Drew Nacino

Nasa P63M halaga ng smuggled frozen goods ang nasabat ng Bureau of Customs sa ilang containers sa Manila International Container Port (MICP).

Kinumpirma ng Customs Intelligence and Investigation Service o (CIIS-MICP) na nakatanggap sila ng derogatory information hinggil sa dalawang containers mula Hong Kong at dalawang containers mula China na idineklara bilang kilu-kilong frozen prawn balls.

Ayon kay Customs Commissioner Yogi Filemon Ruiz, naglalaman din ng iba pang frozen foods ang mga container na hindi idineklara ng consignee sa kanilang manifesto.

Sa isinagawang inspeksyon, nadiskubre na kargado ang mga container ng frozen tofu, chicken paws, boneless beef, vietnamese suckling pig at beancurd skin.

Inirekomenda na ng CIIS-MICP ang pag-isyu ng Warrant of Seizure and Detention laban sa mga misdeclared goods.

Inaasahang mailalabas na ang Implementing Rules and Regulations (IRR) ng Sim Registration Act bago matapos ang taon.

Ito ang kinumpirma ng National Telecommunications Commission (NTC) matapos ang isinagawang public hearing, kahapon.

Ayon kay NTC Deputy Commissioner Jon Paulo Salvahan, masusing binalangkas ng mga miyembro ng Technical Working Group (TWG) at Public Telecommunication Entities (PTE) ang IRR.

Katuwang ng NTC sa pagbuo ng IRR ang Departments of Information and Communications Technology, Trade and Industry at National Privacy Commission.

Sa ilalim ng Republic Act 11934 o Sim Registration Law na nilagdaan ni Pangulong Bongbong Marcos noong October 10, magiging mandatory na ang pagpaparehistro ng lahat ng mobile communication devices.

Kabilang sa layunin nito ang pigilan ang pagkalat ng mga text scam o spam text messages.

Sa ikatlong sunod na linggo, inilarga na ng mga kumpanya ng langis ang tapyas-presyo sa kanilang mga produkto.

Buena manong nagpatupad ang Caltex ng P1.95 centavos na rollback sa kada litro ng gasolina; P1.90 centavos sa diesel habang P1.65 centavos sa kerosene, epektibo alas -12 kaninang hatinggabi.

Ala-6 kanina umarangkada rin ang kahalintulad na bawas presyo ng Flying V, Petron, Phoenix Petroleum, PTT Philippines, Petrogazz, Seaoil at JETTI Petroleum.

Alas 8:01 naman mamayang umaga ipatutupad ng Cleanfuel ang kanilang rollback maliban sa kerosene o gaas.

Ito ang unang beses na nagrollback ang presyo ng oil products ngayong Disyembre, bunsod ng epekto ng Covid-19 lockdown sa China, mas mataas na oil inventories at magkakasunod na interest rate hikes sa U.S.

Pang-limang beses naman itong bawas-presyo simula noong Oktubre a – 24.

Iginiit ng Department of Education na nananatiling boluntaryo ang Covid-19 vaccination sa mga mag-aaral at personnel ng DepEd.

Ito’y kahit suportado ng Kagawaran ang Bakunahang Bayan Drive na gumulong na simula kahapon.

Sa DepEd Order 051 ni Vice President at Education Secretary Sara Duterte, hinimok nito ang mga estudyante, personnel, magulang, guardian at iba pang stakeholders na lumahok sa “Bakunahang Bayan” ng Department of Health hanggang bukas.

Kahit boluntaryo ang pagpapabakuna ng lahat ng mag-aaral at personnel, binigyang-diin ng Kagawaran na hindi dapat magkaroon ng diskriminasyon laban sa mga indibidwal na piniling hindi magpabakuna o booster.

Gayunman, dapat may pahintulot ng mga magulang o legal guardian ang lahat ng menor de edad na magboboluntaryong magpabakuna.

Naka-umang na sa Enero ng susunod na taon ang panibagong dagdag-singil ng MERALCO bunsod ng numinipis na supply ng kuryente.

Ito ang kinumpirma ni MERALCO spokesman Joe Zaldarriaga bunsod ng serye ng ipinatupad na yellow at red alert status ng National Grid Corporation of the Philippines ngayong buwan.

Ayon kay Zaldarriaga, kadalasang nagreresulta ang serye ng yellow at red alerts sa mas mataas na electricity costs at papasok ito sa supply month ng Disyembre at mararamdaman sa bill sa Enero.

Ang manipis anyang power supply ay naka-aapekto sa electricity rates dahil kadalasang bumibili ang power distributors ng mas mahal na kuryente sa wholesale electricity spot market.

Samantala, iimbestigahan naman ng Department of Energy ang forced outages ng ilang planta at iginiit na dapat mangontrata ang NGCP ng Power reserves upang matiyak na ang maayos na supply at maiwasan ang yellow at red alert status.

Pinag-iingat ng Department of Agriculture ang publiko sa pagbili ng sibuyas sa mga Online platform.

Ito ang babala ni DA deputy spokesman Rex Estoperez, matapos ang pagkakasabat ng tone-toneledang puslit na sibuyas sa magkakahiwalay na operasyon ng DA at Bureau of Customs, kamakailan.

Ayon kay Estoperez, malaki ang posibilidad na smuggled ang mabibili ng mga consumer, halimbawa ng puting sibuyas online, lalo’t hindi pa nag-i-issue ang ahensya ng import permits bilang solusyon sa supply shortage.

