Drew Nacino

Mahihirapang makalusot sa Senado ang panukalang paglikha ng Maharlika Wealth o Sovereign Investment Fund na isinusulong ng ilang mataas na opisyal ng Kamara.

Ito, ayon kay Senate Minority Leader Koko Pimentel, ay dahil lubha nang “baon sa utang ang Pilipinas” at walang surplus o sobrang pondo ang pamahalaan.

Hindi anya masyadong pinag-isipan ang panukala at minadali matapos magsagawa ang ilang mambabatas na nagsusulong nito, partikular sa pagkukunan ng pondo sa gitna ng pagtanggi ng karamihan.

Tugon ito ng senador makaraang tanggalin na ang Government Service Insurance System at Social Security Services, bilang paghuhugutan ng pondo para sa Maharlika Investment Fund.

Sa ngayon, idinagdag ni Pimentel na kailangang magkaroon ng counterpart bill ang MIF sa Senado.

Iginiit ng mambabatas na ang panukalang Maharlika Fund ay mahina hindi lang dahil sa ito ay mahina kundi dahil sa malakas ang pagtutol dito ng publiko, lalo ng mga miyembro ng GSIS at SSS. —Mula sa ulat ni Cely Ortega-Bueno (Patrol 19)

Naka-umang ang dagdag P60 hanggang P80 na singil sa kuryente sa mga customer ng Meralco matapos suspendihin ng San Miguel Corporation subsidiary na South Premier Power Corporation, ang kanilang power supply agreement.

Batay ito sa komputasyon ng Energy Regulatory Commission (ERC) para sa mga kumokonsumo ng 200 kilowatt per hour.

Ipinaliwanag ni ERC Chairperson Monalisa Dimalanta na dahil nabawasan ng 670 megawatt ang isinusupply sa Meralco, pansamantala itong humuhugot sa mas mahal na Wholesale Electricity Spot Market (WESM).

Katumbas anya ito ng nawalang 670 megawatts mula sa SPPC o mahigit 13% ng supply para sa power distributor.

Posible namang bahagyang maramdaman ang dagdag-singil sa huling bahagi ng Disyembre depende kung hindi makakukuha ng panibagong PSA ang Meralco.

Umaasa ang Energy Regulatory Commission a ipagpapatuloy ng South Premiere Power Corporation (SPPC) at Meralco ang pagpapatupad sa nalalabing buwan ng kanilang power supply agreements.

Ito, ayon kay ERC Chairperson at CEO Monalisa Dimalanta, ay upang maiwasan ang pagtaas ng singil sa kuryente na papasanin ng mga consumer.

Maaari pa anyang ipagpatuloy ang kontrata dahil sinuspinde lang naman ito ng San Miguel Corporation, na mother company ng SPPC, matapos maglabas ng 60-day temporary restraining order ang Court of Appeals.

Idinagdag pa ni Dimalanta na ang naturang PSA sa SPPC ang pinaka-murang kontrata na pinasok ng Meralco kumpara sa mas mahal na kuryente sa wholesale electricity spot market na pansamantalang pinagkukunan ng naturang electricity distributor.

Nakatakdang magpatupad ng mga panukala ang Department of Agriculture upang protektahan ang consumers mula sa expired agricultural commodities na ibinebenta online.

Inihayag ni DA Spokesperson Kristine Evangelista na kailangang tutukan ang pagpapatupad ng mga panukala sa e-commerce lalo’t halos karamihan ng transaksyon ay digital na.

Tugon ito ni Evangelista matapos masabat ng d.a. ang nasa tatlundaang kahon ng expired na karne o botcha na nagkakahalaga ng halos kalahating milyong piso sa isang warehouse sa Tundo, Maynila.

Ayon kay Evangelista, paiigtingin ng kagawaran at attached agencies nito ang pagsisikap upang matiyak na tanging lehitimong sellers at producers ang makapagbebenta online.

Batay sa ulat, pawang walang certificate of inspection mula sa national meat inspection service ang mga botchang nakumpiska na nagmula sa Germany at Brazil na mayroong umiiral na meat import ban dahil sa banta ng african swine fever.

Nangangamba ang mga otoridad na ilang imported meat ang maaaring nabili na ng consumer matapos makatanggap ng mga ulat hinggil sa pagbebenta ng botcha online.

Gumagawa na ng paraan ang Department of Agriculture upang ma-solusyonan ang tumataas na presyo ng pulang sibuyas sa bansa.

Ayon kay DA Spokesperson Kristine Evangelista, ilan sa tinitingnan nila ang pagbili nang direkta sa mga magsasaka simula ngayong anihan at direktang ibenta sa mga consumer sa pamamagitan ng kadiwa.

Umaasa anya ang kagawaran na makatatanggap ito ng inventory report mula sa bureau of plant and industry ngayong linggo.

