DWIZ 882

Unti-unti nang dumarami ang naitatalang mga gumaling sa COVID-19 sa hanay ng Philippine National Police o PNP kaysa sa mga naitatala nilang bagong kaso.

Batay sa datos ng PNP Health Service, nakapagtala sila ng 444 na mga bagong gumaling sa sakit kaya’t pumapalo na sa 44,609 ang kanilang total recoveries.

Mas mataas ito kumpara sa 158 na mga naitalang bagong kaso ngayong araw kung saan ay bumaba na rin sa 2,730 ang mga aktibong kaso ng virus.

Sumatutal ay aabot na sa 47,465 ang kabuuang bilang ng mga tinamaan ng COVID-19 sa hanay ng PNP habang wala namang naitalang bagong nasawi kaya’t nakapako sa 126 ang kanilang total death toll.

Pinangunahan ni Philippine National Police o PNP Chief P/Gen. Dionardo Carlos ang paggunita sa ika-7 anibersaryo ng kabayanihan ng 44 na Special Action Force o SAF Troopers ngayong araw.

Kasama ni Carlos ang panauhing pandangal sa paggunita ngayong taon na si Justice Sec. Menardo Guevarra na kapwa nag-alay ng bulaklak sa bantayog ng Gallant 44 sa SAF Headquarters sa Camp Bagong Diwa, Taguig City.

Dahil sa umiiral na COVID-19 pandemic, naging virtual ang pakikiisa ng mga ka-anak ng mga nasawing SAF Troopers at limitado lamang ang dumalo sa naturang okasyon habang sinusunod ang health protocols.

Sa kaniyang mensahe, sinabi ni Guevarra na nakapaghain sila ng 35 reklamong direct assault with murder laban sa 88 akusado na nasa likod ng pagkamatay ng SAF 44 at ito’y pinagsusumikapang mapagtagumpayan ng Ombudsman.

Magugunitang sa araw na ito nuong 2015, 44 na PNP SAF Troopers ang nagbuwis ng buhay matapos mapintakasi sa ikinasang Oplan Exodus sa Mamasapano Maguindanao kung saan napatay ang Malaysian bomb maker na si Zulkifli Bin Hir alyas Marwan at tugisin si Basit Uzman.

Nadagdagan ng 27 ang bilang ng mga nahuling lumalabag dahil sa ipinatutupad na COMELEC gun ban ngayong araw.

Ito ang dahilan ayon sa Philippine National Police o PNP kaya’t umakyat na sa 370 ang kabuuang bilang ng mga gun ban violators sa buong bansa.

Nagmula ito sa mga lugar ng NCR, Ilocos, Cagayan Valley, Central Luzon, CALABARZON at rehiyon ng SOCCSKSARGEN gayundin sa Eastern, Central at Western Visayas.

Pawang mga sibilyan ang mga nahuli sa nakalipas na magdamag kung saan ay nakakumpiska ang pulisya ng 16 na armas, 30 bala at 10 iba pang deadly weapons.

Patuloy ang paalala ng PNP na suspendido ang lahat ng permit to carry firearms outside of residences at bawal ang anumang matatalas o nakamamatay na bagay.

Aminado ang Philippine National Police o PNP na pahirapan para sa kanila ang pagmomonitor sa paglabas ng mga hindi bakunado kontra COVID-19 partikular na ang mga menor de edad.

Ayon kay PNP Chief P/Gen. Dionardo Carlos, nababahala sila sa pagkalat ng mga bata sa pampublikong lugar at nakikihalubilo pa sa ibang mga tao.

Paliwanag ni Carlos, hindi nila makokontrol ang galaw ng mga bata lalo pa’t kasama ng mga ito ang kanilang mga magulang.

Bukod pa sa pinapayagan naman ang paglabas ng mga bata kasama ang kanilang mga bakunado nang magulang sa ilalim ng Alert Level 2 at 3.

Kaya naman muling umapela ang PNP Chief lalo na sa mga magulang ng mga bata na ingatan ang kanilang mga anak at sumunod sa health protocols upang maiwasan pa rin ang pagkalat ng COVID-19.

Naglabas ang Bangko Sentral ng Pilipinas (BSP) ng pinakabagong listahan ng mga bangko na may waived fees para sa peso-net at instapay electronic cash transfers.

Ayon kay BSP Deputy Governor Mamerto Tangonan, tumaas ng two-digits o mas lumago ang mga transaksyon sa tulong ng electronic payment transaction sa buwan ng disyembre noong nakaraang taon.

Magugunita na lumakas ang paggamit ng instapay at peso-net sa gitna ng pandemya dahil sa cashless na pagbabayad na mas pinili ng publiko para maging ligtas laban sa COVID-19.

Sa ngayon, itinutulak ng BSP ang mga digital transaction sa ilalim ng digitalization roadmap 2023.

Itinalaga ni Manila Archbishop Jose Cardinal Advincula ang tatlong pari upang pamunuan ang “public affairs” sa Archdiocese.

Pinangalanan ng arsobispo ang tatlong pari na sina, Manila Cathedral Rector, Fr. Reginald Malicdem, bilang tagapagsalita ng archdiocese.

Hinirang din si Nuestra Señora De Perpetuo Socorro Parish Priest Fr. Jerome Secillano bilang pinuno naman ng ministry on public affairs.

Samantala, papalitan naman ni Fr. Enrico Martin Adoviso si Msgr. Hernando Coronel, bilang pinuno ng ministry on socio-political advocacy – katawan na nangangasiwa sa Parish Pastoral Council for Responsible Voting. -sa panulat ni Mara Valle

 Arestado sa buy-bust operation ang isang amerikano sa Castillejos, Zambales.

Kinilala ang suspek na si John Louis May, 42 anyos.

Ayon sa Castillejos Police, narekober kay may ang 50 grams ng hinihinalang shabu na may street value ng 340,000 pesos, nakuha rin sa kanya ang boodle money na ginamit sa operasyon.

Samantala, hawak na ng mga otoridad ang dayuhang suspek. – sa panulat ni Mara Valle