DWIZ 882

Binalaan ng isang doktor ang publiko laban sa labis na pag-inom ng Vitamin C.

Inihayag ni Dra. Maricar Limpin, Pangulo ng Philippine College of Physicians na maaaring magdulot ng sakit ng tiyan kung sobra ang iniinom na Vitamins.

Ayon kay Limpin, marami ngayong bumabawi na lamang sa pag-inom ng Vitamins laban sa mga sakit, tulad ng COVID-19 dahil pahirapan pa ring bumili ng paracetamol sa mga botika.

Sa kabila nito, mainam naman anya ang regular na pag-inom ng vitamins lalo ngayong tumataas ang mga kaso ng COVID-19 basta’t huwag lamang sosobra sa ipinapayo ng mga doktor.

Binigyang-diin ni Limpin na kahit walang nararamdamang lagnat, ubo o sipon, dapat pa ring uminom ng Vitamins at maraming tubig.   —sa panulat ni Mara Valle

Umabot na sa 50 health care workers ang tinamaan ng COVID-19 sa Batangas Medical Center (BMC).

Ayon kay Dr. Jade Javier, Chairman ng infection prevention and Control Committee ng nasabing pagamutan, patuloy na dumarami ang bilang ng tinatamaan sa kanilang ospital mula sa nakalipas na dalawang linggo.

Ayon kay Javier, umabot sa siyamnapung porsyento ang bed occupancy rate ng BMC na may 160 dedicated beds para sa COVID-19 patients.—sa panulat ni Angelica Doctolero

Nilimitahan na ng gobyerno ang pagbebenta at pagbili ng paracetamol at iba pang gamot sa lagnat, ubo at trangkaso matapos ang pagka-ubos ng supply dahil sa panic buying ng publiko.

Ito, ayon kay acting Presidential Spokesman at Cabinet Secretary Karlo Nograles, ay alinsunod sa joint memorandum ang Departments of Health at Trade and Industry.

Hanggang 20 tablets o isang banig lamang ng 500 miligrams paracetamol ang maaring bilhin ng isang indibidwal at hanggang 60 pieces o 3 banig para sa isang household.

Kabilang din sa Memorandum ang pagbabawal ng online selling ng mga naturang gamot, maliban na lamang kung may pahintulot ng Food and Drug Administration.  —sa panulat ni Mara Valle

Naibalik na ang suplay ng kuryente sa ilang lugar na naapektuhan ng pananalasa ng bagyong Odette kabilang na ang ilang lugar sa Region 4B, 6, 7, 10 at 13, Palawan, Cebu, Bohol, Samar, Northern Mindanao, Caraga, Dinagat, Siargao at Surigao del Norte.

Ayon kay Department of Energy (DOE) Director Rino Abad, plano nilang gawing isangdaang porysyentong operational ang suplay ng langis at gas na isa sa pinaka kailangan ng mga apektadong pamilya.

Siniguro naman ng DOE na magiging sapat sa loob ng dalawa hanggang tatlong linggo ang suplay ng kuryente sa iba pang mga lugar sa tulong ng generator sets.

Nasagip ng isang traffic aide ang isang lalaking Chinese mula sa mga kidnapper sa isang van na nakaparada sa domestic road sa Maynila.

Ayon sa MMDA Traffic Aide, narinig niyang humihingi ng tulong ang dayuhang tsino kaya agad siyang lumapit para tulungan ang biktima.

Nang bigong makuha ng mga suspek ang Chinese national ay agad silang tumakbo papalayo sa hindi malamang direksiyon pero nakuha ng traffic aide ang plate number ng van na ginamit ng mga suspek.

Sa ngayon, inaalam na ng mga tauhan ng lto kung kanino nakarehistro ang van na ginamit ng mga salarin.—sa panulat ni Angelica Doctolero

Nanawagan si Presidential Aspirant Ferdinand ‘Bongbong’ Marcos Jr. Sa mga lider ng sektor ng palakasan na iwasan ang pulitika sa kanilang hanay dahil nakaka-apekto lamang ito sa pagsasanay ng mga atleta.

