DWIZ 882

Timbog ang dalawang nagbebenta ng mga pekeng gamot sa inilunsad na Buy-bust operation sa Quezon City.

Kinilala ang mga suspek na sina Jessieco Garcia Ibarola, 47-anyos at Fransisco Capillo Ramal, 45- anyos.

Ayon sa QCPD-Station 14, may nagtimbre sa kanila kaugnay sa iligal na aktibidad ng mga suspek kaya agad silang nagkasa ng operasyon.

Kabilang sa narekober mula kina Ibarola at Ramal ang iba’t ibang Counterfeit Essential Medicines, tulad ng 125 boxes ng Paracetamol, 55 boxes ng BioFlu, 25 boxes ng Alaxan FR at 19 boxes ng Medicol.

Nasakote ang dalawa sa gitna ng tumataas na demand ng mga nasabing gamot sa ubo, sipon at trangkaso kasabay ng paglobo ng COVID-19 cases sa bansa.   —sa panulat ni Mara Valle

Arestado ang dalawang lalaki dahil sa pagbebenta ng mga hindi otorisadong COVID-19 Antibody Test Kit sa Quezon City.

Kinilala ang mga suspek na sina Erwin Baluyo, 39- anyos at Rocky Victoring, 35- anyos.

Ayon sa Quezon City Police District – Criminal Investigation and Detection Group, nakatanggap sila ng tip hinggil sa online selling ng ilang indibidwal ng mga COVID-19 Antibody Test Kit.

Agad namang ikinasa ng mga otoridad ang isang Buy-bust operation sa Banawe Street, Barangay Sta. Mesa Heights na ikinaaresto ng mga suspek.  —sa panulat ni Mara Valle

Dalawang tulak ng shabu ang natimbog sa isinagawang buy-bust operation ng Quezon City Police District.

Kinilala ang mga suspek na sina Jean Claudine Concordia, alyas ‘J.C.’, 29- anyos at Francis Faustino, alyas ‘Kiko’, 49- anyos.

Ayon sa QCPD, isang Police Asset ang bumili ng shabu at nang magkaabutan ay dito na dinakip sina Concordia.

Narekober mula sa dalawa ang limang plastic sachet na naglalaman ng 32 grams ng shabu na nagkakahalaga ng P236K at marked money.

Nahaharap ang mga suspek sa kasong paglabag sa Comprehensive Dangerous Drug Act of 2002.   —sa panulat ni Mara Valle

Timbog sa isang entrapment operation ang isang Ginang dahil umano sa pagbebenta ng pekeng Vaccination card at Certificate sa Dasmariñas City, Cavite.

Kinilala ng Dasmarinas City Police ang suspek na si Julieta Mabion.

Agad na nagsagawa ng entrapment operation ang mga otoridad kung saan nagpanggap ang isang Intel Officer na magpapagawa ng Vaccination card.

Narekober kay Mabion ang mga COVID-19 Vaccination I.D. at Certificate of Vaccination cards, cellphone na ginagamit nito sa kanyang transaksyon at P500 na bayad para sa card.

Nahaharap sa kasong paglabag sa RA 11332 o Selling of fake Vaccination card and Certificate of Vaccination ang suspek.   —sa panulat ni Mara Valle