DWIZ 882

Pinayuhan ng Bangko Sentral ng Pilipinas (BSP) ang publiko na maging alerto kaugnay sa kumakalat na mga pekeng pera.

Ayon sa BSP, dapat na regular na inspeksiyunin ang banknotes upang ma-check kung tunay o peke ang mga money bill.

Sinabi pa ng BSP na nakapag-deploy na ang mga bangko ng “adequate risk management measures” upang mapigilan ang mga insidente ng counterfeiting.

Bukod sa cameras, sinanay din ang cash handlers at service providers para matukoy ang mga pekeng pera.

Nagpaalala naman sa publiko ang BSP na sakaling maglabas ang isang ATM machine na pinaghihinalaang pekeng pera ay agad itong i-report sa bangko na nagmamay-ari sa machine. —sa panulat ni Angelica Doctolero

Nagbukas ang National Academy of Sports (NAS) ng scholarship application para sa mga student-athlete para sa school year 2022-2023.

Ayon sa Department of Education (DepEd), naghahanap ang nasabing institusyon ng mga academically competent at athletically talented natural-born na batang Pilipino na karapat-dapat na makatanggap ng scholarship.

Layunin nitong mapalawak ang kakayahan ng mga kabataan pagdating sa akademiya at pampalakasan.

Hinihikayat ni Education Secretary Leonor Briones, ang lahat ng mga student-athletes mula sa mga society sectors kabilang na ang mga  indigenous peoples, persons with disabilities at marginalized groups na magpasa ng aplikasyon para sa scholarship.

Ayon sa NAS, nais nilang lumikha ng world-class athletes na kayang makipagkompitensya at maiuwi ang mga medalya mula sa iba’t-ibang kompetisyon sa iba’t-ibang panig ng mundo kabilang na ang Sea Games, Asian Games, Olympics, at sporting events.

Ang mga makukuhang student-athletes ay makakatanggap ng mga insentibo tulad ng libreng matrikula, free board at lodging sa NAS dormitory sa NAS Campus, New Clark City, Capas, Tarlac; probisyon ng dekalidad na edukasyon sa sekondarya; at access sa specialized sports training sa world-class na mga pasilidad.

Maaring isumite nang pisikal ang application forms at requirements sa opisina ng nas sa PhilSports Complex, Bonifacio Gate, Capt. Henry P. Javier St., Oranbo, Pasig City at maari ding magsumite sa kanilang opisyal na website. —sa panulat ni Angelica Doctolero

Matagumpay na nakakuha ng Compassionate Special Permit (CSP) ang pamahalaang lokal ng Maynila para sa pagbili ng Bexovid, na isang life-saving medicine laban sa COVID-19.

Pinasalamatan ng Manila LGUs ang Food and Drug Administration (FDA) para sa pagbigay ng nasabing permit bilang bagong karagdagan sa listahan ng mga anti-COVID medicines.

Layunin ng lokal na pamahalaan na ipamahagi ng libre ang bibilhing bakuna para sa mga COVID-19 patients.

Una nang namahagi ang lungsod ng libreng Tocilizumab, Remdesivir, Molnupiravir at Baricitinib bilang treatment sa mga tinamaan ng nakakahawang sakit.

Tiniyak naman ng Manila LGUs na hindi lamang ang mga residente ng lungsod ang maaaring maka-avail ng mga nabanggit na life-saving medicines, kundi maging ang mga non-residents.—sa panulat ni Angelica Doctolero

Pinatitiyak ni House Ways and Means Committee Chairman Joey Salceda sa Department of Health (DOH) ang pondo para sa pagdeploy ng karagdagang mga health care worker sa mga pampublikong ospital sa bansa partikular na sa Metro Manila.

Ayon kay Salceda, nagkakaubusan o nagkukulang na ang health care workers dahil tinamaan narin sila ng COVID-19 bunsod ng Omicron variant.

Dahil dito, hindi na sapat ang mga health care workers na tumitingin o nagbabantay sa mga pasyente dahil kinailangang lumiban ng mga ito sa kanilang trabaho.

Sinabi pa ni Salceda na dapat humanap na ngayon ng funding sources ang DOH upang agad na makapag-hire ng mga health care worker napapalit sa mga personnel na kailangang mag-isolate.

Bukod pa dito, dapat din na maglabas ang DOH ng guidelines at protocols upang matiyak na may sapat at hindi maaantala ang serbisyo ng mga health personnel sa mga ospital.  —sa panulat ni Angelica Doctolero

Hiniling ng isang mambabatas sa pamahalaan na dagdagan ang pondo para sa rehabilitasyon sa Dinagat Islands matapos manalanta ang bagyong Odette.

Nabatid na umapela si Dinagat Islands Rep. Alan Ecleo sa House Committee on Appropriations kay Pangulong Rodrigo Duterte na sertipikahang urgent ang House Resolution 2464 na humihiling ng karagdagang 9.4 billion na budget augmentation para sa reconstruction at rehabilitation ng kanilang distrito.

Gagamitin ang pondo para sa mga nasirang bahay, pananim, edukasyon at maiwasan ang “failure of election” bunsod ng mga nasirang imprastraktura.

Ang Dinagat Islands ay isa sa mga probinsyang lubhang napinsala ng bagyong Odette kung saan, aabot sa 37,033 na pamilya ang apektado ng kalamidad matapos masira ang 16,000 na mga tirahan at 85% ng mga paaralan naman ang nasira. —sa panulat ni Angelica Doctolero

Pumalo sa 158 ang kabuuang bilang ng mga naarestong illegal aliens sa bansa sa taong 2021.

Sa pahayag ng Bureau of Immigration (BI) intelligence agents, bukod sa mga illegal aliens, nahuli naman ang 83 foreign fugitives na nagtatago sa batas sa loob ng bansa.

Ayon kay BI Commissioner Jaime Morente, naging matagumpay ang kanilang ikinasang operasyon sa ibat-ibang lugar sa bansa.

Nangunguna sa mga inaresto ang 86 na mga Chinese national; sumunod ang 37 Korean nationals; 10 Nigerians; anim na Indians; apat na Amerikano; apat na Briton; tatlong Hapones; dalawang Indonesians; at tig-iisang Dutch, German, Tunisian, Cambodian, Lebanese at Singaporean.

Sinabi pa ni Morente na bumaba ang naging accomplishment noong 2021 dahil sa travel restrictions na ipinatutupad ng Inter-Agency Task Force (IATF) kung saan, limitado lamang ang pinapayagang makapasok sa Pilipinas dahilan para bumaba din ang incoming foreign nationals bunsod ng COVID-19 pandemic. —sa panulat ni Angelica Doctolero