DWIZ 882

INATASAN ng Department of the Interior and Local Government (DILG) ang Bureau of Jail Management and Penology (BJMP) ang malalimang imbestigasyon kaugnay sa nangyaring riot sa Caloocan City Jail kahapon.

Ayon kay DILG Spokesman USec. Jonathan Malaya, may inilabas nang kautusan si DILG Sec. Eduardo Año kay BJMP Director Allan Iral para bumuo ng Special Investigating Team para siyasatin ang ugat ng nangyaring riot.

Kasabay nito, nagpaabot ng pakikiramay ang DILG sa mga naulilang pamilya ng 6 na bilanggo na nasawi matapos ang nangyaring riot.

Samantala, nangako naman si Philippine National Police o PNP Chief P/Gen. Dionardo Carlos na malaliman din nilang iimbestigahan ang naturang insidente.

Ani Carlos, partikular sa kanilang sisilipin ang presensya at kasaysayan ng mga magkakalaban na gang sa loob ng piitan na siyang pinagsimulan ng gulo.

Plano ng pamahalaan na mabakunahan ang mga batang edad apat na taong gulang pababa bago matapos ang buwan ng Hunyo.

Sa Talk to the People kagabi, sinabi ni Vaccine Czar Secretary Carlito Galvez Jr. na target ng gobyerno na mabigyan ng kumpletong bakuna ang siyamnapung milyong Pilipino kabilang na ang naturang age group.

Sa ngayon ay mahigit 52 milyong Pilipino na ang fully-vaccinated laban sa COVID-19.

Binulabog ng malakas na pagsabog ang Barangay San Mateo sa bayan ng Aleosan, lalawigan ng Cotabato kaninang umaga.

Batay sa ulat ng Aleosan Municipal Police Station, dakong alas-8: 15 kanina nang biglang sumabog ang isang yunit ng Mindanao Star Bus.

Kinilala ng Aleosan PNP ang mga biktima na sina:

1. Solaiman, Benjamin 5 yrs. old (critical)
2. Solaiman, Haron 24 yrs. old
3. Piang, Masid 25 yrs. old
4. Solaiman, Yushira 3 yrs. old
5. Castillo, Rodolfo 67 yrs. old
6. Solaiman, Haira 5months
7. Alcare, Lester Bautista 17 yrs. old

Batay sa inisyal na imbestigasyon, sumabog ang naturang bus na may biyaheng Davao – Cotabato sa bahagi ng National Highway malapit sa lumang munisipyo.

Sinasabing nagmula ang pagsabog sa likurang bahagi ng bus kung saan naruon ang mga nasugatan na agad namang dinala sa Cotabato Regional Medical Center.

Nakaligtas ang Driver at Konduktor ng naturang bus na siyang isinasailalim sa imbestigasyon habang itinuturing namang Terroristic act ng pulisya ang insidente.   —ulat mula kay Jaymark Dagala (Patrol 9)

Mananatiling sarado ang tanggapan ng Land Transportation Franchising and Regulatory Board (LTFRB) at Land Transportation Office (LTO) dahil sa tumataas na kaso ng COVID-19 sa mga tauhan ng naturang mga ahensiya.

Sa pahayag ng LTFRB hindi muna sila tatanggap ng pisikal na transaksiyon at hindi rin magiging aktibo ang kanilang 24/7 hotline na 1342, maaari umanong tignan na lamang ang kanilang social media page para sa dagdag na inpormasyon.

Sarado rin ang LTO Central Office, Lisencing Office, North Motor Vehicle Inspection Center at Public Utility Vehicle Registration Center.

Ayon sa LTO, pinalawig na nila ang validity ng rehistro ng mga sasakyang nagtatapos ang plaka sa “0”, sakop nito ang Region 4B, Region 5, Region 6, Region 7, Region 8, Region 10 at CARAGA.  —sa panulat ni Mara Valle

Umapela sina presidential aspirant Ferdinand ‘Bongbong’ Marcos, Jr. at running mate nasi Davao Mayor Sara Duterte sa mga lokal na opisyal sa mga lugar na sinalanta ng bagyong ‘Odette’ na tiyaking nasusunod ang mga health protocol sa mga evacuation center.

Ginawa ng BBM-Sara UniTeam ang panawagan bunsod ng pangambang kumalat ang ibat-ibang uri ng mgasakit, partikular na ng COVID-19 kasunod ng patuloy na pagtaas ng kaso nito.

Giit pa ng BBM-Sara UniTeam, kapag nangyari ito ay lalo pang lalaki ang problemang kakaharapin kaya’t dapat aniya itong mapigilan.

Dapat din anilang mahigpit na ipatupad ang mga health protocol, tulad ng pagdi-disinfect sa mga temporary shelter at paglalaan ng mga hugasan ng kamay at pamimigay ng mga alcohol at face mask.

Samantala, patuloy naman ang pamamahagi nina Marcos at Duterte ng tulong ng sa mga biktima ng nagdaang bagyo.

Maliban sa mga cash at relief goods, namigay rin ang BBM-Sara UniTeam ng libu-libong galon ng tubig at water filtration kits at maging mga construction material.

Kamakailan din ay namahagi ng mga generator set at satellite dish ang BBM-Sara tandem sa mga lugar na walang signal ng telepono at walang kuryente.

Patuloy ang mga ginagawang hakbang ng tambalan nina presidential aspirant Ferdinand ‘Bongbong’ Marcos Jr. at vice presidential bet Sara Duterte upang matugunan ang mga pangangailangan ng mga nasalanta ng bagyong Odette sa Visayas at Mindanao.

Ayon sa BBM-Sara UniTeam, dapat na gawing prayoridad ang pamamahagi ng mga kailangang gamot at bitamina sa mga apektadong lugar.

Anila, dapat ding tutukan ang kalusugan ng mga biktima ng bagyo partikular na ng mga senior citizen, mga bata at mga sumasailalim sa mga maintainance medication at iba pang mga nangangailangan ng mga gamot.

Kaugnay nito, nanawagan ang BBM-Sara UniTeam upang makahanap ng mga gamot at iba pang tulong medikal para sa mga naapektuhang lugar.

Nagpaabot naman ng pasasalamat si Marcos sa mga kumpanyang nagbigay ng tulong para sa mga nasalanta ng nagdaang bagyo.

“Patuloy pa rin tayong maghahanap at tatanggap ng mga tulong mula sa iba’t ibang kumpanya para naman matugunan natin ng sapat ang pangangailangang pangkalusugan ng ating mga kababayan,” pahayag ni Marcos.