DWIZ 882

Umabot na sa 40,000 doses ng Covid-19 vaccines ang nasira dahil sa epektong idinulot ng bagyong Odette sa ilang probinsya sa Visayas at Mindanao.

Pero ayon kay Vaccine Czar Carlito Galvez Jr., maliit na porsyento lamang ito ng mga bakuna dahil nasa milyong doses pa ang kanilang hawak.

Karamihan ng nasayang na bakuna ay nagmula sa Caraga Region na pinakanaapektuhan ng bagyong Odette.

Nasa 6 milyong doses ng bakuna ang inilaan sa 6 na rehiyon sa bansa na naapektuhan ng bagyo. –Sa panulat ni Abby Malanday

Mariing kinondena ng Philippine National Police (PNP) ang nangyaring pagsabog ng isang yunit ng Mindanao Star bus sa Upper San Mateo, Aleosan, Cotabato kahapon.

Ayon kay PNP Chief P/Gen. Dionardo Carlos, malinaw ang indiksyong pag-atake ng terorista ang nangyari kaya’t puspusan na aniya ang ginagawa nilang imbestigasyon.

Hindi nila tatantanan ang kaso hangga’t hindi nalalaglag sa kamay ng batas ang aniya’y walang pusong nasa likod ng insidente.

Magugunitang patay ang isang 5 taong gulang na bata habang 6 ang nasugatan kabilang na ang 5 buwang sanggol matapos ang insidente.

Lumabas sa inisyal na imbestigasyon na isang lalaki ang nag-iwan ng bitbit niyang bagahe sa bus nang sumakay ito sa Kabacan at kalauna’y bumaba naman sa bayan ng Pikit. —sa ulat ni Jaymark Dagala (Patrol 9)

Hindi muna kukuha ng karagdagang contact tracers ngayong taon ang Department of the Interior and Local Government (DILG) dahil sa kakulangan ng pondo.

Ayon kay DILG Undersecretary Jonathan Malaya, nasa P250 milyon lamang ang inilaang pondo ngayong taon na hindi sasapat para i-cover ang nasa 15,000 contact tracers na na-hire noong 2021.

Dahil dito, hinimok muna ni Malaya ang local government units na pasanin ang gastos.

Mas marami kasi aniyang pondo ang mga ito sa ilalim ng Mandanas ruling. — Sa panulat ni Abby Malanday

Tumutol ang grupo ng mga healthcare workers sa panukalang paikliin ang kanilang quarantine period sa limang araw mula sa sampung araw, kung magpopositibo o may makasalamuhang nagpositibo sa Covid-19.

Sa panayam ng DWIZ, sinabi ni Alliance of Health Workers (AHW) National President Robert Mendoza na hindi sapat ang limang araw para magpagaling sila sa virus.

Aniya pa, hindi sila immortal na mabilis makarekober

Sa isyu naman kung itataas sa alert level 4 ang Metro Manila, sinabi ni Mendoza na hindi pa ito napapanahon.

May mga solusyon pa kasi aniya na pwedeng gawin tulad paghahanda ng komprehensibong plano at hindi ang pagtataas ng restriksyon. –Sa panulat ni Abby Malanday

Nakatakdang ipatupad ng Department of Transportation (DOTr) ang ‘no vaccination, no ride’ policy sa mga pampublikong transportasyon sa Metro Manila na kasalukuyang nasa alert level 3.

Ayon kay Transportation Secretary Arthur Tugade, naglabas na siya ng kautusan para sa pagpapatupad ng panuntunan kung saan tanging ang mga fully vaccinated ang papayagang makabiyahe.

Magiging epektibo ang kautusan sakaling ilabas na ito sa official gazette o sa pahayagan sa general circulation at magpapasa ng kopya sa office of the national administrative register.

Exempted naman sa ‘no vaccination, no ride’ policy ang; indibidwal na may medical condition kaya hindi pa maaaring mabakunahan at ang mga bibili ng essential goods at services.

Sinumang mabibigong sumunod ay mahaharap sa kaukulang parusa. — Sa panulat ni Abby Malanday

Patuloy ang panawagan ng Philippine National Police (PNP) sa publiko lalo na sa mga nagmamay-ari ng baril na sundin ang ipinatutupad na gun ban ng Commission on Elections (COMELEC).

Ito’y ayon sa PNP matapos na makapagtala ng 12 naaresto ngayong araw dahil sa paglabag sa gun ban mula sa 2,662 checkpoints na nakalatag sa iba’t ibang panig ng bansa.

Mula sa 11 naaresto, aabot sa 12 armas ang nakumpiska kung saan 1 rito ang replica ng baril habang nasa 74 naman ang mga bala.

Pinakamarami sa mga naaresto ay mula sa National Capital Region na may 6, tig-2 mula sa CALABARZON at BARMM, habang tig-1 naman mula sa MIMAROPA at SOCCSKSARGEN.

Buhat nang magsimula ang gun ban nuong Enero a-9, aabot na sa 27 ang bilang ng mga naarestong lumalabag sa gun ban mula sa kabuuang 10,878 na checkpoints na kanilang inilatag. —sa ulat ni Jaymark Dagala (Patrol 9)

Patuloy sa pagsipa ang mga naitatalang kaso ng COVID-19 sa hanay ng Philippine National Police (PNP).

Batay sa datos ng PNP Health Service, ito’y matapos na madagdagan ng 444 bagong kaso ng virus kaya’t umakyat na ang kabuuang bilang nito sa 44,317.

Mula sa nabanggit na bilang ay nasa 2,843 rito ang aktibong kaso at malapit na nitong maabot ang record high na 3 libo buhat nang pumutok ang Delta variant nuong isang taon.

Samantala, aabot naman sa 12 ang naitalang bagong gumaling sa sakit kaya’t pumalo sa 41,349 ang kanilang total recoveries.

Habang wala namang naitalang bagong nasawi kung kaya’t nakapako naman sa 125 ang kanilang death toll. —sa ulat ni Jaymark Dagala (Patrol 9)