DWIZ 882

Patay ang isang tricycle driver matapos paulanan ng bala habang namamasada sa Damarinas City, Cavite.

Kinilala ang biktima na si Bernardo Santos, 54 anyos.

Ayon kay Staff Sgt. Richard Domingo ng Dasmariñas City Police Station, hindi naman nasugatan ang pasahero ng biktima na si Roumel Bustamante.

Sakay anya ng tricycle si Bustamante ay nakarinig siya ng sunod-sunod na putok ng baril at nakita nito ang duguang si Santos na unti-unting bumabagsak.

Inaalam pa ang pagkakakilanlan ng tumakas na salarin maging ang motibo sa krimen.-sa panulat ni Mara Valle

Niratipikahan ng Kamara De Representantes ang Bicameral Conference Committee Report kaugnay ng dagdag-benepisyo sa mga solo parent.

Aabot sa 15 milyong solo parent ang makikinabang sa ammendments sa Solo Parents Act.

Ayon kay agusan del norte rep. Lorenz fortun, Head Ng Technical Working Group na bumalangkas sa substitute bill, kabilang sa benepisyon ang pagbibigay sa solo parents at isang anak nito ng full scholarship;

Isasali rin sila sa mga bibigyan ng social safety assistance sa panahon ng kalamidad at pandemya at otomatikong kasali sa national health insurance program.

Samantala, ang mga solo parent na hindi lumalagpas sa 250,000 pesos ang taunang kita ay makatatanggap din ng 10% discount at exemption sa pagbabayad ng value added tax sa pagbili ng mga pangangailangan ng bata na anim na taong gulang pababa. -sa panulat ni Mara Valle

 Nahihirapan ang ilang manggagawa sa online application para sa 5,000 peso one-time cash assistance ng Department of Labor and Employment (DOLE) na COVID Adjustment Measures Program (CAMP).

Ayon sa DOLE, ginawang online ang proseso para makaiwas sa pagkalat ng COVID-19 pero puwede naman anilang tulungan ang mga manggagawa.

Nauna nang hinikayat ng DOLE ang mga employer na sila na ang mag-apply para sa lahat ng empleyado dahil na rin may mga kakailanganing dokumento, gaya ng temporary o permanent closure report at payroll o listahan ng mga sinasahurang manggagawa.

Puwede naman ang individual application pero hihingan pa rin ang manggagawa ng notice of termination o layoff o di kaya ay notaryadong affidavit na nagpapaliwanag kung paanong natigil sa trabaho.- sa panulat ni Mara Valle

Tumaas ang presyo ng ilang tinapay sa mga panaderya sa lungsod ng Maynila.

Ito, ayon sa Philippine Federation of Bakers Association, ay dahil sa pagmahal ng ingredients, gaya ng trigo na ginagawang harina, margarine, pampa-alsa at powdered milk.

Hindi naman nire-regulate ng Department of Trade and Industry (DTI) Ang presyo ng tinapay maliban na lang sa mas murang pinoy tasty at pinoy pandesal.

Sa ngayon, 35 pesos ang kada 450 grams ng Pinoy tasty habang 21 pesos 50 centavos ang kada sampung piraso ng Pinoy pandesal.

Samantala, tiniyak naman ng DTI Na babalansehin nila ang kapakanan ng mga manufacturer at consumer. – sa panulat ni Mara Valle

Inanunsiyo ng Department of Education (DEPED) na target nang simulan sa Pebrero ang pinalawak na face-to-face classes.

Ayon kay DEPED Secretary Leonor Briones, naka-depende ito sa bilang ng COVID-19 cases sa bawat lugar.

Una nang inihayag ng ilang grupo ng mga estudyante na handa naman na sila para sa face-to-face classes lalo’t mayorya sa kanila ay bakunado na.

Samantala, kasado na rin sa pagsisimula ng ikalawang semester ang limitadong face-to-face sa ilang kolehiyo at unibersidad.- sa panulat ni Mara Valle

Posibleng magsilbi munang Acting Chairman ng Commission on Elections si Commissioner Socorro Inting.

Ito’y ayon kay Outgoing Commisisoner Rowena Guanzon, ay sakaling mabigo si Pangulong Rodrigo Duterte na magtalaga ng COMELEC Chairman sa Pebrero a–tres, kapalit ni Sheriff Abas.

Pinaka-senior anya sa lahat ng Commissioner si Inting kaya’t ito ang maaaring pumalit kay abas na magreretiro sa Pebrero a-dos.

Si Inting, na dating Court of Appeals Justice ay itinalaga ni Pangulong Duterte sa poll body noong April 17, 2018.

Bukod kay Abas, magreretiro rin sina Commissioners Guanzon at Antonio Kho sa Pebrero a–dos habang maiiwan sa COMELEC En Banc sina Inting, Marlon Casquejo, Aimee Ferolino at Rey Bulay.

Inihayag ni Department of Transportation (DOTR) na umabot na sa mahigit 47 million ang total ridership ng Edsa Busway sa taong 2021.

Ayon sa Land Transportation Franchi­sing and Regulatory Board (LTFRB), nakapagtala ang Edsa carousel ng dalawang milyong commuter sa unang tatlong buwan ng nakaraang taon.

Nabatid na umabot sa 1.6 million ang bilang ng mga commuters noong buwan ng Abril; 2.6 sa buwan ng Mayo; 4.6 million sa buwan ng Hunyo; 3.6 million sa buwan ng Hulyo; 2.2 million sa buwan ng Agosto; 3.8 million sa buwan ng Setyembre; makaraang isailalim sa Modified Enhanced Community Quarantine (MECQ) ang National Capital Region (NCR) noong 2021.

Dumoble naman ang bilang ng commuters na sumasakay sa huling tatlong buwan kung saan,  6.4 milyon noong Oktubre, 7.4 milyon noong Nobyembre, at 7.6 milyon naman noong Disyembre.

Samantala, ikinatuwa naman ni DOTR Secretary Art Tugade, ang mataas na bilang ng mga commuter na nakinabang sa Edsa Busway sa gitna ng pandemiya.— sa panulat ni Angelica Doctolero