Patay ang isang sundalo habang sugatan ang dalawang iba pa matapos pagbabarilin ng Abu Sayyaf gunmen ang sinasakyan nila sa barangay tugas sa Patikul, Sulu.
Ayon sa ulat, kabilang sa Philippine Army 45th Infantry Battalion ang nasawi at nasugatan.
Pasado alas-6 ng gabi kahapon nang bumibiyahe ang mga ito lulan ng military truck nang sila ay na-ambush.
Agad naman silang dinala sa ospital pero nasawi na ang isa.
Hindi pa pinapangalanan ang mga ito. —sa panulat ni Abby Malanday
Inirekomenda na ng House Committe on Good Government and Public Accountability ang pagsasampa ng kaso laban kina Department of Health (DOH) Secretary Francisco Duque III at dating director general ng Food and Drug Administration (FDA) na si Eric Domingo.
Para ito sa ilang isyu tulad ng pagtugon ng gobyerno sa covid-19 pandemic at iba pang polisiya at alituntunin ng DOH.
Sa ilalim ng Committee Report No. 1393 na may petsang December 16, 2021, inirekomenda na ang kaso laban kina Duque at Domingo dahil sa paglabag sa Republic Act No. 6713 o ang Code of Conduct and Ethical Standards for Public Officials and Employees.
Habang paglabag naman sa Anti-Red Tape Act of 2007 ang isinampang kaso laban sa dalawa at kay FDA Center for Drug Regulation and Research Director Joyce Cirunay. —sa panulat ni Abby Malanday
Magsasagawa ng public hearing ang Muntinlupa City Council para imbestigahan ang water supply interruption na ipinatupad sa lungsod kung saan libo-libong residente at negosyo ang naapektuhan.
Ayon sa Muntinlupa City Government, iimbitahan sa pagdinig ang mga empleyado ng Maynilad na sangkot sa umano’y water interruption at hindi ang kanilang kinatawan.
Ilan sa mga paksang pag-uusapan ay ang pag-deploy ng maraming water tankers at payment holiday kung mawawalan ng tubig.
Sa ngayon, hinihintay na lamang mula sa city council secretary at chairman ng committe kung kailan gaganapin ang pagdinig.
Pinalawig pa ang water interruption sa Pebrero a-15 sa halip na sa Enero a-20 na unang inihayag. —sa panulat ni Abby Malanday
Itutuloy ni dating senator at presidential aspirant Ferdinand ‘Bongbong’ Marcos ang ‘build, build, build’ program ni Pangulong Rodrigo Duterte.
Sa panayam sa DWIZ, sinabi ni Marcos na hindi dapat tumigil ang pagsasagawa ng imprastruktura sa bansa upang magpatuloy ang mga magandang nasimulan ng gobyerno.
Pero ang kaibahan lang, sinabi ni Marcos na idadagdag sa programa ang digital infrastructure kung saan kasabay ng proyekto sa kalsada ay uunlad rin maging ang internet at negosyo.
Iniimbestigahan na ng Philippine National Police (PNP) ang mga ulat hinggil sa pagkawala ng may 10 sabungero na may mahigit isang linggo nang pinaghahanap.
Sa pulong balitaan kanina sa Kampo Crame, sinabi ni PNP Chief P/Gen. Dionardo Carlos na inatasan na niya ang Criminal Investigation and Detection Group (CIDG) para tutukan ang kaso.
Aminado si Carlos na palaisipan pa sa kanila ngayon kung may kaugnayan ang pagkawala ng mga sabungero sa mga lugar ng Maynila at Laguna kaya’t inaalam nila kung may pattern na dapat sundin dito.
Inaalam na rin ng PNP Chief sa CIDG kung mayruong mga kaparehong kaso ng mga nawawalang sabungero sa mga nakalipas na panahon dahil mahalagang matukoy aniya ang kuneksyon ng mga ito.
Una nang lumutang ang anggulo ng laglagan sa laban o game fixing na siyang ugat ng pagkawala ng mga sabungero o dahil sa pagkabaon sa utang mula sa tinatawag na loan sharks sa loob ng sabungan. —sa ulat ni Jaymark Dagala (Patrol 9)
Patuloy pang nangangalap ng impormasyon at ebidensya ang Philippine National Police (PNP) laban sa ilang mga kandidato.
Ito’y kasunod ng akusasyon ni Pangulong Rodrigo Duterte na may ilang kumakandidato sa pagka-Pangulo para sa Halalan 2022 ang nasasangkot umano sa katiwalian.
Ayon kay PNP Chief P/Gen. Dionardo Carlos, mayruon na silang ginagawang background check sa bawat kandidato at kung anu-anong mga kaso, kontrobersiya at iskandalo ang kanilang kinasasangkutan.
Maging ang isang Presidentiable aniyang inakusahan ng Pangulo kamakailan na gumagamit ng coccaine ay masusi na ring inaalam ng PNP Drug Enforcement Group (PDEG) at ng Philippine Drug Enforcement Agency (PDEA).
