DWIZ 882

Inanunsiyo ni Manila City Mayor Isko Moreno na bubuksan na sa publiko ang Manila Zoo ngayong araw, January 19.

Magsisimula ang pagbubukas sa naturang pasyalan mula alas-8 ng umaga hanggang alas-8 ng gabi kung saan, inaasahang dadagsa ang mga nais bumisita sa lugar.

Ayon kay Moreno, nasa isanlibong bisita kada araw ang libreng makakapasok sa Manila Zoo kasabay ng pagbabantay ng pamahalaang lokal ng Maynila para malaman kung tumataas ang bilang ng mga pumapasok dito.

Ang Manila Zoo ay may lawak na limang ektarya na kayang tumanggap ng hanggang 16,000 indibidwal.

Para sa mga nais bumisita at makapag-avail ng libreng ticket, magrehistro lamang sa kanilang official website na www.manilazoo.ph dahil hindi umano tumatanggap ng mga walk in registration ang Manila LGU.

Ang bawat naka-enroll na indibidwal ay bibigyan ng kani-kanilang QR code na ipapakita sa kanilang pagpasok bilang tiket.

Ang mga senior citizen, gayundin ang mga menor de edad na 12 hanggang 17, ay papayagang makapasok sa Manila Zoo dahil maaari silang magkaroon ng kanilang COVID-19 shots sa loob ng pasilidad pero ang mga gustong magpabakuna ay kailangan munang magparehistro sa www.manilacovid19vaccine.ph.

Hinikayat din ni Moreno ang mga bibisita na magdala ng sarili nilang pagkain dahil hindi pa available ang mga food stall sa loob pero maaari namang kumain sa labas ng nasabing pasyalan. —sa panulat ni Angelica Doctolero

Naaresto na ng mga tauhan ng Philippine National Police (PNP) ang dalawang dayuhan na sinampahan ng kaso sa kanilang bansa.

Nabatid na humingi ng tulong sa pamahalaan ang Taipei Economic and Cultural Office para mahuli ang isang 33-anyos na Taiwanese na nahaharap sa kasong Illegal Possession of Firearms sa pingtung district court sa Taiwan.

Nahuli din sa isa pang operasyon, ang isang 37-anyos na Korean National sa isang condominium sa Barangay Marcelo Green dahil naman sa kasong fraud na inihain ng Seoul Bukbu District Court sa South Korea.

Sa ngayon, nai-turnover na ang dalawa pugante sa tanggapan ng Bureau of Immigration para ibalik sa kanilang bansa at harapin ang isinampang kaso laban sa kanila. —sa panulat ni Angelica Doctolero

Hindi lamang basta ibinasura ng Comelec sa pamamagitan ng unanimous vote ang petisyon upang kanselahin ang Certificate of Candidacy ni presidential aspirant at dating senador Ferdinand “Bongbong” Marcos Jr. sa May 9, 2022 elections.

Iginiit ng Comelec na hindi si Marcos ang gumawa ng misrepresentation bagkus ang mga petitioner matapos talakayin nang maigi ng Second division ang Disqualification Case na anila’y isang pagtatangka na linlangin ang Poll body.

Sa 32 pahinang desisyon na pinonente ni 2^nd Division Presiding Commissioner Socorro Inting, ipinunto nito na bagaman ang petisyon para sa cancellation o denial ng COC sa takdang panahon ay humihiling para sa diskwalipikasyon, agaran na dapat itong ibasura.

Isinaad sa ruling ang ilang pagtatangka ng petitioners na linlangin ang Comelec sa kanilang alegasyon at misrepresentations ng facts at maling quotations ng ilang probisyon sa batas.

Partikular na tinukoy sa ruling ang misrepresentation ng petitioners sa Section 254 ng 1977 National Internal Revenue Code na pinalalabas na ang Imprisonment ay Mandatory Punishment sa sinumang mabibigong maghain ng ITR na multang hindi bababa sa P10K.

Gayunman, sa pagsusuri sa isinasaad ng Section 254 ng 1977 NIRC, tinutukoy lamang nito ay rentals at royalties at mineral lands sa ilalim ng lease.

Ang petisyon ay inihain ng grupo ng mga kritiko ni Marcos, na kinatakatawan ni dating Supreme Court Spokesman, Atty. Theodore Te.

Target ng gobyerno na mabakunahan ang lahat ng mga botante bago sumapit ang eleksyon sa May 9.

Ito, ayon kay Acting Presidential Spokesman Karlo Nograles, ay sa harap ng patuloy na pagtaas ng kaso ng COVID-19 sa bansa.

Pinabibilisan anya ang Vaccination rollout upang matiyak na protektado ang adult population na lalabas para bumoto.

Sa ngayon ay mahigit 55-M pilipino na ang fully vaccinated laban sa COVID-19.  —sa panulat ni Mara Valle