Posibleng sa susunod pa na linggo bumaba ang presyo ng pulang sibuyas.
Ito, ayon kay Department of Agriculture Assistant Secretary Kristine Evangelista, ay dahil panahon na nang anihan ngayong buwan.
Tinatayang 13,000 metrikong tonelada ang kasalukuyang supply ng red onion sa bansa habang 5,000 metrikong tonelada ang inaasahang aanihin.
Samantala, nilinaw ng DA na wala silang balak mag-aangkat pa ng karagdagang supply ng sibuyas.
Ini-alok na ng San Miguel Global Power (SMGP) sa Meralco ang paggamit sa kanilang Ilijan Power Plant sa mas mababang halaga upang mapanatiling mura ang singil sa kuryente at matiyak na stable ang power supply.
Kinumpirma ni San Miguel Corporation (SMC) president Ramon Ang na ibinaba na sa P1.00 kada kilowatt hour ang alok ng kanilang power unit na SMGP bilang capital recovery fee upang gamitin ang 1,200 megawatt capacity ng planta.
Nangangahulugan ito na kung gagamitin ang planta, kung saan nagmumula ang 10% hanggang 12% power capacity para sa Luzon, maaaring matapyasan paunti-unti ang power supply costs kumpara sa umiiral na gastos sa coal power generation.
Tinalakay na anya ang nasabing issue ng kanilang subsidiary na South Premiere Power Corporation sa Meralco.
Tiniyak naman ni Ang na kanilang ipinagpapatuloy ang paghahanap ng mga paraan upang mabawasan ang pasanin ng consumers sa gitna na krisis bunsod ng patuloy na pagsirit ng presyo ng krudo sa international market.
Kasalukuyang nasa ilalim ng extended outage ang Ilijan Power Facility sa Batangas na sinusuplayan ng natural gas mula sa MALAMPAYA hanggang nitong Hunyo matapos magtapos ang Original Gas Supply Agreement sa planta.
Samantala, nag-alok din ang SMC na tumulong sa paghahanap ng krudo para sa Ilijan Facility, na babayaran ng MERALCO.
Nananatiling mailap ang premyo sa 6/58 UltraLotto ng Philippine Charity Sweepstakes Office (PCSO).
Ito’y makaraang walang makasungkit ng winning combination na 6 – 49 – 58 – 35 – 36 – 31 na may jackpot na P333.9M sa draw kagabi.
Pitong mananaya naman ang nakadagit ng second prize na tig-P120,000 matapos matumbok ang 5 digit combination.
Binobola ang UltraLotto tuwing Martes, Biyernes at Linggo.
Samantala, bigo ring mapanalunan ang premyong P15.8M sa 6/49 SuperLotto makaraang walang makahula sa kombinasyong 24 – 33 – 12 – 17 – 49 – 40.
Ipagpapatuloy ng Senado ang imbestigasyon sa ban ng Bureau of Fisheries and Aquatic Resources (BFAR) sa iligal na pagbebenta ng ilang imported na isda, tulad ng pampano at pink salmon sa mga palengke.
Ito’y kahit ipinatigil na ng BFAR ang pagpapatupad ng nasabing ban noong Biyernes.
Ayon kay Senator Francis Tolentino, hindi lamang ang mahigit dalawang dekada ng Fisheries Administrative Order (FAO) 195 ang tututukan ng Senate Committee on Agriculture kundi maging ang iba pang kinakaharap na issue ng BFAR.
Nakagugulat anya ang biglaang pagpapatupad ng FAO 195 ngayong holiday season maging ang pagiging limitado nito sa canning at processing.
Binigyang-diin ni Tolentino na karapatan ng bawat isa na kumain ng pampano at salmon, kaya’t maituturing na diskriminasyon ang nasabing kautusan.
Samantala, naniniwala naman ang Senador na kahit nag-issue ng moratorium laban sa implementasyon ng FAO 195, panahon na upang baguhin o rebisahin ito ng BFAR.
Nais ipabusisi nang husto ni Senador Jinggoy Estrada ang panukalang Maharlika Investment Fund.
Ito’y dahil napakarami pang tanong ni Estrada hinggil sa planong Sovereign Wealth Fund (SWF).
Kahit anya isinusulong mismo ni Pangulong Bongbong Marcos ang nasabing panukala ay dapat pa rin itong dumaan sa pagbusisi ng Kongreso, lalo’t pensyon ng retirees ang paghuhugutan ng pondo.
