DWIZ 882

Kaloboso ang isang lalaki sa barangay Bagumbayan, Quezon City matapos mahulihan ng shabu na itinago sa face mask.

Kinilala ang suspek na si Mark Gregory Mendoza, 36 anyos.

Ayon sa Quezon City Police District-Station 12, sisistahin sana si Mendoza dahil sa paninigarilyo sa pampublikong lugar pero nang makita nito ang mga pulis ay biglang tumakbo.

Agad na naharang ang suspek at nang inspeksyunin ang hawak nitong face mask ay bigla umanong nalaglag ang dalawang gramo ng shabu na nagkakahalaga ng P13.6K.

Bukod sa reklamo dahil sa hindi pagsusuot ng facemask, nahaharap din si Mendoza sa mga kasong paglabag sa Comprehensive Dangerous Drugs Act at City Ordinance.   —sa panulat ni Mara Valle

Aabot sa 30 milyong pisong halaga ng mga pekeng Paracetamol at iba pang gamot ang nasabat ng Bureau of Customs (BOC) sa Parañaque City.

Nakumpiska ng BOC ang mga kontrabando katuwang ang Philippine Drug Enforcement Agency (PDEA), National Intelligence Coordinating Agency (NICA), Intelligence Service-Armed Forces of the Philippines (AFP) at Philippine Coast Guard (PCG).

Nadiskubre ang mga gamot na nakasilid sa mga kahong may chinese characters sa loob ng dalawang storage spaces sa Highland Street, Severina Subdivision, Barangay Marcelo Green.

Ayon kay Raniel Ramiro, Customs Deputy Commissioner ng Intelligence Group, nasakote naman ang isang suspek na pakistani na kinilalang si Adel Rajput, 31 anyos, residente ng Caloocan City.

Nakasaad sa sertipikasyon mula sa Food and Drug Administration (FDA) at Unilab Pharmaceuticals na peke ang mga gamot.

Naging matumal ang paninda ng ilang mga vendor at iba pang negosyo sa Divisoria, Maynila matapos kumonti ang bilang ng mga namimili sa lugar.

Ito ay dahil sa muling pagsirit ng kaso ng COVID-19 at sa panibagong variant na Omicron.

Ayon sa mga vendors, marami sa kanilang mga suki ang natatakot lumabas dahil baka mahawahan ng panibagong variant ng COVID-19 na limang beses na mas nakakahawa kung ikukumpara sa delta variant.

Sinabi pa ng mga negosyante na walang siksikan at hindi na katulad ng dati ang kanilang kinikita sa kada araw dahil sa kakaunting nagpupunta o bumibisita dito.—sa panulat ni Angelica Doctolero

Kinansela narin ang pasok sa Ombudsman dahil sa patuloy na tumataas na kaso ng COVID-19 sa bansa.

Base sa Memorandum na pirmado ni Ombudsman Samuel Martires, pansamantala munang sarado ang lahat ng mga opisina sa kanilang tanggapan na tatagal hanggang Jan. 19, 2022.

Ayon kay martires, ang lahat ng mga empleyadong pupunta at magrereport sa opisina ay dapat walang nararamdaman na kahit na anong sintomas ng COVID-19.

Bukod pa diyan, kailangan din na magpakita ng negatibong RT-PCR o Antigen test results at hindi rin dapat na-exposed sa pasyenteng nagpositibo sa COVID-19 sa loob ng nakalipas na sampung araw bago pumasok sa opisina.

Sakaling ibalik ang operasyon, ay magsisimula ang oras ng pasok ng mga empleyado alas-otso ng umaga hanggang alas-tres ng hapon.

Sa ngayon, nasa ilalim ng paglilinis at disinfection ang bawat area sa opisina ng Ombudsman.—sa panulat ni Angelica Doctolero

Natanggap na ng Pilipinas ang karagdagang 168,000 na Janssen COVID-19 vaccine na donasyon ng American government.

Ang naturang mga bakuna ay binuo ng Johnson & Johnson, na dumating sa Ninoy Aquino International Airport o NAIA terminal 3 alas-kuwatro kahapon ng hapon na sinuri o pinag-aralan ng United Nations COVAX facility.

Ang mga bagong donasyong bakuna ay  gagamitin sa inoculation rollout ng gobyerno sa gitna ng pagdami ng mga kaso ng COVID-19.

Samantala, hinimok naman ni National Task Force Against COVID-19 Medical Consultant Dr. Ma. Paz Corrales na piliin ang available na bakuna upang maiwasan ang lumalalang bilang sa kaso ng nakakahawang sakit.

Layunin parin ng pamahalaan, na maabot ang target na 54 million fully vaccinated individuals.—sa panulat ni Angelica Doctolero

Umabot na sa 14 na indibidwal ang naitalang lumabag sa ipinatupad na National COMELEC Gun Ban.

Ayon sa Philippine National Police, ang 14 na inaresto ay mula sa ibat ibatng lungsod sa Metro Manila kabilang na ang Quezon city, Pasay city at Navotas City.

Ayon kay Police Major Gen. Vicente Danao Jr., patuloy na paiigtingin ng kanilang ahensya ang pagbabantay sa mga checkpoint sa gitna ng pagpapatupad ng election gun ban.

Matatandaang halos dalawan-libong checkpoints ang minomonitor ng labing apat na libong tauhan ng Philippine National Police (PNP), Armed Forces of the Philippines (AFP) at COMELEC para ipatupad ang resolusyon ng poll body na nagbabawal sa pagdadala o pagbitbit ng mga baril at iba pang nakamamatay na armas na tatagal naman hanggang sa Hunyo a-otso.

Sa nasabing resolusyon, sinuspinde muna ang lahat ng licensed firearm holders, juridical entities at mga miyembro ng government law enforcement agencies.

Samantala, nilinaw naman ni PNP Chief Gen. Dionardo Carlos na tanging ang mga naka-duty lamang na tauhan ng pnp at afp ang pinapayagang magdala ng baril.—sa panulat ni Angelica Doctolero

Muling nilinaw ni Health Secretary Francisco Duque III na hindi nagkulang at sapat ang suplay ng gamot sa bansa.

Kasunod ito ng balitang nagkakaubusan na ng suplay ng mga gamot partikular na ang paracetamol at iba pang brand sa ilang mga pharmacy at drug stores sa Metro Manila.

Ayon kay Duque, walang katotohanan ang kumakalat na balitang nagkakaubusan ng gamot sa mga botika kaya hindi dapat magpanic ang publiko.—sa panulat ni Angelica Doctolero