Ayon kay Marcos, nakasentro dapat sa kanilang pag-eensayo at pagpapalakas ang mga pinoy athlete dahil ito ang susi upang masungkit ang panalo ng bansa.

Ikinatuwa ni Bongbong magandang ipinakita ng mga atleta sa iba’t ibang paligsahan sa mundo sa kabila ng mabibigat na pagsubok na kinakaharap ng ating bansa.

Tiniyak din ng dating senador na kaniyang susuportahan ang mundo ng isports sakaling manalo sa darating na halalan kasama ang kanyang running-mate na si Davao Mayor Sara Duterte.

Umaasa si Bongbong na hindi na mauulit ang nangyari kay national team roster -top pole vaulter na si ernest john ‘ej’ obiena matapos mapag-desisyunan ng Philippine Athletic Track and Field Association (PATAFA) na tanggalan ito ng pondo.

Matatandaang inakusahan si Obiena ng PATAFA na hindi ginastos ng tama ang kanyang training allowance sa kabila ng mariing pagtanggi at paglalabas ng mga dokumento ni Obiena na hindi totoo ang paratang ng PATAFA.

Bukod pa diyan, maging ang coach ni Obiena na si Vitaly Petrov ay nagbigay at naglabas din ng testimonya ukol sa naturang isyu kung saan, idineklarang persona non grata ng Philippine Olympic Committee si PATAFA Pres. Philip Ella Juico dahil umano sa patuloy na pangha-harass nito kay obiena sa halip na suportahan ito.

Sinabi din ni marcos na magkakaroon lamang ng magandang performance ang mga atleta sa iba’t ibang kompetisyon sa mundo kung ipararamdam ng pamahalaan ang kanilang suporta at hindi iniipit sa pulitika.

Umapela sa mga Muslim Leader sa Mindanao si Atty. Alex Lacson, isang senatorial candidate na tumatakbo sa ilalim ng Kapatiran Party at ng tropang Leni-Kiko na bigyan ng pagkakataon ang Republic Act. No. 11596 na nagbabawal at nagsasakriminal sa pag-aasawa ng bata.

Ginawa ni Atty. Lacson ang apela matapos ipasa ng Bangsamoro Transition Authority (BTA) ng Bangsamoro Autonomous Region in Muslim Mindanao (BARMM) ang isang resolusyong umaapela kay Pangulong Rodrigo Duterte na itigil ang pagpapatupad ng naturang batas.

Ayon kay Atty. Lacson, nirerespeto niya ang kultura at nakagawian ng mga muslim sa bansa pero isa itong pagkakataon para sa ating mga kapatid na muslim na suriin o alamin ang kanilang nakasanayan upang mas maisulong ang paggalang sa pangunahing karapatan ng mga bata, kabilang na ang kanilang proteksyon mula sa pang-aabuso at pagnanamantala.

Dagdag pa ni Lacson, ang naturang batas ay makakatulong para maprotektahan ang mga batang bangsamoro o mga menor de edad na muslim mula sa pagsasa-ayos at sapilitang pagpapakasal.

Sinabi ni Atty. Lacson na ang pagpapakasal ay sagrado at isang panghabang buhay na pangako kung saan, posibleng maging kritikal ang kaligayahan ng isang tao.

Ayon pa kay Lacson, mahalaga ang malalim na pagpapasya sa pag-aasawa at dapat ay magkaroon ng mahabang panahon upang maunawaan ang kahihinatnan ng maagang pagpapakasal.

Isa si Atty. Alex Lacson sa mga nagsusulong ng Republic Act 11596 na kamakailan ay ipinasa ng kongreso makaraang lagdaan ni Pangulong Duterte bilang batas noong Disyembre a-diyes dos-mil-bente-uno kung saan ang sinomang lalabag sa bagong batas ay pagmu-multahin ng hindi bababa sa 40,000 pesos at pagkakakulong ng hanggang  12 taon.