Drew Nacino

Aminado si Pangulong Ferdinand Marcos Jr., na hindi na makontrol ang inflation kahit nagsisimula nang bumangon ang ekonomiya ng bansa mula sa epekto ng Covid-19 pandemic.

Sa kanyang talumpati sa forum na inorganisa ng Joint Foreign Chambers of the Philippines sa Pasay City kahapon, binanggit ng Pangulo ang naitalang 8% inflation rate nitong Nobyembre.

Gayunman, nilinaw ng Punong Ehekutibo na ang nag-ugat ang inflation sa labas ng bansa at hindi dahil sa internal factors batay sa kanyang economic team.

Ito, anya, ang dahilan kaya’t kailangan ang import substitution upang maibaba ang nararanasang mataas na presyo ng mga bilihin.

Sisimulan na mamaya ng Korte Suprema ang Oral Arguments sa mga petisyong kumukwestyon sa ligalidad ng No-Contact Apprehension Policy (NCAP) sa ilang lungsod sa Metro Manila.

Itinakda ng Supreme Court ang pagdinig alas-2 mamayang hapon.

Una nang ipinag-utos ng SC ang pansamantalang pagpapatigil ng implementasyon ng NCAP sa limang lungsod sa Metro Manila matapos maghain ng petisyon ang ilang transport group.

Kinabibilangan ito ng mga grupong PASANG MASDA, ALTODAP at ACTO.

Respondents naman ang mga local governments ng Maynila, Muntinlupa, Parañaque, Quezon City at Valenzuela, maging ang Land Transportation Office.

Napabilang ang mga lalawigan ng Nueva Ecija at Tarlac sa mga lugar sa Luzon na may pinaka-mataas na weekly Covid-19 positivity rate hanggang nitong Disyembre a – tres.

Kinumpirma ni OCTA research fellow, Dr. Guido David na 23 lalawigan, kabilang ang National Capital Region sa mga nagtala ng mataas at sumisirit na weekly positivity rates.

Ayon kay David, umabot na sa 39.1% ang positivity rate ng Nueva Ecija noong sabado kumpara sa 32.9% noong November 26.

Bagaman bumaba sa 25.3% sa kaparehong panahon kumpara sa 36.5% ang positivity rate sa Tarlac, ikinukunsidera pa rin anya itong mataas.

Ang Covid-19 positivity rate ay bilang ng positive tests results.

Nangunguna ang Nueva Ecija sa Luzon na may kasalukuyang mataas na positivity rate habang pang-lima ang Tarlac.

Nanindigan si Government Service Insurance System (GSIS) President at General Manager Jose Arnulfo “Wick” Veloso na panahon na upang magkaroon ng Sovereign Wealth Fund na Maharlika Investments Fund.

Ayon kay Veloso, ito na ang tamang panahon upang ipuhunan at kumita nang mas marami pang pondo na mapapakinabangan ng mga miyembro ng GSIS.

Ang kanila anyang trabaho ay ilagak ang pera ng mga miyembro sa tamang lugar na kikita nang mas malaki at makapagbigay sa kanila ng benepisyo.

Sa ilalim ng Republic Act 656 na inamyendahan ng Presidential Decree 245, binibigyang mandato ang GSIS na protektahan ang lahat ng ari-arian at interes ng gobyerno laban sa insurable risks.

Sa ilalim ng panukalang Sovereign Wealth Fund (SWF) ay matitiyak ang pagiging transparent nito dahil babantayan ito ng Board of Advisers at may posibilidad na isama ang mga miyembro mula sa ilang pribadong sektor tulad ng Philippine Stock Exchange.

Idinagdag ni Veloso na ang pamumuhunan sa kasalukuyang kondisyon ay mas makatutulong sa bansa dahil sa inaasahang mas malaking kita.

Dismayado si Senate Minority Leader Koko Pimentel sa pasya ng bicameral conference committee na ibalik ang 150 million peso Confidential at Intelligence Funds (CIF) ng Department of Education.

Ayon kay Pimentel, nakadidismaya na mula sa napagkasunduan sa senado na itira na lang ay P30 million sa CIF ng DepEd subalit pagdating sa Bicam ay ibinalik ito sa P150 million.

Matatandaan sa ipinasang budget version ng mataas na kapulungan ng kongreso ay tinapyasan ng P120 million ang P150 million CIF ng kagawaran at inilipat sa Healthy Learning Institution Program ng ahensya na unang iminungkahi ni Senator Risa Hontiveros.

Batay naman sa paliwanag ni Appropriations Committee Chairman at Congressman Zaldy Co, napagkasunduan na ibalik ang buong budget ng CIF ng DepEd upang matigil na ang recruitement sa mga kabataan sa mga komunistang grupo.

Tinututulan ng oposisyon sa Senado ang nasabing pondo para sa DepEd dahil sa paniniwalang ang ‘intelligence gathering’ ay mandato at trabaho ng intel agencies. —ulat mula kay Cely Ortega Bueno (Patrol 19)

Niratipikahan na ng Senado ang Bicameral Conference Committee report ng P5.268-T na 2023 General Appropriations Bill (GAB).

Ang Ratified Bill ay naglalaman ng pinag-isang bersyon ng Senado at Kamara.

Nagpahayag naman ng “No Vote” sina Senate Minority Leader Koko Pimentel at Senator Risa Hontiveros.

Partikular na tinututulan ng oposisyon ang pagbabalik sa P150 million Confidential at Intelligence Funds (CIF) ng Department of Education.

