Drew Nacino

Biyaheng Brussels, Belgium na si Pangulong Ferdinand “Bongbong” Marcos Jr., upang makibahagi sa European Union-Association of Southeast Asian Nations (EU-ASEAN) Business Summit.

Sa kanyang departure speech, inihayag ni Pangulong Marcos na umaasa siyang magiging produktibo ang EU-ASEAN Business Summit.

Mahalaga anya ang nasabing pulong dahil magsisilbing coordinator ang Pilipinas sa ASEAN-EU Dialogue Relations hanggang 2024 at kanyang maisusulong ang interes ng bansa.

Sa Miyerkules, Disyembre a – 14 dadalo si PBBM sa ASEAN-EU Commemorative Summit at makakaharap din nito si King Philippe ng Belgium.

Nakahanda na ang P1.4 billion peso funds ng Department of Social Welfare and Development bilang tulong sa mga apektado ng Bagyong Rosal.

Ito ang tiniyak sa publiko ni DSWD secretary Erwin Tulfo matapos makaranas ng pagbaha bunsod ng malakas na ulan dulot ng bagyo ang ilang taga-Bicol at Eastern Visayas.

Ayon kay Tulfo, bukod sa pondo mula sa kanilang Central Office, Field Offices at National Resource Operations Center, handa rin ang 547,000 family food packs upang ipamahagi sa mga local government unit.

Magbibigay din anya ang kagawaran ng technical at resource assistance sa mga LGU na apektado.

Pursigido si Finance secretary Benjamin Diokno na isulong at ipatupad ang planong Sovereign Wealth Fund (SWF).

Sa kabila ito nang pagkaka-alis sa Government Service Insurance System at Social Security System bilang orihinal na paghuhugutan ng pondo para sa SWF o Maharlika Investment Fund.

Ayon kay Diokno, mayroon namang maaaring ipalit sa GSIS at SSS, gaya ng Land Bank of the Philippines at Development Bank of the Philippines na may initial commitment na tig-P50-B o pinagsamang P100-B.

Sa panig naman ng Bangko Sentral ng Pilipinas, hindi na anya nito gagamitin ang foreign exchange para sa Maharlika Fund sa halip ay plano nilang hugutin ang 100% ng dibidendo nito upang pondohan ang SWF sa unang dalawang taon.

Sa mga susunod na fiscal years, idinagdag ng kalihim na i-re-remitt ng BSP ang kalahati ng declared dividends sa pondo habang ang nalalabing kalahati ang kukumpleto sa P250-B capital requirement ng Central Bank.

Batay sa datos ng kagawaran, aabot sa P23-B ang ini-remitt na dibidendo ng Bangko Sentral sa kaban ng bayan noong 2019; P17.9-B noong 2020 at P15.89-B noong isang taon.

Sa oras na makumpleto ang P250B peso capital commitment ng BSP sisimulan na ng Bangko Sentral ang pag-remitt ng 100% ng declared dividends nito sa Maharlika Fund.

Bukod sa BSP, idinagdag ni Diokno na mandato rin ng national government at Philippine Amusement and Gaming Corporation na magbigay ng kontribusyon sa SWF.

Karagdagang 1,134 Covid-19 cases ang naitala sa bansa, kahapon.

Ito na ang ikalimang sunod na araw na nakapagtala ng higit sa 1,000 kaso ng Covid-19 ang Department of Health.

Bahagya namang bumaba sa 18,252 ang aktibong kaso kumpara sa 18,387 noong Sabado.

Sumampa rin sa 4,049,000 ang total caseload, kabilang ang 3,965,000 recoveries habang nadagdagan ng 24 ang nasawi kaya’t umakyat sa 64,880 ang death toll.

Samantala, nangunguna pa rin ang National Capital Region sa mga rehiyong may pinaka-maraming kaso sa nakalipas na dalawang linggo na 5,591; sinundan ng CALABARZON, 2,260 at Central Luzon, 1,090.

Pag-control sa presyo ng mga pangunahing bilihin, partikular ng pagkain ang nangunguna pa ring alalahanin ng mayorya ng mga Filipino.

Batay ito sa OCTA Research Group survey sa 1,200 respondents noong October 23 hanggang 27.

Sa naturang survey, 57%ng respondents ang nagsabing inflation ang nangunguna sa tatlong national concerns na nais nilang resolbahin agad ng gobyerno kumpara sa 52 percent na naitala sa kahalintulad na survey noong Marso.  48% naman ang nagsabing pagsasa-ayos o pagtaas ng sahod ng mga manggagawa ang dapat tutukan kumpara sa 43% noong Marso; sinundan ng abot-kayang pagkain, 46% kumpara sa 41% noong Marso.

