Drew Nacino

Namemeligro na namang tumaas ang singil ng MERALCO ngayong buwan.

Ito, ayon kay MERALCO spokesman Joe Zaldarriaga, ay dahil tapos na ang isa sa apat na refund na ipinag-utos ng Energy Regulatory Commission.

Bukod sa P.47 centavo per kilowatt hour na refund ngayong Disyembre, matatapos na rin ang dalawa pang refund sa Enero at Pebrero ng susunod na taon kaya’t posible rin ang dagdag-singil sa mga nasabing buwan.

Mas lumaki pa anya ang posibilidad ng rate hike dahil sa serye ng yellow alert o pagnipis ng power reserves.

Kahapon ay muling isinailalim sa yellow alert status ang Luzon maging sa Visayas dahil sa pagpalya ng walong planta ng kuryente.

Aminado si DOH officer-in-charge Maria Rosario Vergeire na hindi pa napapag-usapan kung sino ang magiging kalihim ng kagawaran nang magkaroon sila ng pulong kasama si Pangulong Bongbong Marcos.

Ayon kay Vergeire, tuloy lamang siya sa pagtatrabaho hanggang sa makapili si Pangulong Marcos ng susunod na kalihim.

Pinatututukan anya ng pangulo ang pagtapos sa problema sa Covid-19 pandemic.

Nilinaw naman ni Vergeire na hindi rin sa kanya inialok ng Punong Ehekutibo ang pagiging DOH secretary pero aminadong may “reservations” sa pagtanggap nito.

Hulyo nang italaga si Vergeire bilang officer-in-charge ng kagawaran noong Hulyo, ilang linggo matapos manumpa bilang Pangulo si Marcos.

Wala pang batayan upang magdeklara ng Hand, Foot and Mouth Disease (HFMD) outbreak sa bansa kahit nakapagtala na ng mahigit 100 kaso sa Metro Manila.

Nilinaw ni DOH officer-in-charge Maria Rosario Vergeire na ang naitalang 155 HFMD cases sa National Capital Region ay hindi naganap sa loob nang mabilis na panahon kundi nagsimula ito noong Oktubre hanggang kahapon, Disyembre a – 6.

Bukod pa ito sa mahigit 1,000 kaso na naitala sa lalawigan pa lamang ng Batangas simula Setyembre hanggang katapusan ng Nobyembre.

Ayon kay Vergeire, nakita ang pagtaas ng kaso ng HFMD noong nakaraang mga linggo pero wala pang basehan ang mga local goverment units na magdeklara ng outbreak sa kanilang mga lugar.

Ito’y dahil manageable at maaari naman anyang maiwasan ang nasabing sakit na kadalasang dumadapo sa mga edad 11 pababa.

Sinuspinde ng Pamahalaan ang deployment ng Overseas Filipino Workers sa india matapos mabigo ang nasabing bansa na makamit ang criteria upang ikunsiderang “compliant” destination country.

Kinumpirma ni Philippine Overseas Employment Administration officer-in-charge Bernard Olalia na epektibo ang Deployment Ban simula noong Lunes.

Ayon kay Olalia, idineklara ang india na “Non-Compliant Destination Country” base sa impormasyon sa POEA mula sa Philippine Embassy sa New Delhi.

Hindi anya nakamit ng bansa ang tatlong kondisyon upang mapapayag ang Department of Foreign Affairs kung saan ang pinaka-mahalaga ay dapat may mga batas ang India na poprotekta sa karapatan ng mga Filipino Migrant Worker.

Ipinunto ni Olalia na bagaman suportado ng India ang 1990 United Nations Convention on the Protection of the Rights of All Migrant Workers and Members of their Families, hindi naman ito pumirma, bilang isa pa sa criterion na hindi naabot.

Bukod pa ito sa Bilateral Labor Agreement sa pagitan ng Pilipinas at India para payagan ang deployment, bagay na hindi rin natupad.

Sa datos ng POEA, halos 2,000 ang mga Documented Temporary Filipino Migrants sa India.

Sumampa na sa P22-B ang halaga ng Covid-19 vaccines ang nasayang sa Pilipinas makaraang mag-expire o masira.

Inihayag ni DOH officer-in-charge Maria Rosario Vergeire na ang nasabing halaga ay katumbas ng 44 million doses ng bakunang o P500.00 per dosage.

Karamihan anya sa mga nasayang na bakuna ay nag-expire dahil sa maiksing “shelf life” ng mga ito at mayorya nito ay mga binili ng pribadong sektor.

Isa rin sa dahilan ng pagkasira ng mga bakuna ay ang pagdadalawang-isip ng mga Pilipino na magpabakuna ngayong huling bahagi ng taon sa gitna nang pagbaba ng mga kaso ng Covid-19.

Nitong lamang Nobyembre a – 21 nang kumpirmahin ni Vergeire na P15.6-B na mga bakuna o katumbas ng 31 milyong shots na ang nasira.

Kasado na ang unang phase ng internet project ng Pamahalaan at META, mother company ng social media giant na Facebook, sa kalagitnaan ng susunod na taon.

Ito ang kinumpirma ni Information and Communications Technology secretary Ivan Uy matapos sumalang sa confirmation hearing ng Commission on Appointments.

Ayon kay Uy, handa na ang imprastraktura para sa nasabing internet project sa Luzon.

