Drew Nacino

Mahigit 300 karton ng expired na karne o botcha na nagkakahalaga ng kalahating milyong piso ang nakumpiska ng mga otoridad mula sa isang storage facility sa Tundo, Maynila.

Kinumpirma ni Vener Santos, meat inspector ng National Meat Inspection Service (NMIS) na walang certificate of inspection ang mga karneng baboy na nagmula sa Germany at karneng baka mula Brazil.

Mayroon din anyang pork ban ang Department of Agriculture sa Germany dahil sa banta ng african swine fever.

Sinalakay ng mga tauhan ng DA, Philippine Coast Guard, at Regional Special Operations Group ng NCRPO ang warehouse matapos makatanggap ng sumbong na talamak ang bentahan online ng expired meat.

Nangangamba naman ang mga otoridad sa posibilidad na naibenta na online ang meat products dahil malaki ang demand para rito ngayong holiday season.

Bagaman hindi peligroso para sa tao ang asf, mabilis naman itong makahawa sa mga baboy.

Nasa P50 milyong pilipino ang hindi pa rin natuturukan ng unang booster ng covid-19 vaccine.

Dahil dito, hinimok ni DOH Officer-In-Charge Maria Rosario Vergeire ang mga eligible individual na magpa-booster na bilang dagdag proteksyon laban sa covid-19.

Ayon kay Vergeire, 26% lamang ng lahat ng eligible population ang bakunado ng unang booster shot.

Hindi anya malayong magkaroon ng malalang karamdaman dahil sa covid-19 ang mga wala pang unang booster na ayaw mangyari ng gobyerno.

Batay sa datos ng DOH, nasa 73.8 million na ang fully vaccinated pero 21.1 million individuals lamang ang may booster hanggang nitong Disyembre a – 6.

Tiniyak ng Land Transportation Office ang tuluy-tuloy na kampanya laban sa korapsyon matapos ang pagkakahuli sa isa sa mga kawani nito na umano’y nagsisilbi ring “fixer” sa mga transaksyon sa LTO.

Iginiit ni LTO Chief Assistant Secretary Jose Arturo “Jay Art” Tugade na walang puwang sa kanilang ahensya ang mga nasasangkot sa katiwalian at bilang na rin ang araw ng mga ito sa kanilang mga iligal na aktibidad.

Ayon kay Tugade, ang mga fixer ang puno’t dulo ng katiwalian sa ahensya at dapat magsilbing aral ang pagkaka-aresto sa isang tauhan ng LTO Region 6 sa Guimbal Extension Office, Iloilo.

Lihim umanong tumatanggap ng mga transaksyon ng ilang kliyente, mula sa pagre-renew ng rehistro, pagpapa-lisensya, at maging ang pagbabayad ng multa kapalit ng pera ang nasakoteng LTO personnel.

Gayunman, kinukuha lamang umano nito ang bayad at hindi na itinutuloy ang pagproseso.

Binalaan ng Department of Health ang publiko laban sa posibleng pagkalat ng bird flu o avian influenza sa mga tao.

Ito’y sa gitna ng kumpirmadong kaso ng bird flu sa barangay Cagay, Roxas City sa lalawigan ng Capiz.

Ayon sa DOH, isang ‘zoonotic disease’ ang bird flu na maaaring tumama sa tao.

Maaari umano itong maipasa sa tao kapag nalanghap o nahawakan ang dumi ng may sakit na manok at kauri nito.

Kabilang sa mga sintomas nito ang lagnat, ubo, sore eyes, pamamalat, hirap sa paghinga, pananakit ng kalamnan, panghihina at diarrhea.

Pinayuhan naman ng DOH ang publiko na maghugas ng kamay bago at pagkatapos humawak ng buhay o patay na manok at iba pang poultry product.

Nasa P20 milyong halaga ng smuggled “agricultural products” ang nasabat ng Bureau of Customs at Department of Agriculture sa port of Subic.

Disyembre a – 1 nang maglabas ng alert order si Port of Subic District Collector Maritess Martin laban sa mga kargamento ng Veneta Consumer Goods Trading at Lalavy Aggregates Trading, na nagmula sa China.

Sa isinagawang pagsusuri noong Martes, nadiskubre na idineklarang “assorted foodstuffs” pero naglalaman ng frozen carrots ang kargamento ng veneta.

Idineklara naman bilang frozen lobster balls at crabsticks ang kargamento ng Lalavy pero napag-alamang pula at puting sibuyas ang nilalaman ng container.

Maglalabas naman ang Port of Subic ng warrants of seizure and detention laban sa mga kargamento pagkatapos ng kumpletong pagsusuri at imbentaryo.

Bigo pang makumpirma ng Commission on Appointments CA si Transportation Secretary Jaime Bautista.

Sinuspinde ang confirmation hearing kay Bautista dahil kinulang na sa oras ang CA para maipagpatuloy ang mga pagtatanong sa kalihim.

