DWIZ 882

Nagbukas ang Philippine National Police (PNP) ng mga karagdagang pasilidad sa Kampo Crame para duon i-quarantine ang kanilang mga tauhang magpopositibo sa COVID-19.

Ito’y sa gitna na rin ng muling pagtaas ng mga aktibong kaso ng COVID-19 sa kanilang hanay buhat nang pumutok ang pagkalat ng Omicron variant.

Ayon kay PNP Chief P/Gen. Dionardo Carlos, nasa 80 kama ang idinagdag sa Training Service facility habang nasa 100 kama naman ang inilagay sa Badminton Court.

Paliwanag ng PNP Chief, ang hakbang ay pro-active sakaling dumami pa ang mga tauhan nilang kailangang i-quarantine ngunit mananatili pa rin ang Kiangan quarantine facility bilang pangunahing pasilidad para sa mga may mild symptoms.

Habang maaaring mag-home quarantine naman ang mga tauhan ng PNP na asymptomatic at kailangang lang na iulat ang kanilang pang-araw araw na kondisyon sa nag-mo-monitor na medical team. —sa ulat ni Jaymark Dagala (Patrol 9)

Isasama na ang mga sanggol hanggang mga batang edad 4 sa plano ng gobyerno na mabakunahan laban sa COVID-19.

Inilatag ni Vaccine Czar Secretary Carlito Galvez ang plano ng National Task Force Against COVID-19 sa patuloy na vaccination rollout sa buong bansa.

Ayon sa kalihim target na masimulan sa Abril ang pagbabakuna kontra COVID-19 sa mga batang edad 4 pababa.

Ito ay matapos ang pagbakuna sa 77-M na mga Pinoy bago matapos ang Abril kasama na rito ang kabataang edad 12-17, at target matapos ang 90-M bago mag-Hunyo na susundan ng booster shots sa 7.16-M indibidwal.   —sa panulat ni Mara Valle

Narekober sa dalawang ‘tulak’ ang mahigit sa P5M na halaga ng shabu at marijuana ng Makati City Police.

Kinilala ang dalawang suspek na sina Jonnie Domingo, Alyas Onnie, 26- anyos, at si Joshua Ochinang, 23-anyos.

Ayon kay Southern Police District Director, PBGEN Jimili Macaraeg, nagawang makabili ng poseur buyer ng mga pulis sa mga suspek ng isang bloke ng pinatuyong marijuana na nagkakahalaga ng P32,000.

May kabuuang timbang na 2,500 gramo ang nasabat na marijuna na may halagang P300,000; habang nasa 30 grms ang nakumpiskang shabu na may halagang P204,000 at kush na nasa 5.4 grms at may halagang P6,480.00.

Nakakulong na ang dalawang suspek sa Station Custodial Facility ng Makati City at kapwa nahaharap sa kasong paglabag sa RA 9165 o Comprehensive Dangerous Drugs Act of 2002.   —sa panulat ni Mara Valle

KAILANGANG masusing bantayan ng gobyerno ang kapasidad ng mga ospital sa panahong ito na mabilis na tumataas ang kaso ng COVID-19 sa bansa dulot ng Omicron variant.

Ito ayon kay Senator Win Gatchalian ay dahil sa kung hindi na manageable o sobra ng punuan ang mga pagamutan, kailangang agarang kumilos ang pamahalaan sa pamamagitan ng pagtataas pa sa alert level.

Sa ngayon naman anya kahit nasa critical risk classification ang bansa, manageable pa naman ang kapasidad ng mga ospital.

Ayon kay Gatchalian, mas mabilis ang pagkalat ng Omicron variant kumpara sa pag-detect nito sa pamamagitan ng testing.

Kaya dapat anyang mas bilisan ang testing para agad ma-isolate ang mga nagpopositibo para hindi na sila makapanghawa.

Nanawagan si re-electionist senator Juan Miguel Zubiri sa mga kapwa niya kandidato na i-donate para sa mga survivor ng typhoon Odette ang isang buwan nilang gastos sa political ad.

Ayon kay Senator Zubiri, matapos niya makita ang pinsalang dinulot ng bagyong Odette sa Visayas at Mindanao ay agad siyang nagpasya na gamiting pantulong sa mga napinsala ang isang buwang gastos sa advertising.

Ayon kay Zubiri, batid niya na ang advertising ang malaking bahagi ngayon ng kampanya ng mga kandidato dahil sa limitado ang kanilang pag-ikot dulot ng pandemya.

Pero mas matindi aniya ang pangangailangan ng mga napinsala ng kalamidad dahil nakararanas sila ng gutom at maraming nawalan ng tahanan.

“Kailangan aniya nila ng lahat ng tulong na maibibigay natin,” ani Zubiri.

Nitong nakalipas na holiday season minabuti ni Sen. Zubiri na gamitin ang personal na pondo para sa advertising budget sa pamamahagi ng bigas, groceries, tubig, face mask at tents sa mga sinalanta ng bagyo.

Nanawagan si House Assistant Minority Leader France Castro sa Department of Education o DepEd na magpatupad muna ng dalawang linggong “Academic health break” sa mga lugar na nasa ilalim ng Alert level 3.

Ito, ayon kay Castro, kinatawan ng ACT-Teachers partylist, ang paraan upang mabigyan ng panahon na makapagpahinga at makapagpagaling ang mga estudyante, magulang at guro na nagkasakit sa gitna ng COVID-19 surge.

Wala anyang Sick leave benefits ang mga public school teacher sa ilalim ng kasalukuyang rules and regulations dahil mayroon na credits sa serbisyo at proportional na vacation pay.

Umapela rin ang mambabatas sa DepEd na paigtingin ang monitoring ng COVID-19 cases sa mga guro at mga school personnel dahil ang tamang datos ang makatutulong upang maibigay ang angkop na tulong sa sektor ng edukasyon.   —sa panulat ni Mara Valle