Ibinebenta online ang white onions ng P1,650 kada 9-kilogram na sako o P180 per kilo pero hindi pa malinaw kung saan nagmula ang mga nasabing produkto.

Hindi anya dumaan sa pagsusuri ng DA ang smuggled products, gaya ng sibuyas na maaaring peligroso sa kalusugan ng tao.

Nakatakdang i-dispose ng DA – Bureau of Plant Industry (BPI) ang mga dilaw na sibuyas na nakumpiska kamakailan.

Ayon kay BPI officer-in-charge for Information and Computer Section Jose Diego Roxas, maaaring pira-pirasuhin o ibaon ang mga nasabat na sibuyas.

Wala anyang phytosanitary permit ang mga nasabing produkto at maaaring peligroso sa kalusugan kaya’t nagpasya silang i-dispose ang mga ito sa halip na ibenta o ipamahagi.

Kumuha na rin ang BPI ng samples mula sa smuggled onions upang sumailalim sa safety test at mabatid kung mayroong contaminants.

Biyernes ng gabi nang makumpiska ng BPI, Department of Agriculture, Bureau of Customs, Philippine National Police at Philippine Coast Guard ang nasa 1,000 bag ng dilaw na sibuyas sa Tondo, Maynila.

Tinaya sa P1.9M ang halaga ng mga naturang smuggled products.

Pina-alalahanan ng Department of Education ang mga paaralan na bawal ang pwersahang ambagan sa gitna ng inaasahang kaliwa’t kanang Christmas Party.

Kasunod ito ng pagpapahintulot ng DepEd sa pagdaraos ng mga Christmas Party sa mga eskwelahan bunsod ng pinaluwag na Covid-19 restrictions matapos ang dalawang taon.

Ayon kay Vice President at Education secretary Sara Duterte, dapat ay maging simple pero makabuluhan ang pagdiriwang ng pasko sa mga pampublikong paaralan, maging sa mga opisina ng DepEd.

Ito’y dahil na rin sa hirap ng buhay at ekonomiya ng bansa bunsod ng mahal na mga bilihin.

Batay sa kautusan ng kagawaran, dapat ay boluntaryo at hindi pwersahan ang magiging ambagan ng mga magulang, estudyante o empleyado ng DepEd para sa exchange gift.

Pinayuhan naman ng DepEd ang mga school official na gamitin na lamang ang mga lumang Christmas decorations dahil hindi nila sinasang-ayunan ang pagbili ng mga bagong dekorasyon sa mga paaralan.

70% ng mga Filipino ang kuntento sa pagtugon ng kasalukuyang administrasyon sa edukasyon, disaster response at kalusugan.

Batay ito sa tugon ng Masa Survey na isinagawa ng OCTA Research Group sa 1,200 na lalaki at babaeng respondents na edad 18 pataas noong October 23 hanggang 27.

Kabilang sa mga nakalistang programa sa naturang survey ay food security, murang bilihin, pagbibigay ng de-kalidad na edukasyon; paglaban sa krimen, korapsyon, pagpapalaganap ng kapayaan at kaayusan sa bansa;

Pagbabawas ng buwis sa mga mamamayan, pagprotekta sa kapakanan ng mga Overseas Filipino Workers, pagpapatupad ng batas at pagpigil sa pagkasira ng kalikasan at pagkontrol sa lumalaking populasyon.

Ayon sa OCTA, 70% ng respondents ang kuntento sa mga programang ito, lalo sa pagbibigay ng maayos na edukasyon sa elementary at high school na umani ng 75% satisfactory votes.

Sinundan ito ng pagtugon ng pamahalaan sa mga kalamidad, may 75%; probisyon ng tertiary, technical at vocational education, 74% at maayos at murang health care, 73% satisfactory votes.

Gayunman, nakatanggap ng low rating o mababa sa 50% ang ilang programa gaya ng pag-kontrol sa inflation, 33%;

 Paglikha ng mga trabaho, 22%; pagpapababa sa antas ng kahirapan, 25% at pagkontrol sa presyo ng mga bilihin sa 36%.

Sinimulan na ang ilang aktibidad bilang bahagi ng pagdiriwang ng Pista ng Itim na Nazareno sa Jan.1 ng susunod na taon.

Kabilang sa inilarga ang “Pagdalaw” o ang pagbisita ng imahen ng Black Nazarene sa iba’t ibang lungsod upang hindi na dumagsa ang mga deboto sa Maynila sa susunod na buwan.

Dec.1 nang simulan ang pagdalaw hanggang a – 15 at masusundan sa a – 27 hanggang a – 29.

Inabisuhan naman ng pamunuan ng Quiapo Church ang publiko na bisitahin ang social media pages ng Minor Basilica of Black Nazarene para sa petsa at oras ng pagbisita ng imahen.

Pinaalalahanan din ang mga deboto na ang pagbabasbas ng mga Replica at Estandarte o banner ay gagawin ng tatlong araw mula December 27 hanggang 29 sa Plaza Miranda.

Pinapayuhan ang mga deboto na magkakaroon lamang ng isang Entrada o pasukan sa Carriedo at labasan sa  Quezon Boulevard upang mapa-kontrol ang daloy ng tao.

Samantala, magsasagawa ng Thanksgiving Motorcade simula alas 11 ng gabi sa December 30.