Bagaman noong una ay nagpasalamat sa pagtugon ng senado na tapyasan ng P120 million ang CIF ng DepEd at ilipat sa ibang programang mas mapapakinabangan ng ahensya, dismayado naman ang senadora dahil hinayaang makalusot ang nasabing pondo.

Kasama rin sa ibinalik sa pondo ang orihinal na budget proposal ng NTF-ELCAC na P10-B.

Ito ang unang pambansang pondo sa ilalim ng Marcos Administration.

Inaasahang bago mag-Pasko ay lalagdaan na ni pangulong Bongbong Marcos ang 2023 National Budget. —ulat mula kay Cely Ortega Bueno (Patrol 19)

Handang makipagtulungan sa gobyerno at kongreso ang kowalisyon ng mga tsuper at operators ng Transport Network Vehicle Services (TNVS) community na may 25,000 miyembro upang isaayos pa ang ride-hailing services sa bansa.

Nangako rin ang TNVS community na gagawin nito ang kanilang makakaya upang mabawasan ang mga pasanin ng mga commuter.

Ayon kay Bobby Coronel, tagapagsalita ng Kowalisyon, nais nilang maging bahagi ng mga solusyon sa mga problema sa transportasyon sa bansa, lalo sa Metro Manila.

Batid anya nila ang mga hinaing ng mga TNVS riders dahil direkta nilang naririnig ang mga ito mula sa mga pasahero.

Umaasa din ang Kowalisyon na mapakikinggan sila ng Kongreso, lalo ni Senate Committee on Public Services chairperson Grace Poe upang mapaganda ang kanilang serbisyo.

Kabilang sa mga nais matutukan ng kowalisyon ang umano’y commission rate increase ng Grab na kinukuha sa kinikita ng partner drivers nito at surge charges sa pasahe, lalo kapag mabigat ang daloy ng trapiko.

Nasa 1,000 wheelchairs ang ipinamahagi ng Persons with Disability-Oriented Non-Government Organization na ALAGANG AKAY kasama ng Sol Aragones Foundation.

Bahagi ito ng International Day of Persons with Disabilities na itinakda ng United Nations General Assembly noong 1992 upang ipagdiwang tuwing ikatlo ng Disyembre ng bawat taon.

Ang naturang aktibidad ay isinagawa sa Santa Rosa City, Laguna nitong linggo.

Inilunsad ang inisyatibo ng ALAGANG AKAY kasama ang Alagang Sol ng dating news reporter at media personality na si Sol Aragones, na nagsilbing kongresista ng ikatlong distrito ng Laguna.

Ayon kay Aragones, napakahalaga ng nasabing programa para sa mga PWD at kanilang mga pamilya na bahagi ng ALAGANG AKAY Community.

Nais anya ng AKAY Foundation na tuparin ang pangarap ng mga PWD na magkaroon ng wheelchair at saklay sa abot ng kanilang makakaya.

Bukod kay Aragones, pinangunahin din ang selebrasyon sa Laguna ni Akay ambassador Dwight Bayona, isang leg-amputee at multi-sport athlete at “chef with no hands” Maricel Apatan.

Nabawasan na ang backlog sa issuance ng driver’s license.

Ayon kay Land Transportation Office chief Jose Arturo “Jay Art” Tugade, bumaba na sa 92,000 ang backlog sa lisensya hanggang nitong Nobyembre kumpara sa 300,000 noong Agosto.

Ang mabagal anyang issuance ng driver’s license ang laging problema ng mga motorista kaya’t doble-kayod na ang LTO upang masolusyunan ito.

Isa sa mga dahila ng backlog ang depektibong laser engraving machines sa ilang LTO District at Extension offices.

Sa ngayon ay kinukumpuni lamang ang mga dispalinghadong makina dahil wala pang budget para makabili ng bago nito.

Samantala, hinimok ni Tugade ang mga motorista na huwag nang pupunta sa mga LTO branch na may depektibong laser engraving machine upang maiwasan ang abala sa pagkuha ng lisensya.

Tutol ang grupo ng mga negosyante at ilang ekonomista sa panukalang lumikha ng isang Sovereign Wealth Fund (SWF) na tatawaging Maharlika Wealth Fund dahil isasabak bilang initial capital ang pension funds ng Government Service Insurance System at Social Security System.

Kabilang sa mga kumontra ang Foundation for Economic Freedom, Makati Business Club, Management Association of the Philippines, Movement for Good Governance at UP School of Economics Alumni Association.

Sakaling ipasa bilang batas ang Maharlika, ipag-uutos nito sa GSIS at SSS, maging sa state-owned lenders na Land Bank of the Philippines at Development Bank of the Philippines na maglaan ng initial investment na P200-B.

Bukod pa ito sa magiging kontribusyon na P25-B ng gobyerno, Bangko Sentral ng Pilipinas at Philippine Amusement and Gaming Corporation.

Ayon sa business groups, dapat i-prayoridad ang fiscal prudence o kakayahan ng gobyerno na mapanatili ang maayos na pagpapaikot sa pera ng taumbayan.

Dapat anila ay mayroong sobrang pera o commodity-based surpluses ang bansa upang ilagak sa Sovereign Wealth Fund (SWF) bilang kapital at dapat walang binabayarang malaking utang ang gobyerno.

Karaniwang nagmumula ang puhunan ng SWF sa natural resources extraction ng isang bansa, gaya ng langis at metal, na kalauna’y nauubos kaya’t tumataas ang halaga.