Sa gitna naman ng pangamba ng publiko na magkaroon ng kakapusan sa suplay ng pulang sibuyas, tiniyak ni Evangelista na nakikita na nila ang pag-stabilize ng produkto sa susunod na buwan.

Samantala, hinimok ng opisyal ang mga mamimili na bisitahin ang kadiwa stores kung saan nagbebenta ng abot-kaya sa bulsang agri-products.

Muling tataas ang kontribusyon ng mga manggagawa sa Philhealth at Social Security System simula Enero ng susunod na taon.

Alinsunod sa batas, tataas nang isang porsiyento ang kontribusyon sa SSS kasabay ng paglaki ng salary credit sa P30,000 pero sagot ito ng employer.

Kung ang suweldo ay P35,000 kada buwan, P4,200 naman ang magiging kontribusyon simula Enero kumpara sa kasalukuyang P3,375.

Ayon kay SSS president at CEO Michael Regino, hindi dapat mangamba ang mga miyembro dahil may aspetong forced savings na ang kontribusyon pagdating ng retirement.

Kalahating porsiyento naman ang dagdag-kontribusyon sa Philhealth mula sa kasalukuyang apat na porsiyento na paakyat ng apat at kalahating porsiyento simula Enero.

Halimbawa, kung ang suweldo ay 10,000 pesos ay tataas ng 450 ang hulog mula sa kasalukuyang 400 pesos at kung lagpas 10,000 hanggang below 80,000 pesos ang suweldo, 500 hanggang 850 pesos naman ang magiging dagdag-kontribusyon.

Inilatag naman ni Philhealth Spokesperson Shirley Domingo ang mga mapapakinabangan ng mga miyembro sa dagdag-kontribusyon.

Kabilang na rito ang pagreview nila sa existing case rate upang ma-increase ang support value at review sa z-benefits at posibleng increase sa dialysis sessions.

Muling binalaan ng Department of Migrant Workers ang mga Filipino laban sa travel consultancy firms na nag-aalok ng trabaho sa ibang bansa.

Ipinaalala ni DMW Secretary Susan Ople sa mga pinoy na naghahanap ng trabaho sa ibayong-dagat na iwasang makipagtransaksyon dahil iligal ang mga ito.

Ayon kay Ople, kulungan ang naghihintay sa mga nagpapatakbo ng mga travel consultancy firm matapos ipasara ng Anti-Illegal Recruitment Branch ng philippine Overseas Employment Administration ang isang kompanya sa pampanga na nag-aalok ng trabaho sa poland.

Natuklasan anya ng survellaince operations ng AIRB ang nasabing kompanya sa ilalim ng travel consultancy firm na nag-aalok ng trabaho sa Poland para sa truck drivers, welders at factory workers na may buwanang sahod na 35,000 hanggang 124,000 pesos.

Nangongolekta din ito ng processing fees na aabot sa P122,000 mula sa mga aplikante.

Gayunman, inihayag ng kalihim na hindi lisensyado ang nasabing kumpanya bilang recruitment agency at walang anumang validated na mga job order sa ibang bansa.

Sinampahan naman ng mga kasong illegal recruitment ang kompanya matapos itong ipasara habang hinimok ni ople ang mga biktima na makipag-ugnayan sa DMW o direktang iulat ang kanilang mga kaso sa pamamagitan ng Facebook page ng AIRB o sa kanilang hotline sa 63-2-8721-0619.

Personal na ininspeksyon ni PNP Chief Gen. Rodolfo Azurin ang mga tindahan ng paputok sa tinaguriang fireworks capital ng bansa sa Bocaue, Bulacan.

Ito’y pang matiyak ang kaligtasan ng publiko at muling pagyabong ng negosyo ng ligal na paputok.

Kasama ni Azurin na nag-inspeksyon sina Governor Daniel Fernando, Vice Governor Alex Castro, Bocaue Mayor Jon Jon Villanueva, Bulacan Provincial Police Director, Col. Relly Arnedo at ilang opisyal sa fireworks industry, kahapon.

Dumalo rin sina Police Regional Office – 3 Director Brig. Gen. Cesar Pasiwen at ilang mataas na opisyal ng PRO-3.

Ayon kay Azurin, hangad niya sa publiko na walang masaktan sa mga paputok sa pagdiriwang ng kapaskuhan at darating na pagsalubong sa bagong taon.

Hindi rin anya tumitigil ang mga otoridad sa pagpapaalala o tamang impormasyon tungkol sa paputok para sa publiko, inspeksyon, imbentaryo, pagtugis sa mga iligal na pagawaan at tindahan ng mga paputok.

Kabilang sa ipinagbabawal ang malalakas at mapaminsalang paputok gaya ng goodbye covid, kwiton bomb, kwiton parachute, kwiton bomb, goodbye bading, kabasi, bin laden at goodbye Philippines.