Drew Nacino

Nakatakdang magpatupad ng mga panukala ang Department of Agriculture upang protektahan ang consumers mula sa expired agricultural commodities na ibinebenta online.

Inihayag ni DA Spokesperson Kristine Evangelista na kailangang tutukan ang pagpapatupad ng mga panukala sa e-commerce lalo’t halos karamihan ng transaksyon ay digital na.

Tugon ito ni Evangelista matapos masabat ng d.a. ang nasa tatlundaang kahon ng expired na karne o botcha na nagkakahalaga ng halos kalahating milyong piso sa isang warehouse sa Tundo, Maynila.

Ayon kay Evangelista, paiigtingin ng kagawaran at attached agencies nito ang pagsisikap upang matiyak na tanging lehitimong sellers at producers ang makapagbebenta online.

Batay sa ulat, pawang walang certificate of inspection mula sa national meat inspection service ang mga botchang nakumpiska na nagmula sa Germany at Brazil na mayroong umiiral na meat import ban dahil sa banta ng african swine fever.

Nangangamba ang mga otoridad na ilang imported meat ang maaaring nabili na ng consumer matapos makatanggap ng mga ulat hinggil sa pagbebenta ng botcha online.

Gumagawa na ng paraan ang Department of Agriculture upang ma-solusyonan ang tumataas na presyo ng pulang sibuyas sa bansa.

Ayon kay DA Spokesperson Kristine Evangelista, ilan sa tinitingnan nila ang pagbili nang direkta sa mga magsasaka simula ngayong anihan at direktang ibenta sa mga consumer sa pamamagitan ng kadiwa.

Umaasa anya ang kagawaran na makatatanggap ito ng inventory report mula sa bureau of plant and industry ngayong linggo.

Sa gitna naman ng pangamba ng publiko na magkaroon ng kakapusan sa suplay ng pulang sibuyas, tiniyak ni Evangelista na nakikita na nila ang pag-stabilize ng produkto sa susunod na buwan.

Samantala, hinimok ng opisyal ang mga mamimili na bisitahin ang kadiwa stores kung saan nagbebenta ng abot-kaya sa bulsang agri-products.

Muling tataas ang kontribusyon ng mga manggagawa sa Philhealth at Social Security System simula Enero ng susunod na taon.

Alinsunod sa batas, tataas nang isang porsiyento ang kontribusyon sa SSS kasabay ng paglaki ng salary credit sa P30,000 pero sagot ito ng employer.

Kung ang suweldo ay P35,000 kada buwan, P4,200 naman ang magiging kontribusyon simula Enero kumpara sa kasalukuyang P3,375.

Ayon kay SSS president at CEO Michael Regino, hindi dapat mangamba ang mga miyembro dahil may aspetong forced savings na ang kontribusyon pagdating ng retirement.

Kalahating porsiyento naman ang dagdag-kontribusyon sa Philhealth mula sa kasalukuyang apat na porsiyento na paakyat ng apat at kalahating porsiyento simula Enero.

Halimbawa, kung ang suweldo ay 10,000 pesos ay tataas ng 450 ang hulog mula sa kasalukuyang 400 pesos at kung lagpas 10,000 hanggang below 80,000 pesos ang suweldo, 500 hanggang 850 pesos naman ang magiging dagdag-kontribusyon.

Inilatag naman ni Philhealth Spokesperson Shirley Domingo ang mga mapapakinabangan ng mga miyembro sa dagdag-kontribusyon.

Kabilang na rito ang pagreview nila sa existing case rate upang ma-increase ang support value at review sa z-benefits at posibleng increase sa dialysis sessions.

Muling binalaan ng Department of Migrant Workers ang mga Filipino laban sa travel consultancy firms na nag-aalok ng trabaho sa ibang bansa.

Ipinaalala ni DMW Secretary Susan Ople sa mga pinoy na naghahanap ng trabaho sa ibayong-dagat na iwasang makipagtransaksyon dahil iligal ang mga ito.

