Patay ang 13 indibidwal habang sugatan naman ang tatlo pa sa banggaan ng dalawang sasakyan sa Central Angola.
Ayon kay National Police Spokesman Martinho Kavita Satito, ang mabilis na pagpapatakbo at kawalan ng disiplina ng mga driver na kinabibilangan ng isang Toyota Hi-Ace van at isang Kia Tourer ang dahilan ng aksidente.
Patuloy pang nagsasagawa ng imbestigasyon ang mga otoridad sa naganap na aksidente. —sa panulat ni Angelica Doctolero
Inihayag ng Department of Health (DOH) na hindi pa naaabot ang maximum testing capacity sa Pilipinas.
Kasunod ito ng pahayag ng ilang mga eksperto na bumagal ang pagtaas ng kaso ng COVID-19 kaya’t posibleng naabot na ng bansa ang testing capacity nito.
Ayon kay DOH Undersecretary Maria Rosario Vergeire, nasa 80,000 ang average testing capacity kada araw sa National Capital Region (NCR).
Sinabi din ni Vergeire na posible ding nasagad ang testing capacity dahilan kaya bumagal ang COVID-19 growth rate ng bansa.
Sa ngayon, inaayos na ng DOH ang panuntunan sa pamamahagi ng COVID-19 home kits na agad ibibigay sa vulnerable sectors. —sa panulat ni Angelica Doctolero
Exempted sa ‘No Vaccination, No Ride’ policy sa mga pampublikong transportasyon ang mga manggagawang papasok sa kanilang trabaho kahit hindi pa sila bakunado o naturukan na ng isang dose pa lamang ng bakuna.
Sa naging pahayag ni acting presidential spokeman at cabinet secretary Karlo Nograles at labor secretary Silvestre Bello, III, ito ang kanilang tugon matapos mapaulat ang pag iyak ng isang babaeng empleyado na nadismaya makaraang hindi pasakayin ng mga nagpapatupad ng batas dahil first dose pa lamang ang bakuna nito.
Sinabi ni Bello na mga essential workers ang mga ito na kailangan para gumalaw ang mga negosyo kayat hindi kasali ang mga ito sa ipinatutupad na ‘No Vaccination, No Ride’ policy.
Exempted rin sa naturang polisiya ang mga mayroong medical conditions na hindi pwedeng magpa bakuna basta’t magpakita lamang ng medical certificate. —sa panulat ni Angelica Doctolero
Pinag-aaralan na ng Department of Justice (DOJ) ang paglipat ng bilangguan kay Kerwin Espinosa matapos magtangkang tumakas sa NBI Jail Facility.
Ayon kay Justice Secretary Menardo Guevarra, naniniwala silang dapat mailipat ng selda si Espinosa lalo na’t nahaharap ito sa maraming kaso.
Sinabi ni Guevarra na ang paglilipat kay Espinosa ay nangangailangan ng commitment orders mula sa korte.
Dagdag pa ng kalihim na magrerekomenda sila ng pinaka secure na kulungan ng BJMP para duon ilipat si Espinosa. —sa panulat ni Angelica Doctolero
Hindi makaalis ng Pilipinas ang nasa mahigit 7,000 Overseas Filipino Workers (OFWs) dahil sa ipinatupad na entry ban sa Hongkong at Taiwan.
Sa pahayag ng Philippine Overseas Employment Administration (POEA), mahigit 5,000 OFWs pa-Taiwan habang nasa 2,000 OFWs naman sa Hongkong ang apektado ng travel restrictions ngayong pandemiya.
Naniniwala si POEA Administrator Bernard Olalia, na ang paghihigpit sa dalawang bansa ay pansamantala lamang dahil mayroong 40,000 bakanteng trabaho ang naghihintay sa mga Pinoy OFWs kabilang na ang bansang Taiwan.
Nakikipag-ugnayan na ang Pilipinas sa Hongkong at Taiwan para tiyaking nasusunod ng mga OFW ang protocols sakaling tanggalin na ang ban.
Samantala, sakaling alisin ang ban sa Hongkong ay hihingan ng vaccination card at negatibong RT-PCR test ang mga OFWs dalawang araw bago ang kanilang biyahe kasama na rito ang 20 araw na compulsory quarantine at anim pang COVID-19 test result.
Kailangan namang isailalim sa 14-day quarantine ang mga bibiyahe pa-Taiwan na may dalawang araw na pre-departure quarantine sa Pilipinas.
Sa ngayon, sinisikap pa ng gobyerno na maibalik ang deployment ng mga Pilipino sa Hongkong at Taiwan. —sa panulat ni Angelica Doctolero
Tiwala ang National Economic Development Authority (NEDA) na hindi gaanong nakaapekto sa ekonomiya ng bansa ang muling pagpapalawig ng alert level 3 sa Metro Manila at iba pang lalawigang sakop nito.