Magugunitang sinabi ni Pangulong Duterte sa kaniyang Talk to the People kamakailan na hindi muna niya papangalanan ang mga kandidatong kaniyang inaakusahan subalit mainam aniyang ipaalam niya ito sa publiko dahil kinabukasan aniya ng bansa ang nakasalalay dito. —sa ulat ni Jaymark Dagala (Patrol 9)
Posibleng masibak sa serbisyo at makulong pa ang may 8 Pulis na miyembro ng Anti-Organize Crime Unit ng Criminal Investigation and Detection Group (CIDG).
Ito’y matapos silang maaresto ng kanilang mga kabaro sa CIDG dahil sa pagkakasangkot ng mga ito sa kidnapping ng 7 Chinese National at 1 Pinoy sa Angeles City sa Pampanga.
Kinilala ni CIDG Angeles City Field Unit ang mga naarestong pulis na sina P/Maj. Ferdinand Mendoza, PSSgt. Mark Anthony Iral, PSSgt. Sanny Ric Alicante, PCpl. John Gervic Fajardo, PCpl. Kenneth Rheiner Delfin, Pat. Leandro Mangale at Pat. Hermogines Rosario Jr.
Nabatid na nagsisilbing mga protektor ang naturang pulis ng hinihinalang Philippine Offshore Gaming Operators (POGO) sa naturang lugar na pagmamay-ari ng 2 Chinese Nationals bitbit ang mataas na kalibre ng armas.
Ngunit nang magsagawa ng operasyon ang mga tauhan ng CIDG, iginiit ng mga naarestong pulis na nagsasagawa sila umano ng buy-bust operations sa lugar dahil anila sa may mga natatagong armas.
Patuloy ang isinasagawang imbentaryo sa mga nakuhang ebidensya kabilang na ang 300,000 pisong pera, di pa mabilang na dolyar at mga service firearm ng mga naarestong pulis at mga sasakyang gamit ng mga ito. —sa ulat ni Jaymark Dagala (Patrol 9)
Nasa ligtas nang kalagayan habang nagpapagaling sa ospital ang 1 Sundalo at 1 Civilian Auxillary Forces Geographical Unit (CAFGU) matapos masugatan sa ginawnag pambobomba ng New People’s Army (NPA) sa Pinabacdao, Samar.
Ayon kay Army’s 8th Infantry Division Commander MGen. Edgardo De Leon, patungo sana ang grupo ng mga sundalo at CAFGU sa kanilang bagong detachment nang pasabugin ng mga rebelde ang isang Anti-Personnel Mine sa Brgy. Peleaon.
Nakilala ang mga sugatan na sina Staff Sgt. Alan Albuera na tinamaan ng shrapnel sa leeg at kanang binti gayundin ang CAFGU na si Rolando Abainza Jr na tinamaan ng shrapnel sa kanang binti.
Mariing kinondena ni De Leon at ng Pamahalaang Bayan ng Pinabacdao ang naturang pagpapasabog ng mga rebelde na malinaw ng pagwawalang bahala ng mga ito sa kaligtasan at kaayusan ng bawat komunidad at ang kanilang patuloy na pag-iingat ng mga Anti-Personnel Mine ay kalapastanganan sa UN convention na nagbabawal sa mga ito.
Batay sa itinatadhana ng Ottawa Convention, mahigpit nang ipinagbabawal sa alinmang Sandatahang Lakas o armadong grupo ang paggamit ng Anti-Personnel Mine dahil sa matinding pinsalang dulot nito sa mga inosente. —sa ulat ni Jaymark Dagala (Patrol 9)
Aabot na lamang sa 790 mga lugar sa buong bansa ang nakapailalim sa granular lockdown upang maiwasan ang pagkalat ng COVID-19.
Ayon sa Philippine National Police (PNP), mas mababa ito kumpara sa naitalang 900 lugar na isinailalim sa granular lockdown sa buong bansa kahapon.
Nanguna sa mga may pinakamaraming naka-granular lockdown ay ang Cordillera na may 336, sinundan ng Ilocos Region na may 195 at Cagayan Valley na may 164.
Samantala, sinabi naman ng PNP na aabot sa may 1,057 pamilya o katumbas 38, 598 na indibidwal ang apektado ng granular lockdown sa bansa.
Binabantayan ito ng may 316 miyembro ng Pulisya katuwang ang nasa 950 force multipliers upang matiyak na nasusunod ang health protocols sa mga apektadong lugar. —sa ulat ni Jaymark Dagala (Patrol 9)
Umakyat na sa 45,156 ang total recoveries ng COVID-19 sa hanay ng Philippine National Police (PNP).
Ito’y ayon sa PNP Health Service ay matapos madagdagan ng 595 ang bilang ng mga bagong gumaling sa sakit.
Gayunman, may 186 pa rin ang naitalang bagong kaso ng virus sa hanay ng pulisya kaya’t sumampa na sa 47,603 ang kabuuang kaso nito.
Mula sa nabanggit na bilang ay nasa 2,321 ang aktibong kaso habang wala namang bagong nasawi kaya’t nakapako pa rin sa 126 ang total death toll. —sa ulat ni Jaymark Dagala (Patrol 9)