Saklaw anya ng unang phase ang Laoag hanggang Quezon City habang sa ikalawang phase ang Metro Manila hanggang MBicol Region na lalarga naman sa taong 2024.

Noong 2017 pa nakipag-ugnayan ang gobyerno ng Pilipinas sa META, sa paglikha ng cable landing system, na target pagbutihin ang internet connectivity upang umabot hanggang 2 terabits per second ang speed sa pagkonekta sa bansa sa ibang bahagi ng Asya at US.

Sa ilalim ng kasunduan, bubuo ang META at patatakbuhin ang cable system ng cable stations sa Baler, Aurora at Poro Point sa San Fernando, La Union.

Mas maluwag na ang daloy ng trapiko sa ilang bahagi ng Quezon City kahapon kumpara noong Lunes kung saan nagkabuhul-buhol ang traffic, partikular sa Quezon Avenue.

Isa sa panibagong ipinatupad ang “Flashing Traffic Light”, kung saan hindi na muna pinagana ang traffic lights at hinayaan ang traffic enforcers na dumiskarte at magmando sa mga sasakyan.

Ayon kay Dexter Cardenas, Hepe ng Quezon City Task Force for Transport and Traffic Management, posibleng kusa nang naghanap ng ibang ruta ang mga motorista upang makaiwas sa mabigat na daloy ng trapiko.

Posible anyang baguhin o bawasan pa ang oras ng implementasyon upang hindi gaanong bumigat ang traffic congestion para sa mga Eastbound na motorista na binawasan ng dalawang linya dahil sa Zipper Lane.

Sabado nang simulan ng Q.C. Traffic ang dry run para sa bagong traffic scheme.

Gayunman, nilinaw ng LGU na isang linggo pa itong pag-aaralan bago ang aktuwal na implementasyon.

Sapat na ang pananahimik ni Pangulong Bongbong Marcos bilang katibayan na hindi ito ang nagsusulong ng panukalang Maharlika Investment Fund.

Ito ang inihayag ni Senate Minority Leader Koko Pimentel makaraang igiit na maaaring hindi si Pangulong Marcos ang nasa likod ng isinusulong sa kamara na Maharlika o Sovereign Wealth Fund (SWF).

Ayon kay Pimentel, kung ang Punong Ehekutibo ang may kagustuhan nito, mayroon siyang gagawin upang maisulong at maisabatas ito.

Magugunitang isinulong nina House Speaker Martin Romualdez at Senior Deputy Majority Leader Sandro Marcos, na pinsan at anak ng pangulo, ang paglikha ng Maharlika Investment Fund o SWF.

Umalma naman sa panukala ang presidential sister na si Senator Imee Marcos na nagsabing hindi pinag-isipang maigi ang panukala at malalagay nito sa panganib ang pension funds ng mga miyembro ng Social Security System at Government Service Insurance System.

Una nang inihayag ni Albay Rep.  Joey Salceda na utos ni Pangulong Marcos ang pagsusulong na lumikha ng Maharlika Investment Fund.

Sinuspinde ng Supreme Court ang oral arguments para sa No-Contact Apprehension Policy (NCAP).

Ito’y makaraang i-adjourn ni Chief Justice Alexander Gesmundo ang sesyon nang walang inilalabas na desisyon dahilan upang mapalawig ang Temporary Restraining Order sa NCAP.

Itutuloy naman ang Oral Arguments sa Enero a – 24 ng susunod na taon.

Sa nasabing sesyon, tanging si Associate Justice Japar Dimaampao ang nakapag-interpellate sa mga kinatawan ng transport groups at inatasan ang petitioners na maghain ng karagdagang dokumento, kabilang ang Notices of Violation.

Tinukoy din ng mga petitioner ang ilang grounds kung bakit nilabag ng NCAP ang saligang batas kaya’t dapat tuluyang ibasura.

Kabilang sa tinukoy ni Atty. Greg Pua Jr., na kinatawan ng transport groups, ang napakataas umanong multa laban sa violators ng traffic rules sa Metro Manila.

Kumatawan naman para sa mga LGU ng Maynila, Quezon City, Valenzuela, Parañaque, Muntinlupa at Land Transportation Office, na pawang respondents, si Solicitor-General Menardo Guevarra.

Bumaba pa sa 19.5% o 15.1 million ang mga Pilipinong naninigarilyo noong isang taon batay sa Global Adult Tobacco Survey.

Kumpara ito sa 23.8% noong 2015 at 29.7% noon namang 2009.

Ayon kay Dr. Vito Roque Jr., ng DOH – Epidemiology Bureau, malaki rin ang ibinaba sa 12.2% ng secondhand smoke sa mga bahay at pampublikong lugar, maging sa mga pampublikong transportasyon.

Kumpara naman ito sa 37.6% noong 2015 at 55.3% noong 2009.

Nabawasan din anya ang exposure sa secondhand smoke sa mga bahay, 21.4% at workplace, 12.9%.

Lumabas sa survey na bumaba ang quit rate ng mga naninigarilyo sa nakalipas na isang taon, 3.9% kumpara sa 4.5% Nnoong 2009.

Gayunman, dumami naman ang adult smokers nagbabalak tumigil sa pagyoyosi dahil sa health warnings, 43.7% noong 2021 kumpara sa 37.4% noong 2009.

Ilan sa mga dahilan ng pagkalagas ng mga bilang ng mga naninigarilyo ang pagpapatupad ng Tobacco Prevention and Control Health Policies at itinaas na Tobacco Tax.