Kabilang sa nakapagtanong kay Bautista ay Senator Alan Peter Cayetano na binusisi ang pag-aaral ng DOTr sa travel time ng mga commuter sa metro manila, solusyon sa matinding trapiko, strategic planning sa transportasyon at ang delay sa mga itatayong subway.

Samantala, naging kakaiba naman ang pagtatanong ng mga CA member sa confirmation hearing ni DOST Secretary Renato Solidum, Jr.

Inalam ni Sagip Partylist Rep. Rodante Marcoleta kay Solidum kung ano ang kinakain ng mga astronaut.

Kung sa isang kainan anya ay kayang mabusog ng astronaut sa loob ng ilang araw o linggo, maaari nang umimbento ang Pilipinas ng kagaya nito para ipakain sa mga mahihirap.

Tugon ni Solidum, ang mayron lang ngayon sa bansa ay mga meals na ready to eat at ipinamimigay sa mga biktima ng kalamidad na tumatagal ng anim na buwan bago masira.

Matapos nito ay nakalusot na sa committee level ng CA si Solidum, maging si Energy Secretary Rafael Lotilla at isasalang na lang sa plenary session para sa official confirmation.—- Mula sa ulat ni Cely Ortega-Bueno (Patrol 19)

Iginiit ng mga medical cannabis advocate ang pagpasa ng batas upang maging ligal ang paggamit sa medical marijuana.

Sa hearing ng subcommittee on health and demography, humarap ang mga magulang na may anak na epileptic.

Kasama si Dr. Donnabel Trias-Cunanan ng grupong cannahopefuls, incorporated na may anak na epileptic.

Ayon kay Cunanan, matagal na silang nananawagan na gawing ligal ang medical cannabis dahil napakahirap mag-apply ng compassionate special permit sa pagbili ng ganitong gamot mula sa ibang bansa sa dami ng requirement.

Mismong mga doktor anya ay hindi rin bukas na magreseta ng medical cannabis galing sa ibang bansa.

Inihayag naman ni Rowena Pilapil, na may anak na epileptic, na kapag naging ligal na ang medical cannabis ay mas magiging abot-kaya na itong gamot at maiiwasan ang mga long term side effects sa kanilang mga anak mula sa mga nireresetang gamot sa ngayon. — Mula sa ulat ni Cely Ortega-Bueno (Patrol 19)

Hindi pa handa ang bansa sa ngayon sa panukalang gawing ligal ang medical marijuana.

Ito, ayon kay Senator Jinggoy Estrada, ay dahil maaari itong abusuhin kung saan posibleng hindi lang gamitin bilang lunas.

Tugon ito ni Estrada sa pagsisimula kahapon ng pagdinig sa isinusulong ni Senator Robin Padilla na Senate Bill 230 o Medical Cannabis Compassionate Access act of the Philippines.

Iginiit ni Senador Estrada na dapat busisiin at aralin muna nang husto ang naturang panukalang batas.

Sa panig ni Senator Nancy Binay, inihayag nitong kailangan munang marinig ang panig ng mga eksperto at malaman ano ang “safeguards” upang hindi ito maabuso.

Samantala, iginiit naman ni Padillla na binuksan nila ang pintuan para sa mga pasyente na kumakatok sa puso ng mga kinauukulan para sa matagal na nilang panawagan na magkaroon ng access sa medical cannabis o marijuana. — Mula sa ulat ni Cely Ortega-Buena (Patrol 19)

Hindi na huhugot ng pondo mula sa Government Service Insurance System at Social Security System ang panukalang maharlika investment fund.

Ito’y sa gitna ng pangamba ng publiko na mawawalan ng benepisyo ang mga pensioner ng dalawang government insurance funds kung malulugi ang nasabing investment.

Inanunsyo ni House Appropriations Panel Senior Vice Chairperson at Marikina 2nd District Rep. Stella Quimbo na nagkasundo ang kanilang kumite na amyendahan ang panukala, bukas.

Dahil dito ay aalisin na anya ang P125 billion na pondo mula sa GSIS at P50 billion mula sa SSS na orihinal na kabilang sa House Bill 6398.

Si Quimbo ang isa sa mga may-akda ng panukalang isinusulong nina House Speaker Martin Romualdez at Senior Deputy Majority Leader Sandro Marcos, na pinsan at anak ni Pangulong Bongbong Marcos.

Sapat na umano para sa bawat pamilya ang P500 na budget para sa noche buena sa gitna nang sumisipang presyo ng mga bilihin.

Ito, ayon sa Department of Trade and Industry, ay kung may apat hanggang limang miyembro ang bawat pamilya.

Inihayag ni DTI Undersecretary Ruth Castelo na diskarte lamang sa pamimili at bundled items ang kailangan para makatipid.

Malaking tulong din anya ang price guide sa noche buena items na kanilang inilabas.

Sa halagang P500 umano ay maaari nang makapaghanda ng spaghetti, salad, pinoy pandesal, keso at hamon o kabuuang P488, may sukli ka pa.