DWIZ 882

Nakapagtala na ang Pilipinas ng dalawang kaso ng pagkasawi dahil sa Omicron variant ng Covid-19.

Ayon sa DOH, sa kabuuang 492 bagong kaso na nadagdag ngayong araw, tatlo sa mga kaso ay aktibo habang dalawampu ang dumaraan pa sa beripikasyon.

Dahil dito, umakyat na sa 535 ang kabuuang kaso ng Omicron variant sa Pilipinas.

332 naman sa bagong kaso ng Omicron ay local cases habang 160 ay returning overseas filipinos (ROFs).

Samantala, maliban sa Omicron variant ay nakapagtala rin ang DOH ng 115 bagong kaso ng Delta variant para sa kabuuang 8,612 kaso. —sa panulat ni Abigail Malanday

Bubuksan na sa mas maraming grade levels ang pagpapalawig ng face-to-face classes sa bansa.

Ayon kay Department of Education (DepEd) Undersecretary Nepomuceno Malaluan, mula sa kindergarten hanggang grade 3 at mga senior high schools students, inirekomenda itong buksan sa iba pang antas.

Epektibo ang plano sa mga lugar na nasa ilalim ng alert level 1 at 2.

Nitong Martes, unang sinuportahan ni Pangulong Rodrigo Duterte ang plano ng DepEd na expansion ng in-person classes ngayong darating na Pebrero. —sa panulat ni Abigail Malanday

Okupado na ang 97% ng kama sa Philippine General Hospital (PGH) para sa mga pasyente ng Covid-19.

Ayon kay PGH Spokesperson Dr. Jonas del Rosario, hanggang nitong Enero disi-siyete ay nasa 341 sa kabuuang 350 kama na ang okupado sa ospital.

Habang puno pa rin ang intensive care unit (icu) ng PGH para sa mga pasyente ng Covid-19.

Pinaplano naman ng PGH na itaas pa ang 350 bed capacity upang matugunan ang pagdami ng mga pasyente. —sa panulat ni Abigail Malanday

Welcome sa Pharmaceutical and Healthcare Association of the Philippines (PHAP) na gamiting covid-19 vaccination sites ang mga botika at klinika para sa pagtuturok ng booster shots.

Ayon kay Dr. Beaver tamesis, natutuwa sila sa programang ‘resbakuna sa botika’ na tulong upang makontrol ang pandemyang nararanasan ng bansa.

May sapat na ventilation ang kanilang botika at clinics para mapangalagaan ang mga bakuna at nagpapabakuna.

Bukas, magsisimula ang vaccination roll-out sa pitong kalahok na pharmacies na mapapalawig sa buong bansa sa mga susunod na linggo. —sa panulat ni Abigail Malanday

Binuksan na ng Manila Zoo ang pintuan nito para sa pagbabakuna ng mga edad dose hanggang disisiyete at mga senior citizens.

Ayon kay Manila Mayor Isko Moreno, hanggang kaninang alas-8 na umaga ay umabot na sa 6,300 ang nakapagrehistro sa manilazoo.ph.

Nasa 1,000 individual ang kayang i-accomodate kada araw sa lugar para mabakunahan.

Nitong Nobyembre a-3 sinimulan ang pagbabakuna sa edad 12 hanggang 17.

Bumaba sa 23% ang 7-day average ng kaso ng covid-19 sa Lungsod ng Manila.

Ayon sa OCTA Research Group, nagpapakita ito ng malinaw na ‘downward trend’ sa mga kaso.

Bumaba rin ang reproduction number o yung bilis ng hawaan sa Maynila na bumagsak sa 1.5 nitong Enero a-disi-otso, mula sa 1.73 nitong enero a-disi-siyete.

Maliban sa Manila, San Juan at Malabon na nakapagtala ng negative one week growth rates, dapat panatilihin ng ibang siyudad ang pagsunod sa health protocols para mapanatili ang trend ng kaso. —sa panulat ni Abigail Malanday

 Umabot na sa mahigit 11,500 manggagawa ang nawalan ng trabaho matapos isailalim sa alert level 3 ang Metro Manila at iba pang bahagi ng bansa.

Ayon kay Labor Secretary Silvestre Bello III, malayo ito sa estimate na 100,000 hanggang 200,000.

Maliban sa mga displaced workers, nasa 20,000 manggagawa ang nabawasan ang oras ng trabaho dahil sa flexible work arrangement.

Hanggang sa Enero a-31 isasailalim ang Metro Manila sa alert level 3. —sa panulat ni Abigail Malanday

Pinag-aaralan na ng Department of Transportation (DOTr) na magsagawa ng covid-19 vaccination sa ilan pang matataong lugar sa bansa.

Ayon kay Transportation Undersecretary Artemio Tuazon Jr., gagawin ito sa mga terminals, istasyon ng tren at maging sa expressways.

Maging si Transportation Secretary Arthur Tugade ay nagbigay na ng bilin sa Toll Regulatory Board (TRB) para rito.

Habang nakikipag-usap na ang DOTr sa Metropolitan Manila Development Authority (MMDA) at Parañaque Integrated Terminal Exchange (PITX) para sa pagbabakuna sa mga drivers at operators.

Epektibo ng ‘no vaccine, no ride’ policy hanggang nasa ilalim ng alert level 3 ang Metro Manila. —sa panulat ni Abigail Malanday