Ayon kay Ople, kulungan ang naghihintay sa mga nagpapatakbo ng mga travel consultancy firm matapos ipasara ng Anti-Illegal Recruitment Branch ng philippine Overseas Employment Administration ang isang kompanya sa pampanga na nag-aalok ng trabaho sa poland.

Natuklasan anya ng survellaince operations ng AIRB ang nasabing kompanya sa ilalim ng travel consultancy firm na nag-aalok ng trabaho sa Poland para sa truck drivers, welders at factory workers na may buwanang sahod na 35,000 hanggang 124,000 pesos.

Nangongolekta din ito ng processing fees na aabot sa P122,000 mula sa mga aplikante.

Gayunman, inihayag ng kalihim na hindi lisensyado ang nasabing kumpanya bilang recruitment agency at walang anumang validated na mga job order sa ibang bansa.

Sinampahan naman ng mga kasong illegal recruitment ang kompanya matapos itong ipasara habang hinimok ni ople ang mga biktima na makipag-ugnayan sa DMW o direktang iulat ang kanilang mga kaso sa pamamagitan ng Facebook page ng AIRB o sa kanilang hotline sa 63-2-8721-0619.

Personal na ininspeksyon ni PNP Chief Gen. Rodolfo Azurin ang mga tindahan ng paputok sa tinaguriang fireworks capital ng bansa sa Bocaue, Bulacan.

Ito’y pang matiyak ang kaligtasan ng publiko at muling pagyabong ng negosyo ng ligal na paputok.

Kasama ni Azurin na nag-inspeksyon sina Governor Daniel Fernando, Vice Governor Alex Castro, Bocaue Mayor Jon Jon Villanueva, Bulacan Provincial Police Director, Col. Relly Arnedo at ilang opisyal sa fireworks industry, kahapon.

Dumalo rin sina Police Regional Office – 3 Director Brig. Gen. Cesar Pasiwen at ilang mataas na opisyal ng PRO-3.

Ayon kay Azurin, hangad niya sa publiko na walang masaktan sa mga paputok sa pagdiriwang ng kapaskuhan at darating na pagsalubong sa bagong taon.

Hindi rin anya tumitigil ang mga otoridad sa pagpapaalala o tamang impormasyon tungkol sa paputok para sa publiko, inspeksyon, imbentaryo, pagtugis sa mga iligal na pagawaan at tindahan ng mga paputok.

Kabilang sa ipinagbabawal ang malalakas at mapaminsalang paputok gaya ng goodbye covid, kwiton bomb, kwiton parachute, kwiton bomb, goodbye bading, kabasi, bin laden at goodbye Philippines.

Arestado sa entrapment operation ng Caloocan City Police ang dalawang empleyado ng Bureau of Internal Revenue at kanilang dalawang kasabwat dahil sa umano’y pangongotong sa isang negosyante.

Kinilala ang mga suspek na sina April Claudine Dela Cruz, 30 anyos, data controller 2 sa assessment division ng BIR District 5 Caloocan at residente ng Garden Village, Sta Maria, Bulacan; Joyet Alvero, singkwenta’y singko anyos, Admin Assistance Officer Ng B.I.R. District 5, residente ng Concepcion, Malabon City; Jennifer Roldan, kwarenta’y nwebe anyos, freelance liasson officer ng Bambang, Taguig City at Ariel Roble, kwarenta’y sais anyos, freelance book keeper ng Sampaloc, Maynila.

Ayon kay Caloocan Police Chief Col. Ruben Lacuesta, nadakip ang apat ng pinagsanib na pwersa ng Caloocan Police-Intelligence section at PNP Intelligence Group matapos tanggapin ang P1.8 million marked money sa isinagawang entrapment sa barangay 132 Bagong Barrio.

Bago ang entrapment operation, sinabihan ng mga suspek ang may-ari ng isang panel board fabrication sa barangay Potrero, Malabon City na mayroon siyang tax liability na nagkakahalaga ng P13 million.

Mababawasan lang umano ang tax liability kung makapagbabayad ang negosyante ng P4.5 million hanggang magkaayos at magkatawaran sila sa P3 million.

Nahaharap ang apat sa kasong robbery extortion at paglabag sa code of ethical standards for public officials and employees.

