubusan ng gamot kaya hindi kailangang magpanic ang publiko.—sa panulat ni Angelica Doctolero

Isang 6 na buwang gulang na sanggol ang nilagnat matapos aksidenteng turukan ng COVID-19 vaccine sa Bulacan.

Ayon sa Ina ng sanggol, nitong December 29 nang dalhin niya ang kaniyang anak sa Rural Health Unit ng Bayan ng Sta. Maria, Bulacan upang pabakunahan ng Anti-pneumonia vaccine.

Gayunman, sa halip na Pneumonia vaccine ay COVID-19 vaccine ang naiturok sa sanggol dahilan upang lagnatin ito nang dalawang beses.

Nakarating na ang sumbong sa Department of Health at nagsasagawa na ng imbestigasyon katuwang ang Local Government ng Santa Maria.

Inabisuhan naman ni Health Undersecretary Myrna Cabotaje, Chairperson ng National Vaccination Operations Center ang mga ospital at klinika na dapat ihiwalay ang COVID-19 vaccines sa mga regular na bakuna.   —sa panulat ni Mara Valle