DWIZ 882

Bukas ang Department of Labor and Employment (DOLE) na ihiwalay sa transportasyon ang mga hindi pa nababakunahan kontra Covid-19.

Kasunod ito ng mungkahi ni Senate President Vicente Sotto III na magkaroon ng ideya para maprotektahan ang mga unvaccinated laban sa virus.

Sa panayam ng DWIZ, sinabi ni Labor Secretary Silvestre Bello III na kung posible ang plano ay maaari itong isagawa.

Pero posible itong magbunga ng problema tulad ng pagkalugi.

Una nang ipinaalala ni Bello na exempted ang mga manggagawa sa “no vaccine, no ride” policy dahil maituturing silang essential service sa ekonomiya. –—sa panulat ni Abigail Malanday

Nanganganib mapabalik sa Estados Unidos ang isa nilang mamamayan matapos maaresto ng Philippine National Police Drug Enforcement Group (PNP-DEG) sa Castillejos, Zambales.

Kinilala ni PDEG Director P/BGen. Remus Medina ang naaresto na si John Louis May na kilala rin sa alyas na John Louis, 42 anyos at part-time construction worker.

Naaresto si Louis sa ikinasang drug buy-bust operations ng pinagsanib na puwersa ng PDEG, Zambales Provincial PNP at Castillejos Police Station sa Brgy. Del Pilar.

Nakuha mula sa Kano ang humigit kumulang 50 gramo ng hinihinalang shabi na nagkakahalaga ng 340 libong piso at boodle money na ginamit sa operasyon.

Hawak na ng Special Operations Unit ng Police Regional Office 3 at ng PDEG ang suspek para sa kaukulang dokumentasyon. —sa ulat ni Jaymark Dagala (Patrol 9)

Balik selda at bantay sarado ang 2 detenido matapos na maaresto ng mga operatiba ng Integrity Monitoring and Enforcement Group (IMEG) sa Matnog, Sorsogon.

Kinilala ni PNP IMEG Director, P/BGen. Oliver Enmodias ang 2 nahuli na sina JR Genablazo na nahaharap sa kasong may kinalaman sa iligal na droga at Pedro Garote na nahaharap naman sa kasong rape.

Naaresto ang 2 sa ikinasang entrapment operations ng IMEG sa Matnog Public Market makaraang makatanggap sila ng tip hinggil sa presensya ng mga ito.

Ayon kay Enmodias, ilang beses nilang napag alaman na labas masok sa detetion cell ang 2 detenido ng walang mga kaukulang dokumento o court orders.

Sa ngayon, nakikipag ugnayan na ang IMEG sa Police Regional Office 5 para sa pagsasagawa ng imbestigasyon kung paano nakakalabas ng detention cell ang 2.

Nakatakda rin sampahan ng kasong administratibo ang Matnog Municipal Police Station dahil sa nangyaring iregularidad. —sa ulat ni Jaymark Dagala (Patrol 9)

Ipinag-utos ni Philippine National Police (PNP) Chief P/Gen. Dionardo Carlos ang pagsibak sa puwesto sa 4 na pulis sa Agusan del Sur na sangkot sa pagnanakaw sa isang negosyante.

Ayon kay Carlos, kaniya nang inatasan ang CARAGA PNP Regional Director, P/BGen. Romeo Caramat na ilagay sa restrictive custody sina P/SMSgt. Ronald Laro, P/SSgt. Dariel John Mozo, P/SSgt. Richard Ayala at Pat Ivan Klein Osoro.

Batay sa report, sumuko nitong Lunes ang mga sangkot na pulis sa kanilang superior sa Butuan City matapos silang positibong tukuyin ng negosyanteng biktima na si Jasper Salude Pabilic at matunton sa pamamagitan ng CCTV footage.

Sa salaysay biktima, hapon ng January a-14 nang biglang pumasok sa kanyang bahay ang 4 na armadong lalaki na nakasuot pa ng bullet proof vest.

Hinoldap umano ng apat na suspek ang biktima kung saan ay puwersahang kinuha ang kanilang mga cellphones, pera na nagkakahalaga ng P2.7 milyon, mga Agar woods na mas kilala bilang Lapnisan at mga personal na kagamitan.

Kasalukuyan nang iniimbetigahan ng Criminal Investigation and Detection Group (CIDG) at ng Internal Affairs Service ng PNP ang apat na suspek na pulis. —sa ulat ni Jaymark Dagala (Patrol 9)

Nabawasan na ang bilang ng mga health workers na tinamaan ng COVID-19 sa Dr. Jose N. Rodriguez Memorial Hospital sa Tala, Caloocan.