Kalaboso ang isang traffic enforcer ng MMDA makaraang mangotong umano ng truck driver sa Quezon City.

Kinilala ang suspek na si Raul Lapore, na naaktuhan ng Quezon City Police District na nakikipag-transaksyon sa Commonwealth Avenue, pasado alas-3 ng madaling araw kahapon.

Ayon kay QCPD-Criminal Investigation Section Chief Lt. Anthony Dacquel, sinita ni Lapore ang driver na si Crislie Rife at para hindi umano matiketan ay nakiusap ang tsuper na magbigay na lang ng P300 na tinanggap naman ng suspek.

Napag-alamang hindi pa naka-duty si Lapore nang maganap ang umano’y pangongotong, walang mission order sa Commonwealth at dati nang inireklamo dahil din sa pangongotong kaya inilipat sa special operations and anti-colorum unit.

Pero bago pa ang insidente ay nakatanggap na ang QCPD ng reklamo mula sa isang truck driver na nakotongan din umano ng suspek kaya’t inikutan ng mga pulis ang nasabing lugar.

Tinatapalan din umano ng suspek ng chewing gum ang magkabilang body number ng kaniyang motorsiklo upang hindi makuha ang kaniyang pagkakakilanlan.

Mahaharap naman si Lapore sa reklamong robbery extortion at posibleng masuspinde kung mapapatunayan ang reklamo.

Samantala, galit namang hinarap ni MMDA Task Force Special Operations Chief Bong Nebrija si Lapore habang tiniyak ni MMDA Acting Chairman Romando Artes na hindi nila ito kinukunsinti.

Hindi pa tine-terminate ng San Miguel Corporation (SMC) ang power supply agreement nito sa Meralco.

Ito ang nilinaw ni Energy Regulatory Commission Chairperson Atty. Monalisa Dimalanta, batay sa abiso sa kanila ng nasabing electricity distribution firm.

Ayon kay Dimalanta, suspensyon lamang ang ipinatupad ng SMC dahil sa 60-day temporary restraining order ng Court of Appeals na ipinataw sa PSA ng San Miguel sa Meralco noong November.

Nakikipag-negosasyon na ang Meralco sa mga power generation company upang punan ang 670 megawatt supply na kakulangan matapos tuldukan ng South Premiere Power Corporation ng San Miguel Corporation ang kanilang power supply agreement (PSA).

Ayon sa Meralco, pansamantala silang humuhugot ng supply na saklaw ng PSA sa Wholesale Electricity Spot Market (WESM).

Pero dahil mataas anila ang presyo ng kuryente sa WESM, patuloy ang pakikipag-usap ng Meralco sa ibang generation companies upang punan ang 670 megawatt supply.

Ipinunto pa ng nasabing power distributor na kung magkakaroon ng bagong PSA ay mapo-protektahan ang mga customer laban sa mas mahal na presyo ng kuryente sa WESM.

Sa ngayon ay prayoridad ng Meralco na tiyakin ang patuloy na matatag, mapagkakatiwalaan at sapat na supply para sa lahat ng kanilang customer at ginagawa nila ang lahat ng paraan upang hindi magkaroon ng epekto sa electric bill ng termination ng kanilang PSA sa San Miguel.

Hindi na itutuloy ng Department of Agriculture ang planong pagbebenta ng puslit na puting sibuyas sa Kadiwa centers.

Ito’y dahil sa pagtutol ng grupong Samahang Industriya ng Agrikultura o Sinag.

Ayon kay DA Deputy Spokesman Rex Estoperez, nabubulok na ang ilang nakumpiskang sibuyas kaya’t hindi na nila ito ibebenta.

Magsisimula na rin anyang mag-ani ang mga magsasaka ngayong Disyembre kaya’t makadaragdag ito sa inventory ngayong holiday season.

Una nang kinontra ni Sinag Chairman Rosendo So ang plano ng DA na ibenta ang smuggled onions sa Kadiwa centers, dahil lalo lang ma-e-engganyo ang mga trader na magbenta ng mga puslit na agri-product.