Ayon kay NEDA Undersecretary Rosemarie Edillon, mas magaan ngayon ang pagpapatupad ng resitriksiyon ng pamahalaan kung ikukumpara noong nakaraang taon.
Matatandaang nawalan ng trabaho ang maraming Pinoy noong taong 2020 at 2021 matapos magsara ang ilang mga negosyo at iba pang mga establisyemento habang tigil pasada din ang ilang mga pampublikong sasakyan dahil sa pagpapatupad ng hard lockdown dulot ng pagtaas ng kaso ng COVID-19 sa bansa.
Samantala, naniniwala ang opisyal na isa sa may malaking papel sa bansa ay ang mataas na vaccination rate sa mga matataong lugar sa tulong narin ng mga ahensya ng pamahalaan. —sa panulat ni Angelica Doctolero
Inihayag ng National Electrification Administration (NEA) na naibalik na ang linya at suplay ng kuryente sa 2.7 million na kabahayan sa Visayas at Mindanao makaraang manalasa ang bagyong Odette.
Ayon kay NEA Project Officer Mark Ian Francisco, 770 munisipalidad o 2,729,429 na ang kabuuang bilang ng mga bahay na stable na ang suplay ng kuryente habang 47 munisipalidad o 915,384 naman ang patuloy paring naghihintay na maibalik ang kanilang kuryente.
Sa ngayon, humigit-kumulang 82.18% ng mga munisipalidad at 77.61% naman ng mga kabahayan ang nasa normal na ang suplay ng kuryente. —sa panulat ni Angelica Doctolero
Nagdeklara na ng critical level ang Ospital sa Muntinlupa (OsMun) matapos mapuno at umabot sa 108% ang bilang ng mga kamang nakalaan para sa mga pasyenteng may COVID-19.
Ayon kay Dr. Edwin Dimatatac, physician sa Asian Hospital and Medical Center – Cardiac Catherization Laboratory sa Alabang Muntinlupa, mahigit 100 health care workers na ang nagpositibo sa COVID-19 kung saan, karamihan ay nakakaranas ng mild at moderate cases.
Dagdag pa ni Dimatatac, hindi nila pinababalik agad ang mga health workers na patuloy paring nakakaranas ng sintomas kahit natapos na ang lima hanggang sampung araw ng kanilang quarantine.
Sinabi pa ni Dimatatac na bukod sa mga medical staff, marami rin silang pasyenteng tinutulungan sa pamamagitan ng telemedicine o online consultation.
Samantala, pinayuhan naman ni Dimatatac ang publiko na magpabakuna na konta COVID-19 para narin sa kaligtasan ng bawat isa. —sa panulat ni Angelica Doctolero
Naaresto na ng mga otoridad sa Maynila ang lalaking suspek sa pananaksak at pagpatay sa isang magsasaka sa Calamaniugan, Cagayan.
Base sa impormasyon, inireklamo ng kasong attempted homicide si Vincent Labbao, 35-anyos at naninirahan ngayon sa Sta. Cruz, Maynila.
Ayon sa mga pulis, sa bisa ng warrant of arrest ay matagumpay na nahuli ang top 1 most wanted person sa bayan ng Sto. Niño sa nabanggit na lugar na sinasabing matagal nang nagtatago sa batas.
Hawak na ngayon ng Pandacan Police ang suspek na may piyansang 36,000 piso para sa kanyang pansamantalang kalayaan. —sa panulat ni Angelica Doctolero
Inanunsiyo ng Department of Education (DepEd) na nagpatupad ng isang linggong suspensiyon sa klase mula pre-school hanggang high school ang DepEd Schools Division Office sa Pampanga.
Ito ay kasunod ng 2,120 na kabuuang bilang ng mga gurong tinamaan ng flu at COVID-19 sa nasabing lugar.
Nagpatupad naman ng “health break” mula elementary hanggang college ang Angeles City dahil sa tumataas na bilang ng kaso ng COVID-19.
Sa huling tala ng DepEd Pampanga nito lamang Enero a-13, nasa 57 ang active COVID-19 cases sa kanilang teaching personnel, 1,497 ang afflicted with COVID-like symptoms at 566 naman ang mga sumasailalim sa quarantine.
Bukod pa ito sa datos ng Angeles City, Mabalacat City at City of San Fernando.
Ayon sa DepEd, malaking tulong sa isang indibidwal na mabigyan ng prayoridad ng provincial government ang pagbabakuna sa mga teaching at non-teaching personnel na sa kasalukuyan ay nasa 96.72% na ang fully vaccinated habang plano namang magtakda ng schedule sa pagbibigay ng booster shots para sa mga guro.
Tatagal ang suspensiyon ng klase sa mga pampublikong eskuwelahan sa lalawigan hanggang Enero a-22. —sa panulat ni Angelica Doctolero