Ayon kay hospital director Dr. Alfonso “Fritz” Famaran, sa ngayon ay umaabot na lamang sa 298 ang bilang ng mga healthworkers na nahawaan ng sakit mula sa dating animnaraan.

Tiniyak din nito na hindi kinailangang magsara ng ilang bahagi ng ospital dahil nagpadala ng dagdag na personnel ang Department of Health (DOH).

Sinabi pa ng opisyal na bumababa na rin ang bilang ng mga na a admit na COVID patients sa kanilang ospital.

Sa ngayon aniya ay mayroong 261 COVID cases sa nasabing pagamutan.

Malugod na tinanggap ni Defense Secretary Delfin Lorenzana ang pagkakatalaga ni Pangulong Rodrigo Duterte sa mga bagong Opisyal ng Armed Forces of the Philippines (AFP).

Itinalaga ng Pangulo si Army’s 10th Infany MGen. Ernesto Torres bilang Commander ng Northern Luzon Command (NOLCOM) kapalit ng nagretirong si Lt/Gen. Arnulfo Burgos Jr.

Si MGen. William Gonzales naman ng 11th Infantry Division ng Philippine Army ang itinalagang bagong Inspector General ng AFP kapalit ng nagretirong si Lt/Gen. Nemesio Gacal.

Uupo namang bagong Commandant ng Philippine Marine Corps si Navy Vice Commander MGen. Nestor Herico na kapalit ng nagretiro na ring si Marine MGen. Ariel Caculitan.

Hinirang din ni Pangulong Duterte ang kapatid ni PNP Chief P/Gen. Dionardo Carlos na si Navy Vice Admiral Alberto Carlos bilang bagong Commander ng Naval Western Command kapalit ng magreretiro nang si Vice Admiral Roberto Enriquez sa Enero a-24.

Habang si Rear Admiral Anthony Reyes ay itinalaga bilang bagong AFP Deputy Chief of Staff kapalit ng magreretiro nang si Vice Admiral Erick Kagaoan sa Pebrero a-25.

Kumpiyansa si Lorenzana na magagampanan ng mga bagong talagang opisyal ang kanilang mandatong bantayan at protektahan ang bansa at mamamayan mula sa anumang banta.

Pumalo na sa 126 ang total death toll ng COVID-19 sa hanay ng Philippine National Police (PNP) matapos madagdagan ng isa ngayong araw.

Batay sa datos ng PNP Health Service ang ika-126 na nasawi ay isang 38 anyos na Police Staff Sergeant mula sa Jaen Municipal Police Station sa Nueva Ecija.

Enero a-13 nang sumailalim sa RT-PCR test ang naturang pulis, subalit kinabukasan ay nasawi ito sa Nueva Ecija Medical Center.

Nabatid na nakakumpleto sa bakuna ang naturang pulis subalit dahil mayruon itong commorbidities na lumala kaya’t hindi na pinalad pang magpatuloy sa buhay.

Sa kasalukuyan ay nasa 46,291 na ang kabuuang kaso ng COVID-19 sa PNP matapos madagdagan ng 323 kung saan ay nasa 3,615 dito ang aktibong kaso.

Nakapagtala rin ng mataas na bilang ng mga gumaling sa sakit na nasa 503 kaya’t umakyat na sa 42, 550 naman ang kanilang total recoveries.

Aabot sa 200 pamilya ang nawalan ng bahay sa naganap na sunog sa Batangas kung saan, karamihan sa mga nasunugan ay mga miyembro ng Badjao community.

Ayon sa mga otoridad, mabilis na kumalat ang apoy dahil gawa sa mga light materials ang bahay ng mga residente kung saan, nagsimula ang sunog mula sa nag-overload na kuryente ng isang residente.

Sa ngayon, pansamantalang nanunuluyan sa mga eskwelahan sa lugar ang mga biktima ng sunog na humihiling ngayonng pagkain, lumang damit at malinis na tubig na maiinom. —sa panulat ni Angelica Doctolero

Nagpalipad ng ika-apat na missile o “unidentified projectile” ang Pyongyang, North Korea.

Ayon sa Joint Chief of Staff, inilunsad ang nasabing ballistic missile sa East Sea na sinasabing sakop ng bansang japan na kinumpirma naman ng Japanese Coastguard.

Inihayag ng Pyongyang na ang nasabing missile ay bilang pagpapakita na hindi sila sang-ayon sa pakikipagpulong sa united states kaugnay sa ipinatutupad na bagong batas sa paglulunsad ng ballistic missiles. —sa panulat ni Angelica Doctolero