Sa ilalim ng Proposed SWF magmumula sa mga Government Financial Institutions tulad ng Government Service Insurance System at Social Security System ang gagamiting pondo. —ulat mula kay Cely Ortega Bueno (Patrol 19)
Dapat magdagdag ang gobyerno ng cold storage bilang isa sa mga solusyon sa supply shortage at upang mapanatiling abot-kaya ang presyo ng agricultural products.
Ayon kay dating Agriculture secretary at Federation of Free Farmers chairman Leonardo Montemayor, malaking tulong sa mga magsasaka ang mas maraming cold storage.
Kung hindi anya paborable sa mga magsasaka ang presyo ng kanilang mga produkto, tulad ng sibuyas, maaari nilang ilagak ang mga ito sa mga nasabing pasilidad habang hinihintay gumanda ang presyo.
Bukod dito, iminungkahi rin ni Montemayor na pautangin ng gobyerno ang mga farmer habang naka-tengga sa mga storage ang kanilang produkto.
Pinagpapaliwanag na ng Land Transportation Franchising and Regulatory Board (LTFRB) ang Grab Philippines kasabay ng pagsisimula ng imbestigasyon sa umano’y paglabag ng nasabing Transportation Network Vehicle (TNV’s) sa accreditation nito.
Pinasisipot ng LTFRB ang Grab sa ipinatawag na hearing bukas makaraang magpataw ito ng minimum fare na P85.00 at additional stop base fare na P40.00 kapag nagpa-book sa platform nito.
Una nang inihayag sa Committee on Metro Manila Development ni Marikina Rep. Stella Quimbo, dating chairman ng Philippine Competition Commission (PCC) na nilabag ng Grab ang Competition Rules dahil sa sobrang singil sa customers sa kabila ng commitments sa regulators.
May kasaysayan anya ang grab ng overcharging sa customers nito at hinimok ang PCC at iba pang regulatory agencies na imbestigahan ang nasabing TNVs dahil sa pang-aabuso sa substantial market share ng TNVs industry.
Naghain na ng reklamong kidnapping at serious illegal detention sa Department of Justice ang pamilya ng isang nawawalang “sabungero” laban sa dalawang lalaking huling nakitang kasama ng biktima sa video.
Personal na inihain ni Ma. Concepcion “Lani” Bautista, asawa ni Michael Bautista, ang reklamo laban sa isang Julie Patidongan alyas ”Dondon” at isang hindi pa natutukoy na suspect.
Si Patidongan at hindi pa nakikilalang lalaki ay nakita sa cellphone video na kasama ni Michael na noo’y naka-posas at palabas ng isang cockfighting arena sa Laguna noong gabi ng April 28, 2021.
Nakilala ng isang testigo at kapatid na lalaki ni Michael si Patidongan bilang Manager ng AA-Cobra farm sa barangay Palasan, Santa Cruz, Laguna, ang mismong lugar kung saan matatagpuan ang sabungan.
Samantala, nakatakdang makipag-usap si Justice secretary Boying Remulla sa pamilya ng mga nawawalang sabungero ngayong araw.
Nanindigan si Pangulong Bongbong Marcos na dapat ipaglaban ng Pilipinas ang joint oil exploration sa West Philippine Sea.
Ayon sa pangulo, malaking bagay para sa Pilipinas ang proyekto dahil kailangan na ng supply ng langis ng bansa kaya’t nais niyang matuloy ang joint exploration.
Gayunman, natigil anya ang aktibidad dahil sa pag-angkin ng China sa teritoryo.
Tiniyak naman ni PBBM na patuloy na hahanap ng paraan at solusyon ang gobyerno upang matuloy ang paghahanap ng langis sa pinag-aagawang teritoryo.
Umapela ng pang-unawa sa boxing community ang anak ni boxing hall of famer referee Carlos “Sonny” Padilla, matapos ang pag-amin nitong tinulungan si dating senador manny Pacquiao na manalo kontra Nedal Hussein noong October 2000.
Nilinaw ni Tuano na maaaring nagkaroon lamang ng “misinterpretation” sa naging pahayag kamakailan ng kanyang ama.
Matanda na anya ang kanyang ama sa edad nitong otsenta’y otso anyos at sa kabila ng ilang dekadang pananatili sa estados unidos, ingles pa rin ang ikalawang lengguwaheng ginagamit nito.
Ayon kay Tuano, maaaring naiba ang pagkakaintindi ng publiko sa mga sinabi ng boxing hall of famer referee sa isinagawang interview ng World Boxing Council na ipinalabas sa youtube.
Iginiit ni Suzy na kilalanin muna ng boxing community ang mga madalas kahalubilo o kaibigan ng kanyang ama upang mabatid ang tunay nitong karakter bago husgahan.