Kabilang din sa national concerns ang paglikha ng mas maraming trabaho, 29%; pagbibigay ng libre at de-kalidad na edukasyon, 26% at pagpapaba sa antas ng kahirapan, 24%.

Dapat pag-isipang maigi ang isinusulong na panukalang Maharlika o Sovereign Wealth Fund sa halip na madaliin itong ipasa sa Kongreso.

Aminado si Bagong Henerasyon Partylist Rep. Bernadette Herrera-Dy na marami pang dapat talakayin kaugnay sa nasabing panukala, partikular ang paghuhugutan nitong pondo.

Ayon kay Dy, sadyang malaki ang maitutulong ng Sovereign Wealth Fund pero dapat bigyang-pansin ang “financial capacity” ng bansa.

Kung mayroon anyang surplus o sobrang pondo ay hindi naman imposibleng umusad ang SWF subalit dahil sa economic situation, lalo ang lumolobong utang ng bansa ay dapat mag-isip ng remedyo ang nagsusulong nito.

Mahihirapang makalusot sa Senado ang panukalang paglikha ng Maharlika Wealth o Sovereign Investment Fund na isinusulong ng ilang mataas na opisyal ng Kamara.

Ito, ayon kay Senate Minority Leader Koko Pimentel, ay dahil lubha nang “baon sa utang ang Pilipinas” at walang surplus o sobrang pondo ang pamahalaan.

Hindi anya masyadong pinag-isipan ang panukala at minadali matapos magsagawa ang ilang mambabatas na nagsusulong nito, partikular sa pagkukunan ng pondo sa gitna ng pagtanggi ng karamihan.

Tugon ito ng senador makaraang tanggalin na ang Government Service Insurance System at Social Security Services, bilang paghuhugutan ng pondo para sa Maharlika Investment Fund.

Sa ngayon, idinagdag ni Pimentel na kailangang magkaroon ng counterpart bill ang MIF sa Senado.

Iginiit ng mambabatas na ang panukalang Maharlika Fund ay mahina hindi lang dahil sa ito ay mahina kundi dahil sa malakas ang pagtutol dito ng publiko, lalo ng mga miyembro ng GSIS at SSS. —Mula sa ulat ni Cely Ortega-Bueno (Patrol 19)

Naka-umang ang dagdag P60 hanggang P80 na singil sa kuryente sa mga customer ng Meralco matapos suspendihin ng San Miguel Corporation subsidiary na South Premier Power Corporation, ang kanilang power supply agreement.

Batay ito sa komputasyon ng Energy Regulatory Commission (ERC) para sa mga kumokonsumo ng 200 kilowatt per hour.

Ipinaliwanag ni ERC Chairperson Monalisa Dimalanta na dahil nabawasan ng 670 megawatt ang isinusupply sa Meralco, pansamantala itong humuhugot sa mas mahal na Wholesale Electricity Spot Market (WESM).

Katumbas anya ito ng nawalang 670 megawatts mula sa SPPC o mahigit 13% ng supply para sa power distributor.

Posible namang bahagyang maramdaman ang dagdag-singil sa huling bahagi ng Disyembre depende kung hindi makakukuha ng panibagong PSA ang Meralco.

Umaasa ang Energy Regulatory Commission a ipagpapatuloy ng South Premiere Power Corporation (SPPC) at Meralco ang pagpapatupad sa nalalabing buwan ng kanilang power supply agreements.

Ito, ayon kay ERC Chairperson at CEO Monalisa Dimalanta, ay upang maiwasan ang pagtaas ng singil sa kuryente na papasanin ng mga consumer.

Maaari pa anyang ipagpatuloy ang kontrata dahil sinuspinde lang naman ito ng San Miguel Corporation, na mother company ng SPPC, matapos maglabas ng 60-day temporary restraining order ang Court of Appeals.

Idinagdag pa ni Dimalanta na ang naturang PSA sa SPPC ang pinaka-murang kontrata na pinasok ng Meralco kumpara sa mas mahal na kuryente sa wholesale electricity spot market na pansamantalang pinagkukunan ng naturang electricity distributor.

Nananatili ang alert level 1 sa bulkang Kanlaon sa negros Island matapos makapagtala ng dalawang volcanic earthquakes sa nakalipas na magdamag.

Naobserbahan ng Phivolcs ang bahagyang pamamaga ng Kanlaon pero wala namang naitalang pagsingaw ng usok sa bunganga ng bulkan.

Mahigpit pa ring ipinagbabawal ang pagpasok ng sinuman sa 4-kilometer radius permanent danger zone sa paligid nito.

Ipinagbabawal din ng Phivolcs ang pagpapalipad ng anumang uri ng aircraft malapit sa tuktok ng bulkan dahil sa banta ng pagsabog.