DWIZ 882

Bumaba ang bilang ng mga lumabag sa “No vaccination, no ride” policy na ipinatupad ng gobyerno sa ilalim ng mas pinaigting na Alert level 3.

Ayon sa Philippine National Police (PNP), nito lamang Biyernes, January 21, umabot nalang sa walo mula sa 160 bilang ng mga nahuling lumabag noong January 17.

Sa pahayag ni PNP Chief Gen. Dionardo Carlos, nagpapakita lamang ito ng magandang senyales na ang publiko ay dahan-dahang sumusunod sa ipinatutupad na batas sa bansa.

Sinabi ni Carlos na naging maganda ang lebel ng kooperasyon mula sa mga unvaccinated individuals kung saan, patuloy na tumataas ang bilang ng mga nababakunahan.

Sa kabila nito, nanatili ang PNP sa pagtalima na hindi aarestuhin ang mga lalabag at sa halip ay babalaan at tuturuan lamang ang mga indibidwal sa pagsunod sa mga patakaran.

Samantala, pinuri naman ni Carlos ang mga pulis na nagsasagawa ng maximum tolerance sa pagpapatupad ng mga polisiya sa bansa.  —sa panulat ni Angelica Doctolero

Usap-usapan ngayon sa social media ang binansagang “Real life Ibong Adarna” na nakuhanan sa isang isla sa Antique.

Ang nasabing ibon ay tinatawag na Golden Phesant o hango sa ancient green na “chrysolophus” o “with golden crest” at pictus na tinatawag sa latin na “painted” o “to paint.”

Ito ay isa sa mga inaalagaan ng mga taga-antique at matatagpuan sa Semirara Island, Caluya, Antique.

Kilala din ito bilang Chinese Pheasant at Rainbow Pheasant, na karaniwan namang nakikita sa bulubunduking bahagi ng Western China at bihira namang makita sa Pilipinas.  —sa panulat ni Angelica Doctolero

Nagkasa kahapon ng “No vaccination, no rides” policy ang Ninoy Aquino International Airport o NAIA terminal 2 sa pasay city.

Ito ay bilang pagtalima sa ipinatupad ng Department of Transportation (DOTr) kung saan, hindi pasasakayin o hindi papayagang makabiyahe ang mga pasaherong hindi bakunado.

Para sa mga papasok sa pre-departure area, kailangang ipresenta ang Vaccination cards kung saan, tanging mga fully vaccinated individuals lamang ang papayagang makasakay sa pampublikong transportasyon papunta, mula, at maging sa loob ng National Capital Region.

Layunin nitong maiwasan ang pagkalat ng transmission at makontrol ang pagsirit ng kaso ng COVID-19.  —sa panulat ni Angelica Doctolero

Arestado ng mga otoridad ang isang lalaki makaraang nakawan ng bag ang isang bikitima sa  kahabaan ng Juan Luna St. , malapit sa kanto Moriones St., Barangay 6, Zone 1, Tondo, Maynila.

Base sa nakuhang impormasyon ng mga otoridad, nanlaban ang bikitima dahilan para magpaputok ng baril ang suspek.

Dito na nakuha ng suspek ang sling bag ng biktima kasaman ang isang cellphone saka mabilis na tumakas sakay ng isang motorsiklo patungo sa Pritil St.

Agad na isinugod sa ospital ang biktima matapos magtamo ng mga tama ng bala na ngayon ay stable na ang kundisyon pero under observation pa rin ayon sa mga doktor.

Samantala, sa tulong ni Police Maj. Jerry garces ng Tuna Sub-Station 1, nadakip ang suspek sa Caloocan City kung saan, nakuha ang isang baril at mga gamit na ninakaw sa biktima.

Hawak na ngayon ng mga otoridad ang suspek at nahaharap sa kasong robbery na may karahasan, pananakot, at paglabag sa Comprehensive Law on Firearms and Ammunition.  —sa panulat ni Angelica Doctolero

Asahan na bukas, Martes, ang ika-apat na sunod na linggong taas-singil sa presyo ng produktong petrolyo ngayong buwan ng Enero.

Ayon sa mga kumpaniya ng langis, maglalaro sa P1.50 hanggang P1.60 ang dagdag-singil sa kada litro ng Gasolina; maaari namang tumaas ng P1.80 hanggang P1.90 ang kada litro ng Diesel.

Samantala, nasa P1.60 hanggang P1.70 naman ang itataas sa presyo ng kada litro ng Kerosene.

Ito ay bunsod ng kakulangan sa suplay ng langis sa gitna ng gulo sa Russia at Middle East kung saan, ilang mga analyst na rin ang nagsasabing maaaring pumalo sa $100 ang presyo sa kada barrel ng krudo sa mga susunod na buwan kaya posibleng magtuloy-tuloy pa ang oil price hike.   —sa panulat ni Angelica Doctolero